ആലപ്പുഴ: തപാല്‍ വോട്ടുകളില്‍ തിരിമറി നടത്തിയെന്ന വെളിപ്പെടുത്തലിന് പിന്നാലെ സിപിഎം നേതാവ് ജി സുധാകരനെതിരെ കേസെടുക്കാന്‍ തിരഞ്ഞെടുപ്പ് കമ്മീഷന്‍. സംഭവത്തില്‍ അടിയന്തര നടപടിക്ക് ആലപ്പുഴ ജില്ല കലക്ടറോട് തിരഞ്ഞെടുപ്പ് കമ്മീഷന്‍ ഉത്തരവിട്ടു. വിശദമായ അന്വേഷണം നടത്തി കേസെടുക്കണമെന്നാണ് നിര്‍ദേശം. 

നേരത്തെ ആലപ്പുഴയില്‍ എന്‍ജിഒ യൂണിയന്‍ സംഘടിപ്പിച്ച പരിപാടിക്കിടെയാണ് വിവാദ പ്രസ്താവനയുമായി സുധാകരന്‍ രംഗത്തെത്തിയത്. 1989ലെ ലോക്‌സഭാ തെരഞ്ഞെടുപ്പിനിടെ അന്നത്തെ എല്‍ഡിഎഫ് സ്ഥാനാര്‍ഥി കെവി ദേവദാസിന് വേണ്ടി പോസ്റ്റല്‍ വോട്ടുകള്‍ തിരുത്തിയെന്നാണ് സുധാകരന്‍ പറഞ്ഞത്. വെളിപ്പെടുത്തലില്‍ ഖേദമില്ലെന്നും ഇതിന്റെ പേരില്‍ തിരഞ്ഞെടുപ്പ് കമ്മീഷന്‍ കേസെടുത്താല്‍ പ്രശ്‌നമില്ലെന്നും സുധാകരന്‍ പറഞ്ഞിരുന്നു.

'' 1989ല്‍ കെവി ദേവദാസ് ആലപ്പുഴയില്‍ എല്‍ഡിഎഫ് സ്ഥാനാര്‍ഥിയായി മത്സരിച്ചപ്പോള്‍ അന്നത്തെ ഇലക്ഷന്‍ കമ്മിറ്റി സെക്രട്ടറിയായിരുന്നു ഞാന്‍. പോസ്റ്റല്‍ ബാലറ്റ് ശേഖരിച്ച് സിപിഎം ജില്ല കമ്മിറ്റി ഓഫീസില്‍ കൊണ്ടുവന്നു. അവിടെ വെച്ച് ഞാനുള്‍പ്പെടെയുള്ളവര്‍ പോസ്റ്റല്‍ വോട്ടുകള്‍ പൊട്ടിച്ച് തിരുത്തിയിട്ടുണ്ട്. അന്ന് സിപിഎം സര്‍വീസ് സംഘടനകളിലെ അംഗങ്ങളുടെ വോട്ടില്‍ 15 ശതമാനം ദേവദാസിന് എതിരായിരുന്നു. അംഗങ്ങളുടെ പോസ്റ്റല്‍ ബാലറ്റുകളില്‍ 15 ശതമാനം മറിച്ച് ചെയ്തു. എന്നാണ് സുധാകരന്‍ പറഞ്ഞത്. 

89ല്‍ വക്കം പുരുഷോത്തമനെതിരെയാണ് ദേവദാസ് മത്സരിച്ചത്. പോസ്റ്റല്‍ വോട്ടുകള്‍ തിരുത്തിയെങ്കിലും ജനവിധി എല്‍ഡിഎഫിന് എതിരായിരുന്നു. കാല്‍ലക്ഷത്തില്‍പരം വോട്ടുകളുടെ ഭൂരിപക്ഷത്തിലാണ് വക്കം പുരുഷോത്തമന്‍ അന്ന് ലോക്‌സഭയിലേക്ക് തിരഞ്ഞെടുക്കപ്പെട്ടത്. 

അതേസമയം സുധാകരന്റെ വിവാദ വെളിപ്പെടുത്തലില്‍ രൂക്ഷ വിമര്‍ശനവുമായി കോണ്‍ഗ്രസ് രംഗത്തെത്തി. ജനഹിതത്തെ കള്ള വോട്ടിലൂടെ അട്ടിമറിക്കുന്നത് ജനാധിപത്യത്തിന് ആപത്താണെന്ന് കോണ്‍ഗ്രസ് പറഞ്ഞു.