കൊല്ലം: അറബിക്കടലില്‍ മുങ്ങിയ ലൈബീരിയന്‍ കപ്പലില്‍ നിന്ന് ഇതുവരെ കേരള തീരത്തടിഞ്ഞ കണ്ടയ്‌നറുകളുടെ എണ്ണം 27 ആയി. കൊല്ലം, ആലപ്പുഴ തീരങ്ങളിലാണ് കണ്ടയ്‌നറുകള്‍ എത്തിയത്. ഇതില്‍ 4 എണ്ണത്തില്‍ അപകടകരമല്ലാത്ത വസ്തുക്കള്‍ കണ്ടെത്തി. മറ്റുള്ളവ കാലിയായ നിലയിലാണ്. 

ശക്തിക്കുളങ്ങര, ചെറിയഴീക്കല്‍, നീണ്ടകര തുടങ്ങിയ തീരങ്ങളിലാണ് ഇതുവരെ കണ്ടയ്‌നറുകള്‍ അടിഞ്ഞത്. കൂടുതല്‍ കണ്ടയ്‌നറുകള്‍ തീരത്തെത്താനുള്ള സാധ്യതയുണ്ട്. ജനങ്ങള്‍ ജാഗ്രത തുടരണമെന്നും, കണ്ടയ്‌നറുകള്‍ക്ക് സമീപം പോവരുതെന്നും മുന്നറിയിപ്പുണ്ട്. 

അതേസമയം കപ്പലില്‍ നിന്ന് തീരത്തടിഞ്ഞ കണ്ടയ്‌നറുകള്‍ പിടിച്ചെടുക്കാനാണ് കസ്റ്റംസ് തീരുമാനം. തീരത്തടിയുന്ന ചരക്കുകള്‍ ഇറക്കുമതിയായി കണക്കാക്കി ചുങ്കം ചുമത്തണമെന്നാണ് കസ്റ്റംസ് നിയമം. ഇതിന്റെ അടിസ്ഥാനത്തില്‍ പിടിച്ചെടുക്കുന്ന സാധനങ്ങള്‍ വിട്ടുകിട്ടണമെങ്കില്‍ കപ്പല്‍ കമ്പനിയായ എംഎസ് സി നികുതി കെട്ടിവെക്കേണ്ടി വരും. അല്ലെങ്കില്‍ ചരക്കുകള്‍ കണ്ടുകെട്ടാനാണ് തീരുമാനം. ഇന്നലെ രാത്രി നടന്ന കസ്റ്റംസ് ഉദ്യോഗസ്ഥരുടെ യോഗത്തിലാണ് ഇക്കാര്യം തീരുമാനമായത്.

അതേസമയം കപ്പലിലെ ഉദ്യോഗസ്ഥര്‍ തീരത്തടിഞ്ഞ കണ്ടയ്‌നറുകളില്‍ പരിശോധന നടത്തി. കൊല്ലത്തെ തീരത്തടിഞ്ഞ കണ്ടയ്‌നറുകള്‍ കടല്‍ മാര്‍ഗം കൊണ്ടുപോകാനാണ് തീരുമാനം. റോഡ് മാര്‍ഗം കൊണ്ടുപോവുന്നത് പ്രയാസമാണെന്നാണ് വിലയിരുത്തല്‍. തീരത്ത് കസ്റ്റംസ് പെട്രോളിങ് ശക്തമാക്കിയിട്ടുണ്ട്. ശക്തികുളങ്ങരയില്‍ തീരത്ത് അടിഞ്ഞ കണ്ടയ്‌നറുകള്‍ ബോട്ടുകള്‍ ഉപയോഗിച്ച് കെട്ടിവലിച്ച് കൊല്ലം പോര്‍ട്ടിലേക്ക് മാറ്റാനും തീരുമാനമായിട്ടുണ്ട്.