പൂച്ചാക്കല്‍: പതിനേഴുവര്‍ഷമായി കിടപ്പിലായ ഗീതക്ക് ഇത്തവണത്തെ ഓണം ആഘോഷിക്കാന്‍ കൈത്താങ്ങായി ഒരുകൂട്ടം ചെറുപ്പക്കാരെത്തി. ഓണക്കോടി കെകമാറിയ ഇവര്‍ സദ്യ ഒരുക്കുന്നതിനുള്ള സാധനസാമഗ്രികളുമായാണ് കായംകുളത്ത് നിന്നും എത്തിയത്. നിത്യജീവിതം കൂട്ടിമുട്ടിക്കാന്‍ പ്രയാസപ്പെടുന്ന ഓട്ടോറിക്ഷഡ്രൈവര്‍മാരാണ് തങ്ങളുടെ അദ്ധ്വാനത്തിന്റെ ഒരു പങ്കുമായി 90 കിലോമീറ്ററോളം സഞ്ചരിച്ച് കായംകുളത്ത് നിന്നും പാണാവള്ളിയിലെത്തിയത്.
പാരാപ്ലീഡിയ എന്ന അസുഖം ബാധിച്ച് 17 വര്‍ഷമായി കിടപ്പിലാണ് പാണാവള്ളി ഗ്രാമപഞ്ചായത്ത് 9ാം വാര്‍ഡ് കൊട്ടാരച്ചിറവീട്ടില്‍ ഗീത. ഇവര്‍ക്ക് സഹായമായി എത്താന്‍ കായംകുളത്തെ ഓട്ടോറിക്ഷത്തൊഴിലാളികളുടെ കൂട്ടായ്മയായ അധ്വാന വിഹിത ജീവകാരുണ്യ പ്രവര്‍ത്തന ഫണ്ട് എന്ന പേരിലറിയപ്പെടുന്ന സംഘം എത്തിയത് തികച്ചും യാദൃശ്ചികമായാണ്.റേഡിയോയില്‍ കൂട്ടായ്മയെക്കുറിച്ച് ചിത്രീകരിച്ച പരിപാടിയുടെ ഭാഗമായി ഇവര്‍ക്ക് 2500 രൂപ പ്രതിഫലം ലഭിച്ചു. ഈ തുകയും ജീവകാരുണ്യപ്രവര്‍ത്തനത്തിന് വിനിയോഗിക്കാനായിരുന്നു കൂട്ടായമയുടെ തീരുമാനം. 17 വര്‍ഷമായി റേഡിയോയിലൂടെ മാത്രം പുറം ലോകത്തെക്കുറിച്ചറിയുന്ന ഗീതക്ക് ആ സഹായം നല്‍കാന്‍ ധാരണയായി. ഇതനുസരിച്ചാണ് പണത്തിനൊപ്പം ഓണക്കോടിയും, പലചരക്ക്പച്ചക്കറി ഉള്‍പ്പടെയുള്ള സാധനങ്ങളുമായി ആറംഗസംഘം എത്തിയത്.
പത്താംക്ലാസ്സ് വരെ നടന്ന്‌പോയി പഠിച്ച ഗീത ക്രമേണ അസുഖത്തിന് കീഴ്‌പ്പെട്ട് തീര്‍ത്തും കിടപ്പിലാകുകയായിരുന്നു. ഈ വിവരങ്ങളും ചികിത്സാകാര്യങ്ങളും ചോദിച്ചറിഞ്ഞ ഓട്ടോറിക്ഷ തൊഴിലാളി സംഘം അരമണിക്കൂറോളം ചിലവിട്ടശേഷമാണ് മടങ്ങിയത്. ഗീതയുടെ അമ്മ മാധവിയോടും ഇവര്‍ കാര്യങ്ങള്‍ അന്വേഷിച്ചു. കൂട്ടായ്മയുടെ രക്ഷാധികാരിയും മോട്ടാര്‍ വാഹന വകുപ്പ് കുന്നത്തൂര്‍ ഓഫീസിലെ എം.വി.ഐ.യുമായ എം.ജി.മനോജ്, സംഘടന പ്രസിഡന്റ് ബ്രഹ്മകുമാര്‍, വൈസ് പ്രസിഡന്റ് സന്തോഷ്‌കുമാര്‍, സെ്ക്രട്ടറി നിസാം, ട്രഷറര്‍ ഷിജാര്‍, എക്‌സിക്യൂട്ടിവ് മെമ്പര്‍ അബ്ദുള്‍ നാസര്‍ തുടങ്ങിയവരാണ് ഗീതയുടെ വീട്ടിലെത്തിയത്.
സാധനസാമഗ്രികള്‍ കൈമാറിയ സംഘം ഗീതക്ക് ആവശ്യമായ കട്ടിലും കിടക്കയും കൂടി ഉടന്‍നല്‍കാമെന്നേറ്റു. 2013ല്‍ രൂപവത്കരിച്ച ഈ കൂട്ടായ്മ നിത്യേന തങ്ങളുടെ അധ്വാനഫലത്തിന്റെ ഒരംശം സ്വരൂപിക്കുന്നതിനൊപ്പം സുമനസ്സുകളുടെ സഹായം കൂടി തേടിയാണ് പ്രവര്‍ത്തിക്കുന്നത്. ഇത്തരത്തില്‍ സ്വരൂപിച്ച പണം ഉപോഗിച്ച് മൂന്ന് കൊല്ലത്തിനിടെ 20 ലക്ഷം രൂപയുടെ സഹായങ്ങള്‍ ഇവര്‍ വിതരണം ചെയ്ത് കഴിഞ്ഞു.