തിരുവനന്തപുരം: ജൂനിയർ അഭിഭാഷക ശ്യാമിലി ജസ്റ്റിനെ മർദിച്ച കേസിൽ സീനിയർ അഭിഭാഷകൻ  ബെയ്‌ലിൻ ദാസിനെ തുമ്പ പൊലീസ് അറസ്റ്റ് ചെയ്തു. സ്റ്റേഷൻ കടവിൽ നിന്നാണ് പ്രതിയെ കസ്റ്റഡിയിലെടുത്തത്. കയ്യേറ്റം, സ്ത്രീത്വത്തെ അപമാനിക്കൽ തുടങ്ങിയ കുറ്റങ്ങൾ ചുമത്തിയാണ് വഞ്ചിയൂർ പൊലീസ് കേസെടുത്തത്. അറസ്റ്റിനെത്തുടർന്ന് ശ്യാമിലി ജസ്റ്റിൻ സന്തോഷം പ്രകടിപ്പിച്ച് കേരള പൊലീസിന് നന്ദി അറിയിച്ചു.

വഞ്ചിയൂർ മഹാറാണി ബിൽഡിംഗിലെ ബെയ്‌ലിന്റെ ഓഫീസിൽ ചൊവ്വാഴ്ച ഉച്ചയ്ക്ക് 12:30-നാണ് മർദനം നടന്നത്. ശ്യാമിലിയും ബെയ്‌ലിനും തമ്മിൽ രാവിലെ തർക്കമുണ്ടായിരുന്നു. ജൂനിയർ അഭിഭാഷകയെ മാറ്റണമെന്ന ബെയ്‌ലിന്റെ ആവശ്യത്തെ തുടർന്നുണ്ടായ വാഗ്വാദം ആക്രമണത്തിൽ കലാശിച്ചു. മുഖത്ത് ചതവേറ്റ ശ്യാമിലി ജനറൽ ആശുപത്രിയിൽ പിന്നീട് ചികിത്സ തേടുകയാണുണ്ടായത്.

തിരുവനന്തപുരം സെഷൻസ് കോടതിയിൽ മുൻകൂർ ജാമ്യാപേക്ഷ നൽകിയ ബെയ്‌ലിൻ, തനിക്കെതിരെ ചുമത്തിയ വകുപ്പുകൾ നിലനിൽക്കില്ലെന്നും ബോധപൂർവം സ്ത്രീത്വത്തെ അപമാനിച്ചിട്ടില്ലെന്നും വാദിക്കുന്നു. എന്നാൽ, ശ്യാമിലി ബാർ കൗൺസിലിന് നൽകിയ പരാതിയിൽ, ബെയ്‌ലിൻ തന്നെ മർദിക്കുകയും അപമാനിക്കുകയും ചെയ്തതായി ആരോപിച്ചു. ബെയ്‌ലിന്റെ ഭാര്യക്ക് വഞ്ചിയൂർ പൊലീസ് നോട്ടീസ് നൽകി, ചോദ്യം ചെയ്യലിനായി സ്റ്റേഷനിൽ ഹാജരാകാൻ ആവശ്യപ്പെട്ടു. 

സംഭവത്തിന് പിന്നാലെ ബാർ കൗൺസിലും ബാർ അസോസിയേഷനും ബെയ്‌ലിനെ താത്കാലികമായി സസ്പെൻഡ് ചെയ്തു. വിശദമായ അന്വേഷണം നടത്തി കുറ്റക്കാരനെന്ന് കണ്ടെത്തിയാൽ കർശന നടപടി സ്വീകരിക്കുമെന്ന് ബാർ കൗൺസിൽ വ്യക്തമാക്കി. ബെയ്‌ലിന്റെ അഭിഭാഷക അംഗത്വം റദ്ദാക്കണമെന്ന് ബാർ അസോസിയേഷൻ ബാർ കൗൺസിലിന് ശുപാർശ നൽകിയിട്ടുണ്ട്. കേസിൽ തുടർനടപടികൾ പുരോഗമിക്കുകയാണ്.