കുവൈത്ത് സിറ്റി: കുവൈത്തില്‍ വെള്ളിയാഴ്ച രേഖപ്പെടുത്തിയത് ലോകത്തെ ഏറ്റവും ഉയര്‍ന്ന താപനില. കുവൈത്തിലെ മതാരബ കാലാവസ്ഥാ കേന്ദ്രം ആണ് 49°C എന്ന സര്‍വകാല റെക്കോഡ് താപനില രേഖപ്പെടുത്തിയത്. സമീപകാലത്ത് ലോകത്ത് രേഖപ്പെടുത്തിയ ഏറ്റവും ഉയര്‍ന്നതാപനിലയാണിതെന്ന് മാധ്യമങ്ങള്‍ റിപ്പോര്‍ട്ട്‌ചെയ്തു.

അതേസമയം, തിങ്കളാഴ്ച വൈകുന്നേരം മുതല്‍ രാജ്യത്ത് ന്യൂനമര്‍ദ്ദം അനുഭവപ്പെടുമെന്നും ഇത് ചൂടും ഈര്‍പ്പവും നിറഞ്ഞ കാലാവസ്ഥയ്ക്ക് കാരണമാകുമെന്നും കാലാവസ്ഥാ വകുപ്പ് പ്രവചിച്ചു. നേരിയതോ മിതമായതോ ആയ തെക്കുകിഴക്കന്‍ കാറ്റ് ശക്തമായ വടക്കുപടിഞ്ഞാറന്‍ കാറ്റായി മാറും. മണിക്കൂറില്‍ 50 കിലോമീറ്റര്‍ വരെ വേഗതയില്‍ എത്തുമെന്നും ഇത് പൊടിക്കാറ്റിനും ദൃശ്യപരത കുറയുന്നതിനും കാരണമാകുമെന്നും പ്രതീക്ഷിക്കുന്നതായും അധികൃതര്‍ അറിയിച്ചു. 

കുവൈത്തിലെ മരുഭൂമിയിലെ കാലാവസ്ഥയില്‍ താപനില കുറയ്ക്കുന്നതിനുള്ള ഏറ്റവും വേഗതയേറിയതും ഫലപ്രദവുമായ മാര്‍ഗ്ഗം വനവല്‍ക്കരണമാണെന്ന് കാലാവസ്ഥാ നിരീക്ഷകന്‍ ഫഹദ് അല്‍ ഒതൈബി പറഞ്ഞു. കുവൈത്തില്‍ സൂര്യപ്രകാശമോ പൊടിപടലങ്ങളോ തടയുന്നത് പ്രായോഗികമല്ലെന്നും അദ്ദേഹം പറഞ്ഞു. 

റെസിഡന്‍ഷ്യല്‍ തെരുവുകളിലും നടപ്പാതകളിലും മരങ്ങള്‍ നട്ടുപിടിപ്പിക്കുന്നത് താപനില 3 മുതല്‍ 8 ഡിഗ്രി സെല്‍ഷ്യസ് വരെ കുറയ്ക്കും. പൊടിയുടെ അളവ് ഗണ്യമായി പരിമിതപ്പെടുത്താന്‍ സഹായിക്കും. കുവൈത്തിനെ ബാധിക്കുന്ന മിക്ക പൊടിയും വടക്ക്, തെക്ക് പടിഞ്ഞാറ് ഭാഗങ്ങളില്‍ നിന്നാണ് ഉത്ഭവിക്കുന്നതെന്ന് അദ്ദേഹം അഭിപ്രായപ്പെട്ടു. പച്ച ഇടങ്ങള്‍ കടുത്ത ചൂടിനെ ലഘൂകരിക്കുക മാത്രമല്ല, മണല്‍ക്കാറ്റുകളില്‍ നിന്ന് മണല്‍ നീക്കം ചെയ്യുന്നതുമായി ബന്ധപ്പെട്ട ചെലവ് കുറയ്ക്കുന്നതുപോലുള്ള സാമ്പത്തിക നേട്ടങ്ങളും നല്‍കുന്നു. മരുഭൂവല്‍ക്കരണത്തെയും മണല്‍ കൈയേറ്റത്തെയും ചെറുക്കാന്‍ പുതിയ റെസിഡന്‍ഷ്യല്‍ ഏരിയകള്‍ ആസൂത്രണം ചെയ്യുന്നതില്‍ വനവല്‍ക്കരണത്തിന് മുന്‍ഗണന നല്‍കണമെന്ന് അദ്ദേഹം ആവശ്യപ്പെട്ടു.

Kuwait records highest temperature of 49°C in world