ജയ്പൂർ: ഐപിഎല്ലിൽ ലഖ്നൗ സൂപ്പർ ജയന്റ്സിനോട് രാജസ്ഥാൻ റോയൽസ് രണ്ട് റൺസിന്‌ പരാജയപ്പെട്ടിരുന്നു. മത്സരത്തിൽ ആദ്യം ബാറ്റ് ചെയ്ത ലഖ്‌നൗ അഞ്ചു വിക്കറ്റ് നഷ്ടത്തിൽ 180 റൺസാണ് നേടിയത്. വിജയലക്ഷ്യം പിന്തുടർന്ന രാജസ്ഥാൻ ഇന്നിംഗ്സ് 20 ഓവറിൽ അഞ്ചു വിക്കറ്റ് നഷ്ടത്തിൽ 178 റൺസിൽ അവസാനിക്കുകയായിരുന്നു. 

മത്സരം പരാജയപ്പെട്ടെങ്കിലും യുവതാരം വൈഭവ് സൂര്യവംശി നടത്തിയ പ്രകടനങ്ങളാണ്‌ ഏറെ ശ്രദ്ധേയമായത്.  മത്സരത്തിൽ നേരിട്ട ആദ്യ പന്ത് തന്നെ സിക്സർ പറത്തിയാണ് ഈ 14കാരൻ വരവറിയിച്ചത്. ഇതോടെ ഐപിഎൽ ചരിത്രത്തിൽ സിക്സർ നേടുന്ന ഏറ്റവും പ്രായം കുറഞ്ഞ താരമായി മാറാനും വൈഭവിന് സാധിച്ചു. മത്സരത്തിൽ രാജസ്ഥാന്റെ ക്യാപ്റ്റനായ റിയാൻ പരാഗിന്റെ റെക്കോർഡാണ് വൈഭവ് തകർത്തത്. തന്റെ 17ാം വയസിലാണ് പരാഗ് ഐപിഎല്ലിൽ ആദ്യ സിക്സർ നേടിയത്. മത്സരത്തിൽ 20 പന്തിൽ 34 റൺസാണ് വൈഭവ് അടിച്ചെടുത്തത്. മൂന്ന് ഫോറുകളും രണ്ട് സിക്സുകളും അടങ്ങുന്നതായിരുന്നു താരത്തിന്റെ ഇന്നിംഗ്സ്. 

മത്സരത്തിൽ രാജസ്ഥനായി കളത്തിൽ ഇറങ്ങിയതോടെ ഐപിഎല്ലിൽ അരങ്ങേറ്റം കുറിക്കുന്ന ഏറ്റവും പ്രായം കുറഞ്ഞ താരമായും വൈഭവ് മാറി. പരുക്കേറ്റ രാജസ്ഥാൻ നായകൻ സഞ്ജു സാംസണിന് പകരക്കാരനായാണ് വൈഭവ് കളത്തിൽ ഇറങ്ങിയത്. ലേലത്തിൽ 1.10 കോടി രൂപക്കായിരുന്നു ഈ 14കാരനെ രാജസ്ഥാൻ സ്വന്തമാക്കിയത്. വരും മത്സരങ്ങളിലും താരത്തിന്റെ ഈ മിന്നും പ്രകടനം കാണാൻ സാധിക്കുമെന്നാണ് പ്രതീക്ഷിക്കുന്നത്. 

നിലവിൽ ഐപിഎൽ പോയിന്റ് പട്ടികയിൽ എട്ടാം സ്ഥാനത്താണ് രാജസ്ഥാൻ റോയൽസ്. എട്ട് മത്സരങ്ങളിൽ നിന്നും രണ്ട് ജയവും ആറ് തോൽവിയും അടക്കം നാല് രാജസ്ഥാന്റെ അക്കൗണ്ടിൽ ഉള്ളത്. ഏപ്രിൽ 24ന് റോയൽ ചലഞ്ചേഴ്‌സ് ബെംഗളൂരുവിനെതിരെയാണ് രാജസ്ഥാന്റെ അടുത്ത മത്സരം. ആർസിബിയുടെ തട്ടകമായ ചിന്നസ്വാമി സ്റ്റേഡിയത്തിലാണ് മത്സരം നടക്കുന്നത്. പ്ലേ ഓഫ് സാധ്യതകൾ നിലനിർത്തണമെങ്കിൽ വരും മത്സരങ്ങളിൽ രാജസ്ഥാന് മികച്ച പ്രകടനങ്ങൾ തന്നെ പുറത്തെടുക്കേണ്ടി വരും. 

Vaibhav Suryavanshi create a historical record in Indian premiere league history