കൊച്ചി: എറണാകുളം ജില്ലാ കോടതി വളപ്പിൽ അഭിഭാഷകരും എസ്എഫ്ഐ പ്രവർത്തകരും തമ്മിൽ ഉണ്ടായ സംഘർഷത്തിൽ 16 എസ്എഫ്ഐ പ്രവർത്തകർക്കും 8 അഭിഭാഷകർക്കും പരിക്കേറ്റു. ജില്ലാ ബാർ അസോസിയേഷന്റെ വാർഷികാഘോഷത്തിനിടെ ഇന്നലെ അർധരാത്രിയോടെയാണ് സംഭവം. സംഘർഷം നിയന്ത്രിക്കാൻ ശ്രമിച്ച പൊലീസുകാർക്കും പരിക്കേറ്റതായി റിപ്പോർട്ട്.

ബാർ അസോസിയേഷന്റെ പരിപാടിക്കിടെ എസ്എഫ്ഐ പ്രവർത്തകർ അനധികൃതമായി കടന്നുകയറി പ്രകോപനം സൃഷ്ടിച്ചുവെന്നാണ് അഭിഭാഷകർ ആരോപിക്കുന്നത്. എന്നാൽ, മദ്യപിച്ച അഭിഭാഷകർ വിദ്യാർഥിനികൾ ഉൾപ്പെടെയുള്ളവരോട് മോശമായി പെരുമാറിയതാണ് സംഘർഷത്തിന് കാരണമെന്ന് എസ്എഫ്ഐ പ്രതികരിച്ചു.

സംഘർഷം ജില്ലാ കോടതി വളപ്പിൽ നിന്ന് മഹാരാജാസ് കോളേജ് പരിസരത്തേക്കും വ്യാപിച്ചു. പരിക്കേറ്റവരെ എറണാകുളം ജനറൽ ആശുപത്രിയിലും സ്വകാര്യ ആശുപത്രികളിലും പ്രവേശിപ്പിച്ചു. പൊലീസ് കേസെടുത്ത് അന്വേഷണം ആരംഭിച്ചിട്ടുണ്ട്.