ന്യൂഡല്‍ഹി: വാഹനാപകടത്തില്‍ മരിച്ച മകള്‍ ഫാത്തിമ തസ്‌കിയയുടെ ആദ്യ ആണ്ടിന്റെ ഭാഗമായുള്ള ചടങ്ങുകളില്‍ പങ്കെടുക്കാനായി മുന്‍ പോപുലര്‍ ഫ്രണ്ട് ചെയര്‍മാന്‍ മഞ്ചേരി സ്വദേശി ഒഎംഎ സലാമിന് മൂന്ന് ദിവസത്തേക്ക് പരോള്‍. സലാമിന്റെ ആവശ്യം പരിഗണിച്ച് ഡല്‍ഹി ഹൈക്കോടതിയിലെ ജസ്റ്റിസ് രവീന്ദ്ര ദുഡേജയുടെ ബെഞ്ചാണ് എന്‍.ഐ.എയുടെ എതിര്‍പ്പ് തള്ളി സലാമിന് മൂന്ന് ദിവസത്തെ കസ്റ്റഡി പരോള്‍ അനുവദിച്ചത്. ഓരോദിവസവും ആറുമണിക്കൂര്‍ സമയം മാത്രമാകും സലാമിന് വീട്ടില്‍ കഴിയാന്‍ അവസരം ലഭിക്കുക. യാത്രയുടെയും അനുഗമിക്കുന്ന പൊലിസിന്റെയും ചെലവും സലാം വഹിക്കണം. പരോള്‍ സമയത്ത് കുടുംബാംഗങ്ങളോട് മാത്രമേ സലാമിന് ഇടപഴകാന്‍ അനുവാദമുള്ളൂ.

മരണവാര്‍ഷികത്തോടനുബന്ധിച്ച് പരിപാടികളൊന്നും ഇല്ലെന്ന് എന്‍.ഐ.എ വാദിച്ചെങ്കിലും, പ്രതിക്ക് ആചാരം നടത്താന്‍ താല്‍പ്പര്യമുണ്ടെങ്കില്‍ അവര്‍ക്ക് അതിന് അനുവാദം നല്‍കണമെന്ന് വ്യക്കതമാക്കിയാണ് കോടതി ഹരജിക്കാരന് അനുകൂലമായി നിലപാടെടുത്തത്. കോഴിക്കോട് മെഡിക്കല്‍ കോളജിലെ എം.ബി.ബി.എസ് വിദ്യാര്‍ഥിനിയായിരുന്ന മഞ്ചേരി പാലക്കുളം സ്വദേശിനി ഫാത്തിമ തസ്‌കിയ(24) കഴിഞ്ഞവര്‍ഷം ഏപ്രിലില്‍ കല്‍പ്പറ്റയിലുണ്ടായ വാഹനാപകടത്തിലാണ് മരിച്ചത്. മകളുടെ സംസ്‌കാരച്ചടങ്ങിനായി സലാമിന് നേരത്തെ പരോള്‍ ലഭിച്ചിരുന്നു. പോപുലര്‍ ഫ്രണ്ടിനെ നിരോധിക്കുന്നതിനു മുന്നോടിയായി നടത്തിയ റെയ്ഡിന്റെ ഭാഗമായാണ് സലാമിനെ എന്‍.ഐ.എ അറസ്റ്റ് ചെയ്ത് തിഹാര്‍ ജയിലില്‍ അടച്ചത്. 

popular front ex chairman O.M.A. Salam granted three-day parole