ന്യൂഡൽഹി: പാകിസ്ഥാന്റെ ആക്രമണങ്ങൾക്ക് ശക്തമായ തിരിച്ചടി നൽകി ഇന്ത്യൻ സൈന്യം. പാകിസ്ഥാന്റെ പ്രധാന നഗരങ്ങളായ ലാഹോർ, കറാച്ചി, പെഷവാർ എന്നിവിടങ്ങളിൽ ഇന്ത്യ നടത്തിയ കൃത്യമായ ആക്രമണങ്ങളിൽ നൂർ ഖാൻ എയർബേസ് പൂർണമായും തകർന്നതായി റിപ്പോർട്ട്. ജമ്മുവിൽ കനത്ത ശബ്ദങ്ങൾ കേൾക്കുന്നതിനിടെ, സിർസയിൽ പാകിസ്ഥാന്റെ ലോങ് റേഞ്ച് മിസൈൽ ഇന്ത്യൻ പ്രതിരോധ സംവിധാനം വിജയകരമായി തകർത്തു.

പുലർച്ചെ മുതൽ തുടരുന്ന ആക്രമണങ്ങളുടെ പശ്ചാത്തലത്തിൽ പാകിസ്ഥാൻ ശ്രീനഗർ, പഞ്ചാബിലെ അമൃത്സർ എന്നിവിടങ്ങളിൽ തുടർച്ചയായ ആക്രമണങ്ങൾ നടത്തി. ജമ്മുവിൽ ഒരു പാക് യുദ്ധവിമാനം ഇന്ത്യൻ സൈന്യം വെടിവച്ചിട്ടതായും വിവരമുണ്ട്. അതിനിടെ, അതിർത്തി ജില്ലകളിൽ നിന്ന് ജനങ്ങളെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചു. ജലന്ധറിൽ ബ്ലാക്ക് ഔട്ട് തുടരുകയാണ്. പുറത്തിറങ്ങരുതെന്ന കർശന നിർദേശം ജനങ്ങൾക്ക് നൽകിയിട്ടുണ്ട്.

ഇന്നലെ രാത്രി വൈകി പ്രധാനമന്ത്രി, വിദേശകാര്യ മന്ത്രി, ദേശീയ സുരക്ഷാ ഉപദേഷ്ടാവ് എന്നിവർ അടിയന്തര കൂടിക്കാഴ്ച നടത്തി. പാകിസ്ഥാൻ ആദ്യമായി ഇന്ത്യയ്ക്കെതിരെ ആക്രമണം ആരംഭിച്ചതായി ഔദ്യോഗികമായി സ്ഥിരീകരിച്ചു. തന്ത്രപ്രധാന മേഖലകളിൽ യുദ്ധക്കപ്പലുകൾ വിന്യസിച്ചതായും പാകിസ്ഥാൻ അവകാശപ്പെട്ടു.

അതിനിടെ, പ്രതിരോധ മന്ത്രിയും വിദേശകാര്യ മന്ത്രിയും പങ്കെടുക്കേണ്ടിയിരുന്ന വാർത്താസമ്മേളനം രാവിലെ 10 മണിക്ക് നടക്കും. അതിർത്തിയിലെ സ്ഥിതിഗതികൾ ഏകോപിപ്പിക്കുന്നതിനായി സൈനിക മേധാവികൾ തിരക്കിലാണ്. പ്രത്യാക്രമണത്തിന്റെയും പ്രതിരോധത്തിന്റെയും വിശദാംശങ്ങൾ പരിശോധിച്ച ശേഷമായിരിക്കും വാർത്താസമ്മേളനം. സ്ഥിതിഗതികൾ നിയന്ത്രണാതീതമാകുന്ന സാഹചര്യത്തിൽ ഇന്ത്യ ശക്തമായ നിലപാട് സ്വീകരിക്കുമെന്ന് പ്രതിരോധ വൃത്തങ്ങൾ അറിയിച്ചു.