മാഡ്രിഡ്: സഖ്യകക്ഷികളായ തീവ്ര ഇടതുപക്ഷ പാര്‍ട്ടികളുടെ കടുത്ത വിമര്‍ശനത്തെ തുടര്‍ന്ന് ഇസ്‌റാഈല്‍ കമ്പനിയില്‍ നിന്നും ആയുധം വാങ്ങാനുള്ള 7.5 മില്ല്യണ്‍ ഡോളറിന്റെ കരാര്‍ റദ്ദാക്കി സ്‌പെയിന്‍ സര്‍ക്കാര്‍. തീവ്ര ഇടതുപക്ഷ പാര്‍ട്ടികളുടെ സംഘമായ സുമര്‍ സഖ്യത്തില്‍ പിന്‍വലിയുമെന്ന് പറഞ്ഞതിനെ തുടര്‍ന്നാണ് സ്‌പെയിന്‍ പ്രധാനമന്ത്രി പെഡ്രോ സാഞ്ചസ് കരാര്‍ റദ്ദാക്കാന്‍ ഉത്തരവിട്ടത്.

'ചര്‍ച്ചകള്‍ക്കുള്ള എല്ലാ വഴികളും അവസാനിച്ചതിനുശേഷം, പ്രധാനമന്ത്രിയും ഉപപ്രധാനമന്ത്രിയും ഉള്‍പ്പെട്ട മന്ത്രാലയങ്ങളും ഇസ്‌റാഈലി കമ്പനിയായ ഐഎംഐ സിസ്റ്റംസുമായുള്ള ഈ കരാര്‍ റദ്ദാക്കാന്‍ തീരുമാനിച്ചു,' സ്പാനിഷ് സര്‍ക്കാരിനോട് അടുത്ത ബന്ധം പുലര്‍ത്തുന്ന ഒരുന്നത ഉദ്യോഗസ്ഥന്‍ പറഞ്ഞു.

ഗസ്സയിലെ മനുഷ്യര്‍ക്കെതിരെ നിരന്തരം അതിക്രമം നടത്തുന്ന ഇസ്‌റാഈല്‍ സര്‍ക്കാരിനെ സ്‌പെയിന്‍ അടുത്തിടെ നിശിതമായി വിമര്‍ശിച്ചിരുന്നു. 

2023 ഒക്ടോബറില്‍ ഇസ്‌റാഈലിന് ആയുധങ്ങള്‍ വില്‍ക്കുന്നത് നിര്‍ത്തുമെന്ന് സ്‌പെയിന്‍ തീരുമാനിച്ചിരുന്നു. 2024 ഫെബ്രുവരിയില്‍, ഇസ്‌റാഈലില്‍ നിന്ന് ആയുധങ്ങള്‍ വാങ്ങില്ലെന്നും സ്‌പെയിന്‍ തീരുമാനമെടുത്തിരുന്നു. എന്നിരുന്നാലും, അതേ മാസം തന്നെ, സ്പാനിഷ് ആഭ്യന്തര മന്ത്രാലയം 15 ദശലക്ഷം റൗണ്ട് വെടിയുണ്ടകള്‍ വാങ്ങുന്നതിനുള്ള കരാറില്‍ ഐഎംഐ സൊല്യൂഷന്‍സുമായി ഒപ്പുവക്കുകയായിരുന്നു. സ്‌പെയിനിന്റെ സെമി-മിലിട്ടറി പൊലിസ് സേനയായ സിവില്‍ ഗാര്‍ഡിന് വേണ്ടിയായിരുന്നു വെടിയുണ്ടകള്‍.

എന്നിരുന്നാലും, സുമറിന്റെ ഭാഗമായ അഞ്ച് മന്ത്രിമാരുടെ പ്രതിഷേധത്തെത്തുടര്‍ന്ന്, കരാര്‍ ഉത്തരവ് റദ്ദാക്കുന്നത് സാധ്യമാണോ എന്ന് നിര്‍ണ്ണയിക്കാന്‍ സ്പാനിഷ് സര്‍ക്കാര്‍ പഠനം ആരംഭിച്ചിരുന്നു.

ഇസ്‌റാഈലി കമ്പനിക്ക് നഷ്ടപരിഹാരം നല്‍കുന്നത് ഒഴിവാക്കാന്‍, ആയുധ ഇടപാട് റദ്ദാക്കാന്‍ ശ്രമിച്ച് ആറ് മാസത്തിന് ശേഷം, ഏപ്രില്‍ 23 ബുധനാഴ്ച ആഭ്യന്തര മന്ത്രാലയം പുതിയ തീരുമാനവുമായി മുന്നോട്ട് പോകുമെന്ന് അറിയിക്കുകയായിരുന്നു.

'ഈ കരാര്‍ തിരുത്തണം. ഫലസ്തീന്‍ ജനതയുടെ വംശഹത്യയ്ക്ക് നമ്മള്‍ സാക്ഷ്യം വഹിക്കുകയാണ്.' സുമറിന്റെ ഉപപ്രധാനമന്ത്രിയും നേതാവുമായ യോലാന്‍ഡ ഡിയാസ് ബാഴ്സലോണയില്‍ മാധ്യമപ്രവര്‍ത്തകരോട് പറഞ്ഞു.

സ്പാനിഷ് സര്‍ക്കാരിലെ സോഷ്യലിസ്റ്റുകളും സുമറും തമ്മിലുള്ള ബന്ധത്തില്‍ ഈ തര്‍ക്കം കൂടുതല്‍ വിള്ളല്‍ വീഴ്ത്തുമെന്ന് വിദഗ്ധര്‍ പറഞ്ഞു. തന്റെ സര്‍ക്കാര്‍ നാറ്റോയുടെ ലക്ഷ്യങ്ങള്‍ കൈവരിക്കുന്നതിനായി പ്രതിരോധ ചെലവ് മൊത്ത ആഭ്യന്തര ഉല്‍പാദനത്തിന്റെ (ജിഡിപി) 2 ശതമാനമായി ഉയര്‍ത്തുമെന്ന് പ്രധാനമന്ത്രി പ്രഖ്യാപിച്ചത് സുമറിനെ ചൊടിപ്പിച്ചിട്ടുണ്ട്. 

Spain terminates a $7.5 million ammunition contract with Israeli firm Guardian LTD following internal coalition backlash and its commitment to halt arms trade with Israel due to the Gaza conflict.