മലപ്പുറം: അവനെ കടിഞ്ഞൂൽ പ്രസവിച്ചിട്ട് 17 ദിവസം മാത്രം... പേറ്റുനോവിനിടയിലും മാളവിക ജി. നായർ അമ്മയുടെ കൈകളിലേക്ക് കുഞ്ഞിനെ ഏൽപ്പിച്ച് പരീക്ഷ ഹാളിലെത്തിയത് ഒരു നിശ്ചയ ദാർഢ്യത്തോടെയായിരുന്നു. ആറാം തവണ എഴുതുന്ന സിവിൽ സർവീസ് പരീക്ഷയിൽ നേട്ടം കൊയ്യുക. പരീക്ഷയുടെ ഫലം വന്നപ്പോൾ മാളവികക്ക് 45-ാം റാങ്കിന്റെ പൊൻതിളക്കം. അമ്മയുടെ വിജയത്തിന്റെ സന്തോഷം പങ്കിടുമ്പോൾ കുഞ്ഞ് പൈതൽ ആദിശഷും മോണകാട്ടി ചിരിച്ചു.

കഴിഞ്ഞ സെപ്റ്റംബർ മുന്നിനാണ് കുഞ്ഞ് ജനിച്ചത്. 20നായിരുന്നു മെയിൻ പരിക്ഷ. പത്തനംതിട്ട തിരുവല്ല സ്വദേശികളായ കേരള ഫിനാൻഷ്യൽ കോർപറേഷൻ റിട്ട. ഉദ്യോഗസ്ഥൻ അജിത് കുമാർ- ഡോ. ഗീതാ ലക്ഷ്മി ദമ്പതികളുടെ മകളായ മാളവിക ജി. നായർ കൊച്ചി ഇൻകം ടാക്സ് ഡെപ്യൂട്ടി കമ്മിഷണറായി ജോലി ചെയ്തു വരികയാണ്. ചെങ്ങന്നൂർ സ്വദേശി ഡോ. എം. നന്ദഗോപൻ ഐ.പി.എസ് ആണ് ഭർത്താവ്. നിലവിൽ മഞ്ചേരി പൊലിസ് സ്റ്റേഷൻ്റെ ചുമതലയുള്ള ഐ.പി.എസ് ട്രെയിനിയാണ് നന്ദഗോപൻ.

മാളവിക സിവിൽ സർവിസ് പരീക്ഷ എഴുതുന്നത് ഇത് ആറാം തവണയാണ്. അവസാനത്തെ ശ്രമമാണെന്ന് പറഞ്ഞാണ് പരീക്ഷക്ക് പോയതെന്ന് മാളവിക പറഞ്ഞു. കുഞ്ഞ് പിറന്നിട്ട് മൂന്നാഴ്ചയായിട്ടില്ല. എങ്കിലും ഭർത്താവ് ഉൾപ്പെടെ കുടുംബം ഒന്നടങ്കം കൂടെ നിന്നു. അമ്മയും സഹോദരി ഡോ. മൈത്രൈയിനുമാണ് പരീക്ഷ ഹാളിലേക്ക് കയറുമ്പോൾ കുഞ്ഞിന് കൂട്ടിരുന്നത്. പ്രസവം കഴിഞ്ഞ് 17 ദിവസമായപ്പോഴാണ് തിരുവനന്തപുരത്ത് പരീക്ഷ എഴുതാൻ പോകുന്നത്. 

ഭർത്താവിൻറെ പൂർണ പിന്തുണ കൂടിയായതോടെ ലക്ഷ്യത്തിലെത്തി. പല പ്രതിസന്ധികളേയും അതിജീവിച്ചാണ് ഈ വിജയം. പരീക്ഷ ഹാളിലേക്ക് കയറുമ്പോഴും കുഞ്ഞിന്റെ മുഖമായിരുന്നു മനസിൽ. ആദ്യത്തെ കുട്ടിയോടൊപ്പം റാങ്കിന്റെ തിളക്കം കുടി വീട്ടിലെത്തിയതിന്റെ ചാരിതാർഥ്യത്തിലാണ് മാളവിക ജി. നായർ-നന്ദഗോപൻ ദമ്പതികൾ. റാങ്ക് വിവരം അറിയുമ്പോൾ മലപ്പുറത്തായിരുന്ന കുടുംബം സന്തോഷം പങ്കിടാനായി നാട്ടിലേക്ക് തിരിച്ചു.

Malavika shines in civil service exam hall 14 days after giving birth 45th rank