കുവൈത്ത് സിറ്റി: തൊഴിലാളികള്‍ താമസിക്കുന്ന കെട്ടിടത്തിന് തീപിടിച്ച് 49 പേര്‍ മരിച്ച സംഭവത്തില്‍ 9 പേര്‍ക്ക് കഠിനതടവ് വിധിച്ച് കുവൈത്ത് കോടതി. ഇതില്‍ രണ്ടുപേര്‍ മലയാളികളാണ്. ക്യാപ് ബോസ് ജോസഫ് എം മണലേലി പറമ്പില്‍ എബ്രഹാമിന് മൂന്നു വര്‍ഷവും ക്യാമ്പിലെ ജീവനക്കാരന്‍ കോഴിക്കോട് സ്വദേശി റിയാസിന് ഒരു വര്‍ഷവും തടവാണ് കോടതി വിധിച്ചത്. 

പ്രവൃത്തിയില്‍ അശ്രദ്ധ കാണിച്ചു, തെറ്റായ സാക്ഷിമൊഴി നല്‍കി എന്നീ കുറ്റങ്ങളാണ് ഇരുവര്‍ക്കുമെതിരെ ചുമത്തിയത്. ശിക്ഷ ലഭിച്ച ബാക്കിയുള്ളവര്‍ ഈജിപ്തില്‍ നിന്നും കുവൈത്തില്‍ നിന്നുള്ളവരാണ്. 

പ്രമുഖ പ്രവാസി വ്യവസായി കെജി എബ്രഹാമിന്റെ ഉടമസ്ഥതയില്‍ ഉള്ള എന്‍ബിടിസി കമ്പനിയിലെ തൊഴിലാളികള്‍ വസിച്ചിരുന്ന കെട്ടിടത്തില്‍ 2024 ജൂണ്‍ 12നാണ് തീപിടുത്തമുണ്ടായത്. തീപിടുത്തത്തില്‍ മരിച്ചവരില്‍ 24 പേര്‍ കേരളത്തില്‍ നിന്നുള്ളവരായിരുന്നു.

മങ്കെഫ് ബഌക്ക് നാലിലുള്ള കെട്ടിടത്തിലാണ് തീപിടിത്തം ഉണ്ടായത്. മലയാളി ഉടമസ്ഥതയിലുള്ള സ്ഥാപനത്തിലെ ജീവനക്കാര്‍ താമസിക്കുന്ന ഈ കെട്ടിടത്തിലെ ഭൂരിഭാഗം പേരും മലയാളികളായിരുന്നു.

Kuwait court hands rigorous imprisonment to 9 accused, including 2 Malayalis, in a labor housing fire that claimed 49 lives.