തിരുവനന്തപുരം: പള്ളിച്ചൽ മുക്കം പാലമൂട്ടിലെ ലൈസൻസുള്ള ഒരു തടി മില്ലിൽ പുലർച്ചെ ഉണ്ടായ തീപിടിത്തത്തിൽ ഏകദേശം 15 ലക്ഷം രൂപയുടെ നാശനഷ്ടമുണ്ടായി. ഇന്ന് പുലർച്ചെ 2.15ഓടെയായിരുന്നു സംഭവം.  തീ‌ പടർന്നു കയറുന്നത് ആദ്യം കണ്ടത് അയൽവാസികളാണ്. ഉടനെ ഫയർഫോഴ്‌സിനെ വിവരമറിയിക്കുകയും ചെയ്തു.

കാട്ടാക്കടയിലും നെയ്യാറ്റിൻകരയിലും നിന്നുമുള്ള രണ്ട് യൂണിറ്റുകൾ സ്ഥലത്തെത്തി തീ അണയ്ക്കാൻ ശ്രമിച്ചു. നാല് മണിക്കൂർ നീണ്ട ശ്രമത്തിനൊടുവിലാണ് തീ നിയന്ത്രണ വിധേയമായത്. ആദ്യത്തെ തീ അണച്ച് ഫയർഫോഴ്‌സ് മടങ്ങിയതിനു ശേഷം, മില്ലിന്റെ പിൻഭാഗത്ത് വീണ്ടും തീ ഉയർന്നതോടെ രണ്ടാംവട്ടം ഫയർഫോഴ്‌സ് എത്തിയാണ് തീ പൂർണമായി അണച്ചത്.

മില്ലിന്റെ മുഴുവൻ മെഷീനുകളും കെട്ടിടവും കത്തി പൂർണമായി നശിച്ചു. അയണിമൂട് ഇന്ദിരാനഗർ സ്വദേശി അനിൽകുമാറിന്റെ പേരിലുള്ള ഈ തടി മില്ല് കഴിഞ്ഞ 10 വർഷമായി ഗോപി എന്നയാളാണ് നടത്തിവന്നിരുന്നത്.

തീപിടിത്തത്തിന് പിന്നിൽ ഷോർട്ട് സർക്യൂട്ട് ആകാമെന്നാണ് പ്രാഥമിക നിഗമനം. സംഭവത്തിൽ പൊലീസ് അന്വേഷണം ആരംഭിച്ചിട്ടുണ്ട്.

A major fire broke out at a licensed timber mill in Palamoottil, Pallichal Mukkam, Thiruvananthapuram around 2:15 AM. Firefighting units from Kattakada and Neyyattinkara took four hours to douse the flames. The building and machinery were completely destroyed, causing an estimated loss of ₹15 lakh. The fire is suspected to have been caused by a short circuit. Police have launched an investigation.