ന്യൂഡൽഹി: 2023-ൽ പുറത്തിറങ്ങിയ 'പൊന്നിയിൻ സെൽവൻ 2' ചിത്രത്തിലെ 'വീര രാജ വീര' ഗാനവുമായി ബന്ധപ്പെട്ട പകർപ്പവകാശ ലംഘന കേസിൽ പ്രശസ്ത സംഗീത സംവിധായകൻ എ.ആർ. റഹ്മാനും ചിത്രത്തിന്റെ സഹനിർമാതാക്കളും 2 കോടി രൂപ കോടതിയിൽ കെട്ടിവയ്ക്കണമെന്ന് ഡൽഹി ഹൈക്കോടതി ഉത്തരവിട്ടു. വാദിയായ ക്ലാസിക്കൽ ഗായകനും പത്മശ്രീ ജേതാവുമായ ഉസ്താദ് ഫയാസ് വാസിഫുദ്ദീൻ ദാഗറിന് 2 ലക്ഷം രൂപ കോടതി ചെലവായി റഹ്മാനും മറ്റ് പ്രതികളും 4 ആഴ്ചയ്ക്കുള്ളിൽ നൽകണമെന്നും കോടതി വിധിച്ചു.

റഹ്മാനും നിർമാണ കമ്പനികളായ മദ്രാസ് ടാക്കീസ്, ലൈക്ക പ്രൊഡക്ഷൻസ് എന്നിവർക്കെതിരെ ഉസ്താദ് ഫയാസ് വാസിഫുദ്ദീൻ ദാഗർ നൽകിയ കേസിലാണ് ഈ വിധി. അന്തരിച്ച ഉസ്താദ് എൻ. ഫയാസുദ്ദീൻ ദാഗറും ഉസ്താദ് സാഹിറുദ്ദീൻ ദാഗറും ചേർന്ന് രചിച്ച 'ശിവ സ്തുതി' അനധികൃതമായി ഉപയോഗിച്ചുവെന്നാണ് ആരോപണം. 1970-കളിൽ ജൂനിയർ ഡാഗർ ബ്രദേഴ്സ് എന്നറിയപ്പെട്ട ഇവർ സൃഷ്ടിച്ച ഈ രചന, തന്റെ അറിവോ അനുമതിയോ ഇല്ലാതെ റഹ്മാൻ ചിത്രത്തിൽ ഉപയോഗിച്ചതായി ദാഗർ ആരോപിച്ചു.

കോടതി വിലയിരുത്തലിൽ, 'വീര രാജ വീര' ഗാനം ശിവസ്തുതിയിൽ നിന്ന് പ്രചോദനം ഉൾക്കൊണ്ടത് മാത്രമല്ല, സ്വരത്തിലും ഭാവത്തിലും സമാനതകൾ ഉണ്ടെന്നും സാധാരണക്കാരന്റെ വീക്ഷണത്തിൽ ഇത് പകർപ്പവകാശ ലംഘനമാണെന്നും വ്യക്തമാക്കി. വാദിയുടെ അവകാശങ്ങൾ ലംഘിക്കപ്പെട്ടതായും കോടതി നിരീക്ഷിച്ചു.

എല്ലാ ഒടിടി, ഓൺലൈൻ പ്ലാറ്റ്‌ഫോമുകളിലും ഗാനത്തിനൊപ്പമുള്ള നിലവിലെ ക്രെഡിറ്റ് സ്ലൈഡ് മാറ്റണമെന്നും കോടതി നിർദേശിച്ചു. 'ഒരു ഡാഗർവാണി പാരമ്പര്യ ധ്രുപദിനെ അടിസ്ഥാനമാക്കിയുള്ള രചന' എന്നത്, 'അന്തരിച്ച ഉസ്താദ് എൻ. ഫയാസുദ്ദീൻ ദാഗറിന്റെയും ഉസ്താദ് സാഹിറുദ്ദീൻ ദാഗറിന്റെയും ശിവ സ്തുതിയെ അടിസ്ഥാനമാക്കിയുള്ള രചന' എന്നാക്കി മാറ്റണമെന്നാണ് ഉത്തരവ്.

1989, 1994 വർഷങ്ങളിൽ പിതാവിന്റെയും അമ്മാവന്റെയും മരണശേഷം, കുടുംബ ഒത്തുതീർപ്പിലൂടെ ശിവസ്തുതിയുടെ പകർപ്പവകാശം തനിക്ക് ലഭിച്ചതായി ഉസ്താദ് ഫയാസ് വാസിഫുദ്ദീൻ ദാഗർ അവകാശപ്പെട്ടു.