റിയാദ്: പ്രമുഖ യുഎസ് കമ്പനികളുമായി 34 കരാറുകളില്‍ ഒപ്പുവച്ച് സഊദി നാഷണല്‍ എനര്‍ജി കമ്പനിയായ അരാംകോ. 90 ബില്യണ്‍ ഡോളറിന്റെ കരാറിലാണ് സഊദി അരാംകോ അധികൃതര്‍ ഒപ്പുവച്ചത്.
 
അരാംകോയുടെ ദീര്‍ഘകാല വളര്‍ച്ചാ ഉന്നമിട്ടും പരമ്പരാഗത എണ്ണ, വാതകം മുതല്‍ കൃത്രിമബുദ്ധി, ഉല്‍പ്പാദനം വരെയുള്ള വിവിധ മേഖലകളില്‍ കമ്പനിയുടെ സാന്നിധ്യം വ്യാപിപ്പിക്കുന്നതിനുമായാണ് കരാറില്‍ ഒപ്പുവച്ചിരിക്കുന്നത്. ദ്രവീകൃത പ്രകൃതിവാതകം (എല്‍എന്‍ജി), ഇന്ധനങ്ങള്‍, പെട്രോകെമിക്കല്‍സ്, കാര്‍ബണ്‍ ബഹിര്‍ഗമനം കുറയ്ക്കല്‍ സാങ്കേതികവിദ്യകള്‍, ആര്‍ട്ടിഫിഷ്യല്‍ ഇന്റലിജന്‍സ്, ഉപകരണ സംഭരണം, സാമ്പത്തിക സേവനങ്ങള്‍ തുടങ്ങിയ മേഖലകളില്‍ ധാരണാപത്രങ്ങളിലും (എംഒയു) വാണിജ്യ കരാറുകളിലും അരാംകോ അധികൃതര്‍ ഒപ്പുവച്ചിട്ടുണ്ട്.  

അരാംകോ ഒപ്പുവച്ച ഏറ്റവും വലിയ കരാറുകളില്‍ ചിലത് ഡൗണ്‍സ്ട്രീം ബിസിനസുമായി ബന്ധപ്പെട്ടതാണ്. യുഎസ് ആസ്ഥാനമായുള്ള ഹണിവെല്‍ യുഒപി, അഫ്ടണ്‍ കെമിക്കല്‍, എക്‌സോണ്‍ മൊബീല്‍ എന്നീ കമ്പനികളുമായാണ് അരാംകോ ഒപ്പുവച്ചത്. യാന്‍ബുവിലെ SAMREF റിഫൈനറിയുടെ നവീകരണം വിലയിരുത്തുന്നതിനും അതിനെ ഒരു പ്രധാന പെട്രോകെമിക്കല്‍ സമുച്ചയമായി വികസിപ്പിക്കുന്നതിനുമായി എക്‌സോണ്‍ മൊബിലും അരാംകോയും ഒരു ധാരണാപത്രത്തില്‍ ഒപ്പുവച്ചു. പുതിയ സാങ്കേതികവിദ്യയ്ക്ക് ലൈസന്‍സ് നല്‍കുന്നതിലും കെമിക്കല്‍ അഡിറ്റീവുകള്‍ വിതരണം ചെയ്യുന്നതിലും ശ്രദ്ധ കേന്ദ്രീകരിക്കുന്നതാണ് മറ്റ് കരാറുകള്‍.

അമേരിക്കയിലെ ടെക്‌സസിലെയും ലൂസിയാനയിലെയും നിക്ഷേപങ്ങളും ദീര്‍ഘകാല എല്‍എന്‍ജി വാങ്ങുന്നതിനുമായി സെംപ്ര ഇന്‍ഫ്രാസ്ട്രക്ചര്‍, വുഡ്‌സൈഡ് എനര്‍ജി, നെക്സ്റ്റ് ഡെക്കേഡ് എന്നിവയുമായും അരാംകോ കരാറുകളില്‍ ഒപ്പുവച്ചു.

നിരവധി പ്രമുഖ യുഎസ് ടെക് സ്ഥാപനങ്ങളുമായുള്ള കരാറുകളിലൂടെ അരാംകോ ഡിജിറ്റല്‍ രംഗത്തും മാറ്റത്തിനു കോപ്പു കൂട്ടുന്നു. ഇത്തരത്തില്‍ ക്ലൗഡ് കമ്പ്യൂട്ടിംഗിലും കുറഞ്ഞ കാര്‍ബണ്‍ സാങ്കേതികവിദ്യകളിലും ശ്രദ്ധ കേന്ദ്രീകരിച്ച് ആമസോണ്‍ വെബ് സര്‍വീസസുമായി (AWS) ഒരു കരാറിലും അരാംകോ ഒപ്പുവച്ചിട്ടുണ്ട്.

രാജ്യത്ത് വ്യാവസായിക എഐ അടിസ്ഥാന സൗകര്യങ്ങള്‍, ഒരു എഐ ഹബ്, റോബോട്ടിക്‌സിനും എഞ്ചിനീയറിംഗിനുമുള്ള ഒരു  കേന്ദ്രം എന്നിവ സൃഷ്ടിക്കുക എന്നതാണ് NVIDIAയുമായി ഏര്‍പ്പെട്ട പ്രത്യേക ധാരണാപത്രത്തിലൂടെ അരാംകോ ലക്ഷ്യമിടുന്നത്. 

ഹാലിബര്‍ട്ടണ്‍, ബേക്കര്‍ ഹ്യൂസ്, എസ്എല്‍ബി, ജിഇ വെര്‍നോവ തുടങ്ങിയ യുഎസ് ആസ്ഥാനമായുള്ള സേവന ദാതാക്കളുമായും ഉപകരണ നിര്‍മ്മാതാക്കളുമായും അരാംകോ കരാറുകളില്‍ ഒപ്പുവച്ചിട്ടുണ്ട്. ഉപകരണ വിതരണം, ഡ്രില്ലിംഗ് സേവനങ്ങള്‍, അറ്റകുറ്റപ്പണികള്‍ എന്നിവയിലൂടെ ഈ കമ്പനികള്‍ അരാംകോയുടെ നിലവിലുള്ള പദ്ധതികളെ പിന്തുണയ്ക്കും.

Saudi Aramco inks a massive $90 billion agreement with leading U.S. companies, strengthening energy and industrial ties.