കൂത്തുപറമ്പ്: യാത്രക്കാര്‍ക്ക് തണലൊരുക്കി വാട്ട്‌സ്ആപ്പ് കൂട്ടായ്മ. കൊട്ടയോടി സഖാക്കള്‍ എന്ന പേരില്‍ രൂപീകരിച്ച വാട്ട്‌സ്ആപ്പ് കൂട്ടായ്മയാണ് കൊട്ടയോടി ടൗണില്‍ ചെറുവാഞ്ചേരി റോഡില്‍ ബസ് ഷെല്‍ട്ടര്‍ സ്ഥാപിച്ച് യാത്രക്കാര്‍ക്ക് തണലൊരുക്കിയത്. കൊട്ടയോടിയിലെ പഴയകാല സി.പി.എം പ്രവര്‍ത്തകന്‍ മാനാങ്കര രാഘവന്റെ സ്മരണയ്ക്കായാണ് 153 അംഗങ്ങളുള്ള ഈ കൂട്ടായ്മ ഇരുപതിനായിരത്തോളം രൂപ സമാഹരിച്ചു ഷെല്‍ട്ടര്‍ നിര്‍മിച്ചത്. ഷെല്‍ട്ടറിനകത്ത് ഇരിപ്പിടങ്ങള്‍, എഫ്.എം റേഡിയോ എന്നിവ ഒരുക്കിയിട്ടുണ്ട്. ഇത്തരം സന്നദ്ധ പ്രവര്‍ത്തനങ്ങള്‍ തുടര്‍ന്നും വാട്ട്‌സ്ആപ്പ് കൂട്ടായ്മയിലൂടെ നടത്തുമെന്ന് ഗ്രൂപ്പ് അഡ്മിന്‍ സി.ടി സുരേഷ് ബാബു പറഞ്ഞു. ബസ് ഷെല്‍ട്ടര്‍ സി.പി.എം നേതാവ് എം സുരേന്ദ്രന്‍ ഉദ്ഘാടനം ചെയ്തു. വി രാജന്‍ അധ്യക്ഷനായി.