ദോഹ: ഖത്തറില്‍ ഇറാന്റെ റെവല്യൂഷണറി ഗാര്‍ഡുമായി (IRGC) ബന്ധമുള്ള സംഘം പിടിയില്‍. ഖത്തറില്‍ അട്ടിമറി പ്രവര്‍ത്തനങ്ങള്‍ക്കും ചാരപ്പണികള്‍ക്കുമായി നിയോഗിക്കപ്പെട്ട ഇറാന്റെ റെവല്യൂഷണറി ഗാര്‍ഡിന്റെ പത്തംഗ സ്ലീപ്പര്‍ സെല്ലുകളെയാണ് പിടികൂടിയതെന്ന് ഖത്തര്‍ ഔദ്യോഗിക വാര്‍ത്താ ഏജന്‍സി അറിയിച്ചു. ഇതില്‍ ഏഴ് പേര്‍ ഖത്തറിലെ തന്ത്രപ്രധാനമായ സൈനിക കേന്ദ്രങ്ങളില്‍ ചാരപ്പണി നടത്താനും മൂന്ന് പേര്‍ അട്ടിമറി പ്രവര്‍ത്തനങ്ങള്‍ നടത്താനുമാണ് നിയോഗിക്കപ്പെട്ടതെന്ന് അധികൃതര്‍ വ്യക്തമാക്കി.
ചോദ്യം ചെയ്യലില്‍ തങ്ങള്‍ ഇറാന്‍ റെവല്യൂഷണറി ഗാര്‍ഡിന്റെ ഭാഗമാണെന്നും പ്രത്യേക ദൗത്യങ്ങള്‍ക്കായി അയക്കപ്പെട്ടതാണെന്നും പ്രതികള്‍ സമ്മതിച്ചു. അതീവ സുരക്ഷയുള്ള കേന്ദ്രങ്ങളുടെ ഭൂപടങ്ങള്‍, ലൊക്കേഷനുകള്‍, നൂതന ആശയവിനിമയ ഉപകരണങ്ങള്‍ എന്നിവ ഇവരില്‍ നിന്ന് കണ്ടെടുത്തിട്ടുണ്ട്.

കഴിഞ്ഞ ശനിയാഴ്ച മുതല്‍ ഇറാന് മേല്‍ അമേരിക്കയും ഇസ്‌റാഈലും സംയുക്ത ആക്രമണം ആരംഭിച്ചതിന് പിന്നാലെ ഖത്തര്‍ ഉള്‍പ്പെടെയുള്ള ഗള്‍ഫ് രാജ്യങ്ങള്‍ക്ക് നേരെ ഇറാന്‍ പ്രത്യാക്രമണം നടത്തിവരികയാണ്. മേഖലയിലെ അമേരിക്കന്‍ കേന്ദ്രങ്ങളെയാണ് ലക്ഷ്യം വെക്കുന്നതെന്ന് ഇറാന്‍ അവകാശപ്പെടുമ്പോഴും എയര്‍പോര്‍ട്ടുകള്‍, ഹോട്ടലുകള്‍ തുടങ്ങിയ സിവിലിയന്‍ കേന്ദ്രങ്ങളിലും മിസൈലുകള്‍ പതിക്കുന്നുണ്ട്.
കഴിഞ്ഞ കുറച്ചു ദിവസങ്ങളിലായി ഖത്തറില്‍ ഡസന്‍ കണക്കിന് സ്‌ഫോടനങ്ങള്‍ റിപ്പോര്‍ട്ട് ചെയ്തു. ശനിയാഴ്ചയ്ക്ക് ശേഷം 3 ക്രൂയിസ് മിസൈലുകള്‍, 101 ബാലിസ്റ്റിക് മിസൈലുകള്‍, 39 ഡ്രോണുകള്‍ എന്നിവ ഖത്തറിന് നേരെ തൊടുത്തുവിട്ടതായി പ്രതിരോധ മന്ത്രാലയം സ്ഥിരീകരിച്ചു. ഇവയില്‍ ഭൂരിഭാഗവും ഖത്തര്‍ പ്രതിരോധ സേന തകര്‍ത്തു.

Summary: Ten suspects were arrested in the cells, the Qatar News Agency (QNA) announced on Tuesday. Seven had been assigned to spy on “vital and military facilities” in Qatar, while three were tasked with carrying out sabotage operations. Qatari authorities have found locations and coordinates of sensitive facilities and installations, as well as communication devices and technological equipment in their possession, the report said.