മുംബൈ: മുംബൈയിലെ ഇഡി ഓഫീസ് കെട്ടിടത്തിലുണ്ടായ തീപിടുത്തത്തില്‍ സുപ്രധാന രേഖകള്‍ കത്തിനശിച്ചതായി റിപ്പോര്‍ട്ട്. വിവാദ വ്യവസായികളായ മെഹുല്‍ ചോക്‌സി, നീരവ് മോദി എന്നിവരുടെ ഫയലുകള്‍ തീപിടുത്തത്തില്‍ നശിച്ചതായി സംശയിക്കുന്നുണ്ട്. 

പഞ്ചാബ് നാഷണല്‍ ബാങ്കില്‍ നിന്ന് 12,636 കോടി രൂപയുടെ തട്ടിപ്പ് നടത്തിയതിനാണ് മെഹുല്‍ ചോക്‌സിക്കും, മരുമകന്‍ നീരവ് മോദിക്കുമെതിരെ കേസെടുത്തത്. സംഭവത്തില്‍ നീരവ് മോദിയുടെ ഭാര്യ അമി മോദി, സഹോദരന്‍ നീഷാല്‍ മോദി എന്നിവരായിരുന്നു കൂട്ടുപ്രതികള്‍. തട്ടിപ്പ് പുറത്തായതിന് പിന്നാലെ 2018ല്‍ ഇവര്‍ രാജ്യം വിടുകയും ചെയ്തു. ഡിജിറ്റല്‍ തെളിവുകള്‍ നിലവിലുള്ളതിനാല്‍ അന്വേഷണത്തെ ബാധിക്കില്ലെന്നാണ് ഇഡിയുടെ വിശദീകരണം. 

ഞായറാഴ്ച്ച പുലര്‍ച്ചെ 2.30ഓടെയാണ് മുംബൈയിലെ ബല്ലാര്‍ഡ് എസ്റ്റേറ്റ് പ്രദേശത്തുള്ള കൈസര്‍ ഇ ഹിന്ദ് കെട്ടിടത്തില്‍ പ്രവര്‍ത്തിക്കുന്ന ഇഡി ഓഫീസില്‍ തീപിടുത്തമുണ്ടായത്. ലെവല്‍ 3 തീപിടുത്തമാണ് നടന്നതെന്നും, കനത്ത പുക കാരണം തീ അണയ്ക്കാന്‍ സമയമെടുത്തെന്നും മുംബൈ ഫയര്‍ ഫോഴ്‌സ് അറിയിച്ചിരുന്നു. 

തീപിടുത്തത്തില്‍ ആര്‍ക്കും പരുക്കേറ്റിട്ടില്ല. എന്‍ഫോഴ്‌സ്‌മെന്റ് ഡയറക്ടറേറ്റ് ഓഫീസിലെ ഫര്‍ണിച്ചറുകളും പ്രധാനപ്പെട്ട രേഖകളും ഉള്‍പ്പെടെ വന്‍തോതിലുള്ള നാശനഷ്ടമുണ്ടായെന്നാണ് നി​ഗമനം. 

Mumbai ED office fire reportedly destroying important documents about industrialists Mehul Choksi and Nirav Modi