കൊച്ചി: കേരളത്തിലെ കുരുമുളക് കൃഷിക്കാർക്ക് സന്തോഷ വാർത്ത. ഒൻപത് വർഷത്തിനുശേഷം കുരുമുളക് വീണ്ടും കിലോയ്ക്ക് 700 രൂപ കടന്നിരിക്കുകയാണ്. കർഷകർക്ക് ഇത് ആശ്വാസം പകർന്നിരിക്കുകയാണ്. കൊച്ചിയിലെ വിപണിയിൽ കുരുമുളക് വില 720 രൂപയിലേക്ക് എത്തുകയും മാർച്ചിൽ മാത്രം കിലോയ്ക്ക് 48 രൂപയുടെ വർധനയും രേഖപ്പെടുത്തുകയുമാണ് ചെയ്തിരിക്കുന്നത്.

വിപണിയിലേക്ക് എത്തുന്ന കുരുമുളകിന്റെ അളവിൽ കുറവുണ്ടായതും, ഉൽപാദനത്തിൽ ഏകദേശം 10% ഇടിവുണ്ടായതുമാണ് വിലക്കയറ്റത്തിന് പ്രധാന കാരണമെന്നാണ് വിവരങ്ങൾ. 2016ലായിരുന്നു അവസാനമായി കുരുമുളക് വില 750 രൂപ കടന്നത്. അതിന് ശേഷം വില ഇടിഞ്ഞതോടെ കർഷകർ വലിയ നഷ്ടമാണ് അനുഭവിച്ചത്.

വയനാടൻ കുരുമുളക് 720 രൂപയിലേക്ക്

ഇക്കഴിഞ്ഞ തിങ്കളാഴ്ച വയനാട്ടിലെ ഉന്നത നിലവാരമുള്ള കുരുമുളകിന് കിലോയ്ക്ക് 720 രൂപ വരെ ലഭിച്ചു. ഒരു ക്വിൻ്റലിന് മാത്രം ഒരു ആഴ്ചക്കിടെ 2600 രൂപയുടെ വർധനയാണ് വന്നത്. കർണാടകത്തിലെ കയറ്റുമതി നിലവാരമുള്ള കുരുമുളകിന് തികച്ചും പ്രതീക്ഷിക്കപ്പെടാത്ത രീതിയിൽ കിലോയ്ക്ക് 800 രൂപ വരെ വില ലഭിച്ചെന്ന റിപ്പോർട്ടുമുണ്ട്.

ഉത്പാദനത്തിൽ വലിയ ഇടിവ്

കേന്ദ്ര കൃഷി സഹമന്ത്രി രാംനാഥ് താക്കൂറാണ് കേരളത്തിലെ കുരുമുളക് ഉത്പാദനത്തിൽ 8 മുതൽ 10 ശതമാനം വരെ ഇടിവുണ്ടായെന്ന് ലോക്സഭയിൽ വ്യക്തമാക്കിയത്. എംപി അബ്ദുസമദ് സമദാനിയുടേതായ ചോദ്യത്തിന് മറുപടി നല്‍കിയതിലായിരുന്നു ഈ പരാമർശം.

2023-24ൽ കേരളത്തിൽ 72,669 ഹെക്ടറിൽ കുരുമുളക് കൃഷി നടക്കുന്നു. അതേസമയം, 2014-15ൽ ഇത് 85,431 ഹെക്ടറായിരുന്നു. ഉൽപാദനത്തിൽ 25% വരെ ഇടിവുണ്ടായിട്ടുണ്ട് — 2014-15ൽ 41,000 ടൺ ഉൽപാദനം ഉണ്ടായിരുന്നപ്പോൾ, ഇപ്പോൾ 30,798 ടൺ മാത്രമാണ് ഉൽപാദിപ്പിച്ചത്.

മേഖലകൾ

കേരളത്തിൽ പ്രധാനമായി വയനാട്, ഇടുക്കി ജില്ലകളിലാണ് കുരുമുളക് കൃഷി നടത്തുന്നത്. ഇന്ത്യയിൽ ഏറ്റവും കൂടുതൽ കുരുമുളക് ഉൽപാദിപ്പിക്കുന്നത് കർണാടകയാണ്, പിന്നാലെ കേരളം, തമിഴ്നാട് എന്നിവിടങ്ങളുമാണ്.

Kochi Pepper prices have surged to their highest point in nine years crossing 700 per kg with high-grade Wayanad pepper touching 720 A sharp drop in production  nearly 10  has led to the spike In Karnataka export-quality pepper fetched up to 800kg Farmers who faced years of low returns are finally seeing signs of recovery in the spice market