സംസ്ഥാനത്ത് കാലവർഷം ശക്തമായതോടെ വിവിധ ജില്ലകളിൽ വ്യാപക നാശനഷ്ടം. മരങ്ങൾ കടപുഴകി വീണതിനെ തുടർന്ന് വീടുകൾ തകർന്നും അപകടങ്ങളിൽ മരണങ്ങൾ റിപ്പോർട്ട് ചെയ്തും സംസ്ഥാനത്തുടനീളം ദുരിതം വിതച്ചു.

വടകരയിൽ തെങ്ങ് വീണ് ദാരുണാന്ത്യം: കോഴിക്കോട്, വടകര വില്ല്യാപ്പള്ളിക്ക് സമീപം കുനിത്താഴയിൽ സ്കൂട്ടർ യാത്രക്കാരന്റെ മേൽ തെങ്ങ് കടപുഴകി വീണ് അപകടം. വില്ല്യാപ്പള്ളി കുന്നുമ്മായിന്റെവിട മീത്തൽ ദാമോദരന്റെ മകൻ പവിത്രൻ (64) ആണ് മരിച്ചത്. ശനിയാഴ്ച രാവിലെ 11 മണിയോടെ സ്വകാര്യ വ്യക്തിയുടെ പറമ്പിൽ നിന്നുള്ള തെങ്ങ് വീണാണ് അപകടമുണ്ടായത്. പരുക്കേറ്റ പവിത്രനെ വടകര സർക്കാർ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല. മൃതദേഹം ആശുപത്രി മോർച്ചറിയിലേക്ക് മാറ്റി.

ഇടുക്കിയിൽ തൊഴിലാളി സ്ത്രീ മരിച്ചു: ഇടുക്കി പാമ്പാടുംപാറയിൽ മരം വീണ് മധ്യപ്രദേശ് സ്വദേശിനി മാലതി മരിച്ചു. രാമക്കൽമേട് തോവാളപടിയിൽ ശക്തമായ മഴയിൽ നിയന്ത്രണം വിട്ട കാർ മറിഞ്ഞെങ്കിലും യാത്രക്കാർ പരുക്കില്ലാതെ രക്ഷപ്പെട്ടു. മലങ്കര അണക്കെട്ടിന്റെ ഷട്ടറുകൾ മുന്നറിയിപ്പില്ലാതെ തുറന്നതിനാൽ പ്രദേശവാസികൾ ജാഗ്രത പാലിക്കണമെന്ന് നിർദേശം.

തൃശൂർ മിന്നൽ ചുഴലി: തൃശൂർ അരിമ്പൂർ കോൾപാടശേഖരത്തിൽ മിന്നൽ ചുഴലി ആഞ്ഞടിച്ചു. 100 ഏക്കർ വരുന്ന തോട്ടുപുര പാടശേഖരത്തിലെ പമ്പ് ഹൗസും മോട്ടോർ ഷെഡ്ഡിന്റെ മേൽക്കൂരയും തകർന്നു. ട്രസ്സ് വർക്ക് ചെയ്ത ഇരുമ്പ് ഫ്രെയിമുകൾ കാറ്റിൽ പറന്നുപോയി. ചെറുതുരുത്തിയിൽ ഓടിക്കൊണ്ടിരുന്ന ട്രെയിനിന് മുകളിൽ മരക്കൊമ്പ് വീണ് ഒരു മണിക്കൂറോളം ഗതാഗതം തടസ്സപ്പെട്ടു. കാര്യാട്ടുകരയിൽ ഗീത ഗോപിയുടെ വീടിന് മുകളിൽ തെങ്ങ് വീണ് രണ്ടാം നിലയ്ക്ക് കേടുപാടുകൾ സംഭവിച്ചു. ചെന്ത്രാപ്പിന്നി പപ്പടം നഗറിൽ തോട് കവിഞ്ഞൊഴുകി മുപ്പതോളം വീടുകളിൽ വെള്ളം കയറി. ദേശീയപാത ബൈപ്പാസ് നിർമ്മാണം തോടുകൾ അടയ്ക്കാൻ കാരണമായതാണ് വെള്ളക്കെട്ടിന് വഴിയൊരുക്കിയത്.

