തിരുവനന്തപുരം: പോക്‌സോ കേസില്‍ പ്രതികളായ ഒന്‍പത് അധ്യാപകരെ പിരിച്ചുവിട്ടതായി വിദ്യാഭ്യാസ മന്ത്രി വി ശിവന്‍കുട്ടി. വിദ്യാര്‍ഥികള്‍ക്കൊപ്പമാണ് വിദ്യാഭ്യാസ വകുപ്പെന്നും, നമ്മുടെ മക്കളെ ഉപദ്രവിക്കാന്‍ അനുവദിക്കില്ലെന്നും മന്ത്രി പറഞ്ഞു. ഇനിയും ചിലര്‍ ബാക്കിയുണ്ടെന്നും, അവര്‍ക്കെതിരെ ശക്തമായ നടപടിയുണ്ടാകുമെന്നും മന്ത്രി പറഞ്ഞു. പൊലിസ് അസോസിയേഷന്‍ സംസ്ഥാന സമ്മേളനം ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം. 

മക്കളുടെ ഭാഗത്ത് നിന്ന് പരാതി ഉയര്‍ന്നാല്‍ വിട്ടുവീഴ്ച്ചയില്ലാതെ നടപടിയെടുക്കും. പ്രതികള്‍ക്ക് ശിക്ഷ വാങ്ങിക്കൊടുക്കാന്‍ വിദ്യാഭ്യാസ വകുപ്പ് ഒപ്പം നില്‍ക്കും, പൊലിസും ഒപ്പം നില്‍ക്കണമെന്നും മന്ത്രി പറഞ്ഞു. 

ഇന്നും വിദ്യാഭ്യാസ കച്ചവടം നമുക്കിടയില്‍ നടക്കുന്നുണ്ട്. ഇതിനെതിരെ മുന്നറിയിപ്പ് നല്‍കണം. എന്‍ഒസി നല്‍കുന്നത് സര്‍ക്കാരാണ്. അത് പിന്‍വലിക്കാനുള്ള അവകാശവും സര്‍ക്കാരിനുണ്ട്.' മന്ത്രി കൂട്ടിച്ചേര്‍ത്തു.