ദുബൈ: ദുബൈ എഐ വീക്കിന് പ്രൗഢഗംഭീരമായ തുടക്കം. വിവിധ മേഖലകളിലെ അവിഭാജ്യ ഘടകമായി എഐ മാറിയെന്ന് ദുബൈ കിരീടാവകാശിയും യുഎഇ ഉപപ്രധാനമന്ത്രിയും പ്രതിരോധ മന്ത്രിയുമായ ദുബൈ ഫ്യൂച്ചര്‍ ഫൗണ്ടേഷന്റെ ബോര്‍ഡ് ഓഫ് ട്രസ്റ്റീസ് ചെയര്‍മാനുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം.  

യുഎഇ വൈസ് പ്രസിഡന്റും പ്രധാനമന്ത്രിയും ദുബൈ ഭരണാധികാരിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂമിന്റെ നേതൃത്വത്തില്‍, എഐയുടെ പരിവര്‍ത്തന സാധ്യതകള്‍ ആദ്യമായി തിരിച്ചറിഞ്ഞ എമിറേറ്റുകളില്‍ ഒന്നായിരുന്നു ദുബൈ എന്ന് ഷെയ്ഖ് ഹംദാന്‍ പറഞ്ഞു. ഇന്ന്, എഐ വിദഗ്ധര്‍, ഡെവലപ്പര്‍മാര്‍ എന്നിവരുടെ ഒരു ആഗോള കേന്ദ്രമായി ദുബൈ പ്രവര്‍ത്തിക്കുന്നു എന്നും അദ്ദേഹം കൂട്ടിച്ചേര്‍ത്തു.

ദുബൈ എഐ വാരത്തിന്റെ ഭാഗമായി 2025 ഏപ്രില്‍ 21 മുതല്‍ 25 വരെ നടക്കുന്ന 'ദുബൈ അസംബ്ലി ഫോര്‍ എഐ'യുടെ വിവിധ പ്രവര്‍ത്തനങ്ങള്‍ സന്ദര്‍ശിക്കുന്നതിനിടെയാണ് അദ്ദേഹത്തിന്റെ പരാമര്‍ശം. എഐയുടെ ഭാവി പര്യവേക്ഷണം ചെയ്യുന്നതിനായി വ്യവസായ പ്രമുഖരും ആഗോള ടെക് കമ്പനികളില്‍ നിന്നുള്ള മുതിര്‍ന്ന ഉദ്യോഗസ്ഥരും അസംബ്ലിയില്‍ പങ്കെടുക്കുന്നുണ്ട്.

'ഇത് കൃത്രിമബുദ്ധിയുടെ യുഗമാണ്, ആഗോള സഹകരണമാണ് അതിന്റെ നേട്ടങ്ങള്‍ പരമാവധിയാക്കുന്നതിനും സമൂഹങ്ങളില്‍ അതിന്റെ പോസിറ്റീവ് സ്വാധീനം വികസിപ്പിക്കുന്നതിനുമുള്ള ഏറ്റവും ഫലപ്രദമായ മാര്‍ഗം. ഈ സാങ്കേതികവിദ്യയുടെ പുതിയ അതിര്‍ത്തികള്‍ പര്യവേക്ഷണം ചെയ്യുന്നതിനും വളര്‍ച്ചയെ മുന്നോട്ട് നയിക്കുന്നതിനും ജീവിത നിലവാരം ഉയര്‍ത്തുന്നതിനുമായി ലോകമെമ്പാടുമുള്ള എഐ വിദഗ്ധരെ സ്വാഗതം ചെയ്യുന്നതില്‍ ദുബൈ അഭിമാനിക്കുന്നു,' അദ്ദേഹം കൂട്ടിച്ചേര്‍ത്തു.

അസംബ്ലി സന്ദര്‍ശന വേളയില്‍, മെറ്റാ, ടെസ്‌ലസ്യൂട്ട് എന്നിവയുള്‍പ്പെടെ പ്രമുഖ ആഗോള ടെക് കമ്പനികള്‍ അവതരിപ്പിച്ച അത്യാധുനിക എഐ സാങ്കേതികവിദ്യകളും ലോകമെമ്പാടുമുള്ള രാജ്യങ്ങളെ പ്രതിനിധീകരിക്കുന്ന 60 സ്റ്റാര്‍ട്ടപ്പുകളില്‍ നിന്നുള്ള നൂതന ആശയങ്ങളും പദ്ധതികളും ഷെയ്ഖ് ഹംദാന്‍ അവലോകനം ചെയ്തു.

'ദുബൈ അസംബ്ലി ഫോര്‍ എഐ'യിലും ദുബൈ എഐ വീക്ക് 2025ന്റെ ആദ്യ ദിനത്തിലും ഷെയ്ഖ് മുഹമ്മദ് ബിന്‍ റാഷിദ് ബിന്‍ മുഹമ്മദ് ബിന്‍ റാഷിദ് അല്‍ മക്തൂമും യുഎഇ കാബിനറ്റ് കാര്യ മന്ത്രിയും ട്രസ്റ്റീസ് ബോര്‍ഡ് വൈസ് ചെയര്‍മാനും ദുബൈ ഫ്യൂച്ചര്‍ ഫൗണ്ടേഷന്റെ മാനേജിംഗ് ഡയറക്ടറുമായ മുഹമ്മദ് ബിന്‍ അബ്ദുല്ല അല്‍ ഗെര്‍ഗാവിയും യുഎഇ ആര്‍ട്ടിഫിഷ്യല്‍ ഇന്റലിജന്‍സ്, ഡിജിറ്റല്‍ ഇക്കണോമി, റിമോട്ട് വര്‍ക്ക് ആപ്ലിക്കേഷന്‍സ് സഹമന്ത്രിയും ദുബൈ ഫ്യൂച്ചര്‍ ഫൗണ്ടേഷന്റെ ഡെപ്യൂട്ടി മാനേജിംഗ് ഡയറക്ടറുമായ ഒമര്‍ സുല്‍ത്താന്‍ അല്‍ ഒലാമയും നിരവധി മുതിര്‍ന്ന ഉദ്യോഗസ്ഥരും പങ്കെടുത്തിരുന്നു.

Dubai AI Week begins with a bold vision—positioning artificial intelligence at the core of the city’s future. Experts, innovators, and leaders gather to shape the AI-driven tomorrow.