ഷാര്‍ജ: മൂന്ന് ദിവസത്തിനുള്ളില്‍ യാചകന്‍ സമ്പാദിച്ചത് 14,000 ദിര്‍ഹം, അതായത് മൂന്നു ലക്ഷത്തി മുപ്പത്തിനായിരം രൂപയോളം. ആളുകളില്‍ ഇന്നും ഇത്രയും വലിയ തുക പിരിച്ചെടുത്ത ഇയാളെ ഷാര്‍ജ പൊലിസ് ജനറല്‍ കമാന്‍ഡിലെ ആന്റിബിഗിംഗ് യൂണിറ്റ് അറസ്റ്റ് ചെയ്തു.

ഭിക്ഷാടനം സുരക്ഷയ്ക്കും സാമൂഹിക വെല്ലുവിളികള്‍ക്കും കാരണമാകുന്ന ഒരു മോശം കാര്യമാണെന്ന് സ്‌പെഷ്യല്‍ ടാസ്‌ക് ഡിപ്പാര്‍ട്ട്‌മെന്റ് ഡയറക്ടറും യാചകരുടെയും തെരുവ് കച്ചവടക്കാരുടെയും മോണിറ്ററിംഗ് ടീം മേധാവിയുമായ ബ്രിഗേഡിയര്‍ ജനറല്‍ ഒമര്‍ അല്‍ഗസല്‍ അല്‍ഷംസി പറഞ്ഞു. നിയമവിരുദ്ധമായ രീതിയില്‍ പെട്ടെന്ന് സമ്പന്നരാകാന്‍ വേണ്ടി യാചകര്‍ മറ്റുള്ളവരുടെ സഹതാപം ചൂഷണം ചെയ്യുകയാണെന്നും അദ്ദേഹം കൂട്ടിച്ചേര്‍ത്തു. 

വിശുദ്ധ മാസത്തില്‍ ഒരു പള്ളിക്ക് സമീപമിരുന്ന് യാചനാവൃത്തിയില്‍ ഏര്‍പ്പെട്ട വ്യക്തിയെക്കുറിച്ച് പൊതുജനം പൊലിസില്‍ അറിയിക്കുകയായിരുന്നു. സാമ്പത്തിക ബുദ്ധിമുട്ടുകള്‍ നേരിടുന്നുണ്ടെന്നും പണത്തിനാവശ്യക്കാരനാണെന്നും പറഞ്ഞായിരുന്നു ഇയാള്‍ വിശ്വാസികളില്‍ നിന്നും പണം തട്ടിയിരുന്നത്. 
പൊലിസ് പട്രോളിംഗ് സംഘം എത്തി ഇയാളെ പിടികൂടി. പൊലിസ് പിടിയിലായപ്പോഴാണ് ഇയാള്‍ നിയമവിരുദ്ധമായാണ് രാജ്യത്ത് തുടരുന്നതെന്ന് അധികൃതര്‍ തിരിച്ചറിഞ്ഞത്. പൊലിസ് പിടിയിലാകുമ്പോള്‍ ഇയാളുടെ കൈവശം 14,000 ദിര്‍ഹം ഉണ്ടായിരുന്നു. അന്വേഷണത്തില്‍ വെറും മൂന്ന് ദിവസം കൊണ്ടാണ് ഇയാള്‍ ഇത് സമ്പാദിച്ചതെന്നും കണ്ടെത്തിയിരുന്നു.

റമദാന്‍ മാസത്തിന്റെ തുടക്കത്തില്‍ ആരംഭിച്ച 'ഭിക്ഷാടനം ഒരു കുറ്റകൃത്യമാണ്, ദാനം ഒരു ഉത്തരവാദിത്തമാണ്' എന്ന ബോധവല്‍ക്കരണ കാമ്പയിനിന്റെ ഭാഗമായി ഭിക്ഷാടനം ഇല്ലാതാക്കാനുള്ള ശ്രമങ്ങള്‍ ഷാര്‍ജയില്‍ തുടരുകയാണ്. ഇതിനായുള്ള നിരന്തര ശ്രമങ്ങള്‍ തുടരുകയാണെന്ന് ഷാര്‍ജ പൊലിസിലെ ഉദ്യോഗസ്ഥനായ ബ്രിഗേഡിയര്‍ അല്‍ഷംസി പറഞ്ഞു. യാചകരെയും തെരുവ് കച്ചവടക്കാരെയും പിടികൂടുന്നതിനായി സൈനിക, സിവിലിയന്‍ പട്രോളിംഗിന്റെ സാന്നിധ്യം വര്‍ധിപ്പിക്കുന്നതും ഈ കാമ്പയിന്റെ ഭാഗമാണ്. 

യാചകരോട് പ്രതികരിക്കരുതെന്നും യാചനയുമായി ബന്ധപ്പെട്ട എന്തെങ്കിലും കേസുകള്‍ 80040 എന്ന ടോള്‍ ഫ്രീ നമ്പറിലോ 901 എന്ന കോള്‍ സെന്റര്‍ നമ്പര്‍ വഴിയോ അറിയിക്കണമെന്നും ഷാര്‍ജ പൊലിസ് അഭ്യര്‍ത്ഥിച്ചു.

Sharjah Police arrest a beggar who reportedly earned over Rs 3 lakh in just three days, uncovering an illegal begging operation in the city.