ദുബൈ: ലോകത്തിലെ ഏറ്റവും വലിയ എയര്‍പോര്‍ട്ട് ദുബൈയില്‍ ഒരുങ്ങുന്നു. ദുബൈയിലെ അല്‍മക്തൂം വിമാനത്താവളമാണ് ലോകത്തിലെ ഏറ്റവും വലിയ എയര്‍പോര്‍ട്ടാകാന്‍ ഒരുങ്ങുന്നത്. വിമാനത്താവളത്തിന്റെ കരാറുകള്‍ നല്‍കുകയും നിര്‍മ്മാണ പ്രവര്‍ത്തനങ്ങള്‍ ആരംഭിക്കുകയും ചെയ്തതായി ദുബൈ എയര്‍പോര്‍ട്ട്‌സ് ചെയര്‍മാനും ദുബൈ സിവില്‍ ഏവിയേഷന്‍ അതോറിറ്റി പ്രസിഡന്റും പറഞ്ഞു.

നിര്‍മ്മാണ പ്രവര്‍ത്തനങ്ങള്‍ പൂര്‍ത്തിയാകുമ്പോള്‍ വിമാനത്താവളം ലോകത്തിലെ ഏറ്റവും വലിയ എയര്‍പോര്‍ട്ടാകുമെന്നാണ് കരുതുന്നത്. 

നേരത്തേ വിമാനത്താവളത്തിന് യുഎഇ വൈസ് പ്രസിഡന്റും പ്രധാനമന്ത്രിയുമായ ഷെയ്ഖ് മുഹമ്മദ് ബിന്‍ റാഷിദ് അല്‍ മക്തൂം അംഗീകാരം നല്‍കിയിരുന്നു. പത്തു വര്‍ഷത്തിനകം ദുബൈ എയര്‍പോര്‍ട്ടിലെ എല്ലാ പ്രവര്‍ത്തനങ്ങളും അല്‍മക്തൂം വിമാനത്താവളത്തിലേക്ക് മാറ്റാനാകുമെന്നാണ് കരുതുന്നത്.

ദുബൈയുടെ ഭാവിയിലെ അഭിലാഷ പദ്ധതിയായ അല്‍ മക്തൂം അന്താരാഷ്ട്ര വിമാനത്താവള പദ്ധതി അതിവേഗം പുരോഗമിക്കുകയാണ്. 2033 ഓടെ തുറക്കാന്‍ പോകുന്ന 35 ബില്യണ്‍ ഡോളറിന്റെ പാസഞ്ചര്‍ ടെര്‍മിനലില്‍ ഭൂഗര്‍ഭ ട്രെയിന്‍ ശൃംഖല ഉള്‍പ്പെടെ ആഭ്യന്തര ഗതാഗത സംവിധാനം നിര്‍മ്മിക്കാനുള്ള പദ്ധതികളും പുരോഗമിക്കുകയാണ്.

ദുബായ് അന്താരാഷ്ട്ര വിമാനത്താവളത്തില്‍ നിലവിലുള്ള ഓട്ടോമേറ്റഡ് പീപ്പിള്‍ മൂവര്‍ (എപിഎം) ടെര്‍മിനല്‍ 1, ടെര്‍മിനല്‍ 3 എന്നിവിടങ്ങളില്‍ യാത്രക്കാരെ കടത്തിവിടുന്നു. ഇവിടത്തെ എപിഎമ്മുകളില്‍ പ്രായമായവര്‍ക്കും സ്ത്രീകള്‍ക്കും കുട്ടികള്‍ക്കും പരിമിതമായ ഇരിപ്പിട സൗകര്യങ്ങളേയുള്ളൂ.

35 ബില്യണ്‍ ഡോളറിന്റെ പാസഞ്ചര്‍ ടെര്‍മിനല്‍ നിര്‍മ്മിക്കാന്‍ ദുബൈ സര്‍ക്കാര്‍ ഒരു വര്‍ഷം മുമ്പ് അനുമതി നല്‍കിയതിനുശേഷം ജോലികള്‍ ആരംഭിച്ചതായും പ്രധാനപ്പെട്ട കരാറുകള്‍ കരാറുകാര്‍ക്ക് നല്‍കിയതായും ദുബൈ എയര്‍പോര്‍ട്ട്സ് ചെയര്‍മാന്‍ ഷെയ്ഖ് അഹമ്മദ് ബിന്‍ സയീദ് അല്‍ മക്തൂം വ്യക്തമാക്കിയിരുന്നു. 

400 വിമാനത്താവള ഗേറ്റുകളും 5 സമാന്തര റണ്‍വേകളും അടങ്ങുന്ന വിമാനത്താവളം എഴുപത് സ്‌ക്വയര്‍ കിലോമീറ്റര്‍ വിസ്തൃതിയിലാണ് നിര്‍മ്മിക്കുന്നത്. നിര്‍മ്മാണം പൂര്‍ത്തിയാകുമ്പോള്‍ അല്‍മക്തൂം വിമാനത്താവളത്തിന് ദുബൈ അന്താരാഷ്ട്ര വിമാനത്താവളത്തിന്റെ അഞ്ചുമടങ്ങ് ശേഷി ഉണ്ടാകുമെന്നാണ് കരുതുന്നത്. 

Dubai is rapidly advancing the $35 billion expansion of Al Maktoum International Airport, set to become the world's largest airport. The project includes five runways, 400 gates, and aims to handle up to 260 million passengers annually, positioning Dubai as a global aviation leader