വ്യവസായപ്രമുഖരുടെയും സെലിബ്രറ്റികളുടെയും കുടുംബങ്ങളിലെ ആഡംബര വിവാഹങ്ങളെ കുറിച്ചുള്ള നിരവധി വാര്‍ത്തകളും വിഡിയോകളും സോഷ്യല്‍ മീഡിയയില്‍ വൈറലാകാറുണ്ട്. എന്നാല്‍ സെലിബ്രിറ്റി സ്റ്റാറ്റസ് ഒന്നുമില്ലാത്ത ഒരു വിവാഹ വിഡിയോയാണ് ഇപ്പോള്‍ വൈറലായിരിക്കുന്നത്.

 വിവാഹത്തിന്റെ അന്നുള്ള വിഡിയോയാണ് ഇപ്പോള്‍ ചര്‍ച്ചയായത്. വിവാഹത്തിന്റെ അന്ന് വരന് വധുവിന്റെ വീട്ടുകാര്‍ സമ്മാനങ്ങള്‍ നല്‍കുന്ന വിഡിയോയാണ് ഇത്. വരന്റെയും വധുവിന്റെയും മുന്നില്‍ മൂന്നു വലിയ നീലപ്പെട്ടികള്‍ അടുക്കിവച്ചരിക്കുന്നത് കാണാം. വരനു കൊടുക്കാന്‍ പോകുന്ന സമ്മാനങ്ങളെ കുറിച്ചു മൈക്കിലൂടെ വിളിച്ചുപറയുന്നുമുണ്ട്.

 മൂന്നുകിലോ വെള്ളി, ഒരു പെട്രോള്‍ പമ്പ്, 130 ഏക്കറിലധികം ഭൂമി എന്നിവയാണ് വരന് വധുവിന്റെ വീട്ടുകാര്‍ സമ്മാനമായി നല്‍കിയിരിക്കുന്നത്. ആകെ 15.65 കോടി രൂപ വധുവിന്റെ കുടുംബം വരന് നല്‍കിയെന്നു വിളിച്ചു പറയുന്നുണ്ട് മൈക്കിലൂടെ. സോനു അജ്മീര്‍ എന്ന ഇന്‍സ്റ്റഗ്രാം യൂസര്‍ ആണ് വിഡിയോ പങ്കുവച്ചിരിക്കുന്നത്.

പിന്നാലെ നിരവധി പേരാണ് വിഡിയോ ഷെയര്‍ ചെയ്തത്. വിഡിയോയ്ക്ക് താഴെ വിവിധ തരത്തിലുള്ള കമന്റുകളാണ് വരുന്നത്. വരന്റെ ഭാഗ്യത്തെക്കുറിച്ചും സ്ത്രീധനത്തിനെതിരേയുമൊക്കെ നിരവധിപ്രതികരണങ്ങളാണ് ഉള്ളത്.