തിരുവനന്തപുരം: ശ്രീ പത്മനാഭസ്വാമി ക്ഷേത്രത്തിൽ നിന്ന് കാണാതായ സ്വർണം മണൽപ്പരപ്പിൽ നിന്ന് കണ്ടെടുത്തു. വ്യാഴാഴ്ച മോഷണം പോയ 107 ഗ്രാം (13 പവൻ) സ്വർണമാണ് ക്ഷേത്രത്തിന്റെ അതീവ സുരക്ഷാ മേഖലയിൽ നിന്ന് തിരികെ ലഭിച്ചത്. ശ്രീകോവിലിൽ സ്വർണം പൂശുന്നതിനായി ലോക്കറിൽ സൂക്ഷിച്ചിരുന്ന സ്വർണമാണ് കാണാതായത്.

ബോംബ് സ്ക്വാഡിന്റെയും പൊലീസിന്റെയും സംയുക്ത പരിശോധനയിലാണ് ക്ഷേത്ര മണൽപ്പരപ്പിൽ നിന്ന് സ്വർണം കണ്ടെടുത്തത്. രാവിലെ മുതൽ ക്ഷേത്രത്തിനകത്തും പുറത്തും നടന്ന തെരച്ചിൽ ചൂട് കാരണം താൽക്കാലികമായി നിർത്തിവെച്ചിരുന്നു. വൈകുന്നേരം വീണ്ടും തുടർന്ന പരിശോധനയിലാണ് സ്വർണം ലഭിച്ചത്. എന്നാൽ, സ്ട്രോങ് റൂമിൽ സൂക്ഷിച്ചിരുന്ന സ്വർണം എങ്ങനെ മണൽപ്പരപ്പിലെത്തി എന്നതിൽ സംശയം നിലനിൽക്കുന്നുണ്ടെന്നാണ് പറയുന്നത്.

സംഭവത്തിൽ പൊലീസ് അന്വേഷണം തുടരുകയാണ്. ഉദ്യോഗസ്ഥരുടെ സാന്നിധ്യത്തിൽ സ്വർണം തൂക്കി രേഖപ്പെടുത്തുന്ന രീതി കൃത്യമായി പാലിച്ചിരുന്നോ എന്നും പരിശോധിക്കുന്നുണ്ട്. ഏതെങ്കിലും വിഭാഗീയ പ്രവർത്തനത്തിന്റെ ഭാഗമായി സ്വർണം മാറ്റിവെച്ചതാണോ എന്ന സംശയവും പൊലീസ് ഉന്നയിക്കുന്നു. സംഭവത്തിൽ വിശദീകരണം നൽകാൻ ഡിസിപി വാർത്താ സമ്മേളനം വിളിച്ചിട്ടുണ്ട്.