ഫുജൈറ: ദുബൈ കിരീടാവകാശിയും യു.എ.ഇ ഉപ പ്രധാനമന്ത്രിയും പ്രതിരോധ മന്ത്രിയുമായ ശൈഖ് ഹംദാന്‍ ബിന്‍ മുഹമ്മദ് റാശിദ് ആല്‍ മക്തൂമിന്റെ രണ്ടു ദിവസത്തെ ഇന്ത്യ സന്ദര്‍ശനത്തെ യു.എ.ഇയിലെ പ്രവാസി ഇന്ത്യക്കാര്‍ ഏറെ പ്രതീക്ഷയോടെയാണ് നോക്കിക്കാണുന്നതെന്ന് യു.എ.ഇ കെ.എം.സി.സി നാഷണല്‍ കമ്മിറ്റി പ്രസിഡന്റ് ഡോ. പുത്തൂര്‍ റഹ്മാന്‍ അഭിപ്രായപ്പെട്ടു.

ഏറ്റവും അധികം ഇന്ത്യക്കാര്‍ അധിവസിക്കുന്നതും സ്വദേശി ഇന്ത്യക്കാരുടെ സ്വപ്‌ന ഭൂമികയുമായ ദുബൈയുടെ ഭാവി ഭരണാധികാരിയുടെ ഇന്ത്യയിലേക്കുള്ള യാത്ര വളരെ പ്രാധാന്യമേറിയതാണെന്നും, രാജ്യത്തിന്റെ പ്രധാനമന്ത്രിയുടെ ഔദ്യോഗിക ക്ഷണത്തെ തുടര്‍ന്നാണ് ഈ സന്ദര്‍ശനം എന്നതും പ്രധാനമാണെന്നും അദ്ദേഹം പറഞ്ഞു. 

ദുബൈ വളരെ തന്ത്രപ്രധാനമായ കുടിയേറ്റ മേഖലയാണ് ഇന്ത്യക്കാര്‍ക്ക്. അതുപോലെത്തന്നെ ദുബൈ കിരീടാവകാശിയായി ചുമതലയേറ്റ ശേഷം ശൈഖ് ഹംദാന്റെ പ്രഥമ ഇന്ത്യാ സന്ദര്‍ശനവുമാണിത്. വിവിധ തന്ത്രപ്രധാന മേഖലകളിലെ ഉഭയ കക്ഷി സഹകരണം വര്‍ധിപ്പിക്കുന്നതിനും പങ്കാളിത്തം ശക്തിപ്പെടുത്തുന്നതിനുമുള്ള വഴികള്‍ തുറക്കുന്നതിന് ദുബൈ കിരീടാവകാശിയുടെ നേരിട്ടുള്ള കൂടിക്കാഴ്ചകള്‍ ഉപകരിക്കും. സാധാരണ വിദേശ രാജ്യങ്ങളില്‍ നിന്നുള്ള ഭരണാധികാരികള്‍ ഇന്ത്യയില്‍ എത്തുമ്പോള്‍ പ്രധാനമന്ത്രിയോ മുതിര്‍ന്ന മന്ത്രിമാരോ ആണ് സ്വീകരിക്കാനെത്താറ്. ദുബൈയുടെ പ്രാധാന്യവും ഈ സന്ദര്‍ശനത്തിന്റെ പ്രാമുഖ്യവും കണക്കിലെടുത്താല്‍, പ്രധാനമന്ത്രി നേരത്തെ നേരിട്ടെത്തി സ്വീകരിച്ചിട്ടുള്ള നയതന്ത്ര പ്രതിനിധികളുമായി താരതമ്യം ചെയ്യുമ്പോള്‍ ശൈഖ് ഹംദാനെ അദ്ദേഹം തന്നെയായിരുന്നു സ്വീകരിക്കേണ്ടത് എന്നാണ് വ്യക്തിപരമായ വിചാരം. ഇന്നു നടന്ന സ്വീകരണം വേണ്ടതു പോലെ ഉചിതമായില്ല എന്നതില്‍ ഖേദം രേഖപ്പെടുത്തുന്നുവെന്നും പുത്തൂര്‍ പ്രസ്താവിച്ചു. 

പ്രധാനമന്ത്രിയുടെ വിരുന്നിലും വിദേശ കാര്യ മന്ത്രി ഡോ. എസ്. ജയ്ശങ്കര്‍, പ്രതിരോധ മന്ത്രി രാജ്‌നാഥ് സിങ് എന്നിവരുമായുള്ള കൂടിക്കാഴ്ചകളിലും പങ്കെടുക്കുന്ന ശൈഖ് ഹംദാന്റെ ഈ സന്ദര്‍ശനം പുതിയ കരാറുകള്‍ക്കും പ്രവാസി ഇന്ത്യക്കാര്‍ക്കും ഇന്ത്യയുടെ വിദേശ ബന്ധങ്ങള്‍ക്കും സമ്പദ് വ്യവസ്ഥക്കും മുതല്‍ക്കൂട്ടാവട്ടെ എന്നു തന്നെ പ്രതീക്ഷിക്കാമെന്നും പ്രസ്താവനയില്‍ കൂട്ടിച്ചേര്‍ത്തു.

Sheikh Hamdan's visit to India is full of expectations: Dr. Puttur Rahman