വയനാട്ടിൽ ഫെസ്റ്റ് നിർത്തിവെച്ചു: വയനാട്ടിൽ മഴ ശക്തമായതോടെ വൈത്തിരി ഫെസ്റ്റ് മാസം 31 വരെ നിർത്തിവെച്ചു. മുത്തങ്ങയിൽ വൈദ്യുതി പോസ്റ്റ് തകർത്ത് മരം വീണതിനെ തുടർന്ന് കെഎസ്ആർടിസി ബസ് മരത്തിനിടയിൽ കുടുങ്ങി. സുൽത്താൻ ബത്തേരിയിൽ മരക്കൊമ്പ് പൊട്ടിവീണ് വിദ്യാർത്ഥിനി നമിതയ്ക്ക് പരുക്കേറ്റു. മടക്കിമല ഗവൺമെന്റ് സ്കൂളിന്റെ ചുറ്റുമതിൽ 20 മീറ്റർ ഇടിഞ്ഞു. 28 അംഗ എൻഡിആർഎഫ് സംഘം വയനാട്ടിലെത്തി.

എറണാകുളത്ത് ഷട്ടറുകൾ ഉയർത്തി: ഭൂതത്താൻകെട്ട് ഡാമിന്റെ നാല് ഷട്ടറുകൾ ഉയർത്തി, സെക്കൻഡിൽ 2 ലക്ഷം ലിറ്റർ വെള്ളം പുറത്തേക്ക് ഒഴുക്കുന്നു. പെരിയാറിന്റെ തീരത്തുള്ളവർ ജാഗ്രത പാലിക്കണമെന്ന് മുന്നറിയിപ്പ്.

കണ്ണൂർ, മലപ്പുറം, പാലക്കാട്: കണ്ണൂർ ആലക്കോട് രണ്ട് വീടുകൾ തകർന്നു. കുപ്പത്ത് ദേശീയപാതയിൽ മണ്ണിടിച്ചിൽ ഗതാഗതം തടസ്സപ്പെടുത്തി. മലപ്പുറം പൊന്നാനിയിൽ കടലാക്രമണം രൂക്ഷമായി, അഞ്ച് കുടുംബങ്ങളെ മാറ്റിപ്പാർപ്പിച്ചു. പറപ്പൂർ ചോലക്കുണ്ടിൽ മണ്ണിടിച്ചിലിൽ ഒരു വീട് പൂർണമായും രണ്ട് വീടുകൾ ഭാഗികമായും തകർന്നു. പാലക്കാട് കുളപ്പുള്ളി പാതയിൽ മണ്ണിടിച്ചിൽ ഗതാഗത നിയന്ത്രണത്തിന് കാരണമായി.

പത്തനംതിട്ട, കൊല്ലം, ആലപ്പുഴ: പത്തനംതിട്ടയിൽ പമ്പ ചാലക്കയം റോഡിലും വടശ്ശേരിക്കര ചിറ്റാർ റോഡിലും മരങ്ങൾ വീണ് ഗതാഗതം തടസ്സപ്പെട്ടു. കൊല്ലത്ത് പുനലൂർ, കൊട്ടാരക്കര, ഏരൂർ, കുളത്തൂപ്പുഴ എന്നിവിടങ്ങളിൽ മരം വീണ് വീടുകൾ തകർന്നു. ആലപ്പുഴയിൽ കുറുങ്ങാട് റംലത്തിന്റെ വീട് തകർന്ന് കുടുംബാംഗങ്ങൾക്ക് പരുക്കേറ്റു.

കാലാവസ്ഥാ മുന്നറിയിപ്പ്: മലപ്പുറം മുതൽ കാസർകോട് വരെ അഞ്ച് ജില്ലകളിൽ റെഡ് അലർട്ട് തുടരുന്നു. ഒൻപത് ജില്ലകളിൽ ഓറഞ്ച് അലർട്ട് പ്രഖ്യാപിച്ചു. അതിതീവ്ര മഴയും കടൽക്ഷോഭവും തുടരുന്നതിനാൽ ജനങ്ങൾ ജാഗ്രത പാലിക്കണമെന്ന് അധികൃതർ അറിയിച്ചു.