കൊച്ചി: മയക്കുമരുന്ന് ഇടപാടുകളില്‍ സ്ത്രീകളുടെ സാന്നധ്യം വര്‍ധിക്കുന്നതായുള്ള വിവരത്തിന്റെ അടിസ്ഥാനത്തില്‍ നിരീക്ഷണം കൂടുതല്‍ ശക്തമാക്കാന്‍ ഒരുങ്ങി എക്‌സൈസ്. മയക്കുമരുന്ന് കേസുകളില്‍ ആവര്‍ത്തിച്ച് പ്രതികളാകുന്ന 16 സ്ത്രീകള്‍ എക്‌സൈസിന്റെ നിരീക്ഷണത്തിലാണ്. അബ്കാരി, എന്‍ഡിപിഎസ് ആക്റ്റുകള്‍ പ്രകാരം സ്ഥിരം കുറ്റവാളികള്‍ക്കെതിരായ നടപടിയുടെ ഭാഗമായി ഇവരെ സൂക്ഷ്മാമയി നിരീക്ഷിച്ചു വരികയാണ്.

ഒന്നിലധികം തവണ എന്‍ഡിപിഎസ് നിയമ ലംഘനങ്ങള്‍ നടത്തിയ 497 പേരാണ് സംസ്ഥാനത്തുള്ളത്. ഇവരില്‍ 16 പേര്‍ സ്ത്രീകളാണ്. ഇവരില്‍ ഓരോരുത്തരും 2 മുതല്‍ 11 വരെ മയക്കുമരുന്ന് കേസുകളില്‍ പ്രതികളാക്കപ്പെട്ടവരാണ്.

പാലക്കാട് സ്വദേശിനി കവിതയാണ് പട്ടികയില്‍ മുന്‍പന്തിയില്‍. 11 എന്‍ഡിപിഎസ് കേസുകളിലാണ് ഇവര്‍ കുറ്റകാരിയായിട്ടുള്ളത്. ഒമ്പതു കേസുകളുമായി കാസര്‍കോട് സ്വദേശിനി കൃതിയും ആറു കേസുകളുമായി പാലക്കാട് സ്വദേശിനിയായ സുമിത്രയുമാണ് യഥാക്രമം രണ്ടും മൂന്നും സ്ഥാനത്ത്.

കൊല്ലത്തു നിന്ന് ആറുപേരും പാലക്കാട് നിന്ന് മൂന്നു പേരും കോട്ടയം, തൃശൂര്‍ എന്നിവിടങ്ങളില്‍ നിന്ന് രണ്ടു പേരും കണ്ണൂര്‍, കാസര്‍കോട്, കോഴിക്കോട് എന്നിവിടങ്ങളില്‍ നിന്നുള്ള ഓരോകുത്തരും പട്ടികയില്‍ ഉണ്ട്.

കഞ്ചാവ്, സിന്തറ്റിക് മയക്കുമരുന്ന് എന്നിവയുമായി പതിവായി പിടിക്കപ്പെടുന്നവരെ കുറച്ചു കാലമായി നിരീക്ഷിക്കുന്നതായി ഒരു എക്‌സൈസ് ഉദ്യോഗസ്ഥന്‍ പറഞ്ഞു. ഇത്തരം കേസുകളില്‍ ഉള്‍പ്പെടുന്ന സ്ത്രീകളുടെ എണ്ണം താരതമ്യേന കുറവാണെന്നും എന്നാല്‍ പല ലഹരി മാഫിയ സംഘങ്ങളും സ്ത്രീകളെ കാരിയറായി ഉപയോഗിക്കുന്നുണ്ടെന്നും ഇദ്ദേഹം പറഞ്ഞു.