ന്യൂഡൽഹി: അഹമ്മദാബാദ് വിമാന ദുരന്തത്തിന്റെ ആഘാതത്തിൽ രാജ്യം നിൽക്കുമ്പോൾ ഓഫീസിനുള്ളിൽ പാർട്ടി നടത്തിയ നാല് മുതിർന്ന ജീവനക്കാരെ പുറത്താക്കി എയർ ഇന്ത്യ. എയർ ഇന്ത്യയുടെ വിമാനത്താവള ഗേറ്റ്‌വേ സേവന ദാതാവായ AISATS ലെ നാല് മുതിർന്ന ജീവനക്കാരോട് കമ്പനി രാജിവെക്കാൻ നിർദേശിച്ചു. വിമാനാപകടം നടന്ന് ദിവസങ്ങൾക്കുള്ളിൽ നടന്ന ആഘോഷത്തിന്റെ ദൃശ്യങ്ങൾ സാമൂഹമാധ്യമങ്ങളിൽ പ്രചരിച്ചതിന് പിന്നാലെയാണ് നടപടി.

അഹമ്മദാബാദിൽ 259 പേരുടെ മരണത്തിനിടയാക്കിയ എയർ ഇന്ത്യ ബോയിംഗ് 787-8 ഡ്രീംലൈനർ അപകടമുണ്ടായി ഏതാനും ദിവസങ്ങൾക്ക് ഉള്ളിലാണ് ഗുരുഗ്രാമിലെ എഐഎസ്എടിഎസിന്റെ ഓഫീസിൽ പാർട്ടി സംഘടിപ്പിച്ചത്. ജൂൺ 20 നായിരുന്നു പാർട്ടി നടന്നത്. ടാറ്റ ഗ്രൂപ്പിന്റെ ഭാഗമായ എയർ ഇന്ത്യ ലിമിറ്റഡും ഗേറ്റ്‌വേ സേവനങ്ങളിലും ഭക്ഷ്യ സേവനങ്ങളിലും പങ്കാളിയായ സാറ്റ്സ് (SATS) ലിമിറ്റഡും തമ്മിലുള്ള 50-50 സംയുക്ത സംരംഭമാണ് എഐസാറ്റ്സ് (AISATS). ഇതിന്റെ ഓഫീസിലാണ് പാർട്ടി നടന്നത്. 

സംഭവത്തിൽ മുതിർന്ന നാല് ഉദ്യോഗസ്ഥരെ പുറത്താക്കിയതിന് പുറമെ ഏതാനും പേർക്ക് മുന്നറിയിപ്പും നൽകിയിട്ടുണ്ട്. വിമാനപകടത്തിൽപെട്ട് പ്രിയപ്പെട്ടവരുടെ നഷ്ടത്തിൽ ദുരിതമനുഭവിക്കുന്ന കുടുംബങ്ങളോട് കമ്പനി ഐക്യദാർഢ്യം പ്രഖ്യാപിക്കുന്നുവെന്നും അനുയോജ്യമല്ലാത്ത സമയത്ത് നടന്ന ആഘോഷങ്ങൾക്ക് ഖേദം പ്രകടിപ്പിക്കുന്നുവെന്നും എഐസാറ്റ്സ് വക്താവ് പറഞ്ഞു. 

ALSO READ: സംസ്ഥാനത്ത് ഗർഭഛിദ്രം നടത്തുന്നവരുടെ എണ്ണത്തിൽ വൻവർധന; കൂടുതലും നടക്കുന്നത് സ്വകാര്യ ആശുപത്രികളിൽ

ഈ പെരുമാറ്റം ഞങ്ങളുടെ മൂല്യങ്ങളുമായി പൊരുത്തപ്പെടുന്നില്ല. സഹാനുഭൂതി, പ്രൊഫഷണലിസം, ഉത്തരവാദിത്തം എന്നിവയോടുള്ള ഞങ്ങളുടെ പ്രതിബദ്ധത ഞങ്ങൾ വീണ്ടും ഉറപ്പാക്കുന്നു, ഉത്തരവാദിത്തപ്പെട്ടവർക്കെതിരെ ഉറച്ച അച്ചടക്ക നടപടി സ്വീകരിച്ചിട്ടുണ്ട് - വക്താവ് വ്യക്തമാക്കി.

ജൂൺ 12 ന് ലണ്ടനിലേക്ക് പോകുകയായിരുന്ന ബോയിംഗ് ഡ്രീംലൈനർ വിമാനം പറന്നുയർന്ന് നിമിഷങ്ങൾക്കുള്ളിലാണ് തകർന്ന് വീണ് ദുരന്തമുണ്ടായത്. വിമാനത്താവള പരിധിക്കപ്പുറത്തുള്ള മേഘാനി നഗറിലെ ബിജെ മെഡിക്കൽ കോളേജിന്റെ ഒരു റെസിഡൻഷ്യൽ കാമ്പസിലേക്ക് വിമാനം ഇടിച്ചുകയറി. വിമാനത്തിലുണ്ടായിരുന്ന 242 പേരിൽ 11 എ സീറ്റിൽ ഇരുന്നിരുന്ന ഇന്ത്യൻ വംശജനായ ബ്രിട്ടീഷ് പൗരൻ മാത്രമാണ് രക്ഷപ്പെട്ടത്. വിമാനത്തിലെ 241 പേർക്കൊപ്പം മെഡിക്കൽ കോളേജ് വിദ്യാർഥികൾ ഉൾപ്പടെ 259 പേരാണ് ആകെ മരിച്ചത്. 60 ലേറെ പേർക്ക് പരുക്കേറ്റു.