ന്യൂഡൽഹി: പാകിസ്ഥാൻ ഇന്റലിജൻസ് ഉദ്യോഗസ്ഥരുമായി തന്ത്രപ്രധാനമായ വിവരങ്ങൾ പങ്കുവെച്ചതിന് ഒരു സി‌ആർ‌പി‌എഫ് ഉദ്യോഗസ്ഥനെ ദേശീയ അന്വേഷണ ഏജൻസി (എൻ‌.ഐ‌.എ) അറസ്റ്റ് ചെയ്തു. മോത്തി റാം ജാട്ട് എന്നയാളെയാണ് പിടികൂടിയത്. ഇയാൾ പാകിസ്ഥാന് വേണ്ടി ചാരവൃത്തിയിൽ ഏർപ്പെട്ടിരുന്നുവെന്നും 2023 മുതൽ ദേശീയ സുരക്ഷയെക്കുറിച്ചുള്ള രഹസ്യ വിവരങ്ങൾ പാകിസ്ഥാൻ രഹസ്യാന്വേഷണ ഉദ്യോഗസ്ഥരുമായി പങ്കുവെച്ചിരുന്നുവെന്നും എൻ.ഐ.എ പ്രസ്താവനയിൽ പറഞ്ഞു.

"പ്രതിയായ മോത്തി റാം ജാട്ട് ചാരവൃത്തിയിൽ സജീവമായി ഏർപ്പെട്ടിരുന്നു. ഇയാൾ 2023 മുതൽ ദേശീയ സുരക്ഷയുമായി ബന്ധപ്പെട്ട രഹസ്യ വിവരങ്ങൾ പാകിസ്ഥാൻ ഇന്റലിജൻസ് ഓഫീസർമാരുമായി (പി.ഐ.ഒ) പങ്കുവെച്ചിരുന്നു. വിവിധ മാർഗങ്ങളിലൂടെ പി.ഐ.ഒമാരിൽ നിന്ന് അയാൾക്ക് ഫണ്ട് ലഭിക്കുന്നുണ്ടെന്ന് ഏജൻസി കണ്ടെത്തിയിട്ടുണ്ട്" എൻ.ഐ.എ പ്രസ്താവനയിൽ പറഞ്ഞു. 

"സുരക്ഷാ സേന നടത്തിയ ഓപ്പറേഷനുകളെക്കുറിച്ചുള്ള രഹസ്യാന്വേഷണ വിവരങ്ങൾ, സുരക്ഷാ സംവിധാനങ്ങളുടെ സ്ഥാനം എന്നിവയെക്കുറിച്ചുള്ള സെൻസിറ്റീവ് വിവരങ്ങൾ പാകിസ്ഥാൻ രഹസ്യാന്വേഷണ പ്രവർത്തകർക്ക് പണത്തിനു പകരമായി കൈമാറി ചാരവൃത്തിയിൽ ഏർപ്പെട്ടതിനാണ് അദ്ദേഹത്തെ അറസ്റ്റ് ചെയ്തിരിക്കുന്നത്" എന്ന് വൃത്തങ്ങൾ പറഞ്ഞു.

ഡൽഹിയിൽ നിന്നാണ് പ്രതിയെ അറസ്റ്റ് ചെയ്തത്. ജൂൺ 6 വരെ ഇയാളെ പട്യാല ഹൗസ് കോടതി എൻ.ഐ.എ കസ്റ്റഡിയിൽ വിട്ടു. പ്രതിയെ ചോദ്യം ചെയ്യൽ പുരോഗമിക്കുകയാണെന്ന് ഏജൻസി അറിയിച്ചു. പഹൽഗാം ഭീകരാക്രമണവുമായി ബന്ധപ്പെട്ട് ഇന്ത്യയും പാകിസ്ഥാനും തമ്മിലുള്ള സായുധ സംഘട്ടനത്തെത്തുടർന്ന്, അട്ടിമറി പ്രവർത്തനങ്ങൾ സുരക്ഷാ ഏജൻസികൾ നിരീക്ഷിക്കുന്ന സാഹചര്യത്തിലാണ് എൻ‌.ഐ‌.എ പ്രതിയെ കസ്റ്റഡിയിലെടുക്കുന്നത്.

അതേസമയം, എൻ‌.ഐ‌.എയ്ക്ക് കൈമാറുന്നതിന് മുമ്പ് സി‌.ആർ‌.പി‌.എഫ് ഉദ്യോഗസ്ഥരും കേന്ദ്ര ഇന്റലിജൻസ് ഏജൻസികളിലെ ഉദ്യോഗസ്ഥരും മോത്തി റാമിനെ ചോദ്യം ചെയ്തിരുന്നതായി ദി പ്രിന്റ് റിപ്പോർട്ട് ചെയ്യുന്നു. വെള്ളിയാഴ്ച പിടികൂടിയ ഇയാളെ ചോദ്യം ചെയ്യലിന് ശേഷം ഇന്ന് എൻ.ഐ.എയ്ക്ക് കൈമാറുകയായിരുന്നു. ഇയാളെ വെള്ളിയാഴ്ച തന്നെ സർവീസിൽ നിന്ന് പിരിച്ചുവിട്ടതായി ഒരു മുതിർന്ന സിആർപിഎഫ് ഉദ്യോഗസ്ഥൻ സ്ഥിരീകരിച്ചു.

നിയമവിരുദ്ധ പ്രവർത്തനങ്ങൾ (തടയൽ) നിയമത്തിലെയും ഭാരതീയ ന്യായ് സംഹിതയിലെയും പ്രസക്തമായ വ്യവസ്ഥകൾ പ്രകാരം കേസെടുത്തതിന് ശേഷമാണ് തീവ്രവാദ വിരുദ്ധ ഏജൻസി അയാളെ അറസ്റ്റ് ചെയ്തത്.

അതേസമയം, ഈ മാസം, പഞ്ചാബ്, ഹരിയാന, ഉത്തർപ്രദേശ് എന്നിവിടങ്ങളിൽ നിന്ന് രണ്ടാഴ്ചയ്ക്കിടെ ചാരവൃത്തി ആരോപിച്ച് കുറഞ്ഞത് 19 പേരെയെങ്കിലും അറസ്റ്റ് ചെയ്തിട്ടുണ്ട്. ഉത്തരേന്ത്യയിൽ പ്രവർത്തിക്കുന്ന, പാകിസ്ഥാനുമായി ബന്ധമുള്ള ഒരു ചാര ശൃംഖലയിലേക്കാണ് അന്വേഷണങ്ങൾ വിരൽ ചൂണ്ടുന്നത്. അറസ്റ്റിലായ വ്യക്തിയിൽ പാകിസ്ഥാൻ എംബസി ജീവനക്കാരനുമായി ബന്ധപ്പെട്ടിരുന്ന യൂട്യൂബർ ജ്യോതി മൽഹോത്രയും ഉൾപ്പെടുന്നു.