പരപ്പനങ്ങാടി: ഈവര്‍ഷം ജനുവരി മാസംമുതല്‍ ഭരണാനുമതി ലഭിച്ച പൊതുമരാമത്തു വകുപ്പിലെ പ്രവൃത്തികള്‍ നിര്‍ത്തിവെക്കാനുള്ള സര്‍ക്കാര്‍ നിര്‍ദേശം ജില്ലയുടെ തീരപ്രദേശത്തേയും മലയോര മേഖലയും  ബന്ധിപ്പിക്കുന്ന  പ്രധാനപാതയായ പരപ്പനങ്ങാടി-നാടുകാണിപ്പാതയുടെ നവീകരണ പ്രവൃത്തിയെ ബാധിക്കും.
105 കിലോമീറ്റര്‍ ദൂരമുള്ള ഈ പാതയിലെ  പ്രധാനപാലങ്ങളില്‍ ഒന്നായ പാലത്തിങ്ങല്‍ പാലത്തിന്റെ പുനര്‍നിര്‍മാണ പ്രവൃത്തി ഇതോടെ അനശ്ചിതത്വത്തിലാകും. ഒറ്റവരി പാതാപാലം ബലക്ഷയവും  ഗതാഗത കുരുക്കും കാരണം പുതുക്കിപ്പണിയാന്‍ നടപടി ക്രമങ്ങളും പൂര്‍ത്തിയാക്കിയിരുന്നു. രണ്ടു വര്‍ഷം മുമ്പു കാലപ്പഴക്കം മൂലം അപകട ഭീഷണിഉയര്‍ത്തിയതിനെത്തുടര്‍ന്ന് ഈ റെഗുലേറ്റര്‍ കംബ്രിഡ്ജ് വഴിയുള്ള ഗതാഗതം താല്‍ക്കാലികമായി നിരോധിച്ചിരുന്നു.
വാഹനങ്ങള്‍ കുണ്ടംകടവു പാലം വഴിയാണു കടത്തിവിട്ടിരുന്നത്.
ഇതിന്റെ കൈവരി ഭാഗത്തും നടപാതയിലും സ്‌ലാബ് പലതവണ ഇടിഞ്ഞു പുഴയില്‍ വീണിരുന്നു. ഈഭാഗം താല്‍ക്കാലികമായി അടക്കുകയായിരുന്നു. നാവിഗേഷന്‍ റൂട്ടിലുള്ള പാലം ഒറ്റവരി പാതയായതിനാല്‍ ഗതാഗത കുരുക്കു പതിവായിരുന്നു. ഇതുകാരണം ഒരുഭാഗത്തു നിന്നുള്ള വാഹനങ്ങള്‍ പോയതിനു ശേഷമേ മറുഭാഗത്തെ വാഹനങ്ങള്‍ക്കു പാലത്തില്‍ പ്രവേശിക്കാന്‍കഴിയുകയുള്ളൂ.
വാഹനവ്യൂഹം പാലത്തിങ്ങല്‍ അങ്ങാടിയെ വീര്‍പ്പുമുട്ടിക്കുകയാണ്.
ഇതിനു ശാശ്വത പരിഹാരത്തിനാണു മൂന്നു വരിപാതയില്‍ പുതിയ പാലംനിര്‍മിക്കുന്നതിനു ജനപ്രതിനിധിയും മന്ത്രിയുമായിരുന്ന പി.കെ.അബ്ദുറബ്ബ്  പദ്ധതി തയാറാക്കിയത്.
കിഴക്കന്‍ മേഖലകളില്‍ പ്രവൃത്തി പുരോഗമിക്കുകയും ചെയ്യുന്നതിനിടയിലാണു സര്‍ക്കാരിന്റെ ഉടക്കു വിനയായത്. 405 കോടിരൂപക്കാണു കോഴിക്കോട്ടെ ഊരാളുങ്കല്‍ ലേബര്‍ കോഓപ് സൊസൈറ്റി പ്രവൃത്തി ഏറ്റെടുത്തു നടത്തുന്നത്.