ദോഹ: ഖത്തറില്‍ പെരുന്നാളിനോട് അനുബന്ധിച്ചു സ്ഥാപിച്ച ഈദിയ എടിഎമ്മുകളില്‍ (Eidiya ATM) നിന്നും പിന്‍വലിച്ചത് 18 കോടിയോളം ഖത്തര്‍ റിയാല്‍. ചെറിയ പെരുന്നാള്‍ ആഘോഷങ്ങളുടെ ഭാഗമായി കുട്ടികള്‍ക്ക് പണം സമ്മാനമായി നല്‍കുന്നതിനാണ് ഖത്തറിന്റെ വിവിധ ഭാഗങ്ങളില്‍ ഈദിയ എടിഎമ്മുകള്‍ സ്ഥാപിച്ചത്. കുട്ടികള്‍ക്ക് പണം സമ്മാനമായി നല്‍കുന്ന പരമ്പരാഗത രീതിയെ പ്രോത്സാഹിപ്പിക്കുന്നതിനു വേണ്ടിയാണ് വിവിധ ബാങ്കുകളുമായി കൂടിച്ചേര്‍ന്നു ഖത്തര്‍ സെന്‍ട്രല്‍ ബാങ്ക് ഈദിയ എടിഎം കൗണ്ടറുകള്‍ സ്ഥാപിച്ചത്. ചെറിയ നോട്ടുകളായ 5, 10, 50, 100 റിയാലുകളാണ് ഈ എടിഎം കൗണ്ടറുകളില്‍നിന്ന് ലഭ്യമായിരുന്നത്. പെരുന്നാള്‍ ആഘോഷങ്ങള്‍ അവസാനിച്ചതോടെ ഖത്തറിലെ 10 വ്യത്യസ്ത കേന്ദ്രങ്ങളില്‍  സ്ഥാപിച്ച എടിഎം കൗണ്ടറുകള്‍ തിങ്കളാഴ്ചയോടെ നീക്കം ചെയ്തു.
കഴിഞ്ഞ വര്‍ഷത്തേതില്‍ നിന്നും ഗണ്യമായ വര്‍ധനവ് ഈ വര്‍ഷത്തെ എടിഎം കൗണ്ടറുകള്‍ പിന്‍വലിക്കലില്‍ ഉണ്ടായിട്ടുണ്ടെന്നാണ് കണക്കുകള്‍ സൂചിപ്പിക്കുന്നത്. വിവിധ മാളുകളിലും പ്രധാനപ്പെട്ട കേന്ദ്രങ്ങളിലുമാണ് ഈദിയ എടിഎം കൗണ്ടറുകള്‍ സ്ഥാപിച്ചിരുന്നത്.

Qatar Central Bank announces closure of Eidiya ATMs, withdrawals exceeded QR182mn