ഡൽഹി: 2025 ഐപിഎല്ലിലെ അവസാന മത്സരത്തിൽ നിലവിലെ ചാമ്പ്യന്മാരായ കൊൽക്കത്ത നൈറ്റ് റൈഡേഴ്സിനെതിരെ 110 റൺസിന്റെ കൂറ്റൻ വിജയമാണ് സൺറൈസേഴ്സ് ഹൈദരാബാദ് സ്വന്തമാക്കിയത്. ഡൽഹി അരുൺ ജെയ്റ്റ്ലി സ്റ്റേഡിയത്തിൽ നടന്ന മത്സരത്തിൽ ആദ്യം ബാറ്റ് ചെയ്ത ഹൈദരാബാദ് 20 ഓവറിൽ മൂന്ന് വിക്കറ്റ് നഷ്ടത്തിൽ 278 റൺസ് എന്ന വലിയ ടോട്ടൽ ആണ് കൊൽക്കത്തക്ക് മുന്നിൽ ഉയർത്തിയത്. വിജയലക്ഷ്യം പിന്തുടർന്നിറങ്ങിയ കൊൽക്കത്ത 168 റൺസിന് പുറത്താവുകയായിരുന്നു. 

മത്സരത്തിൽ ഓറഞ്ച് ആർമിക്ക് വേണ്ടി ഹെൻറിച്ച് ക്ലാസൻ സെഞ്ച്വറി നേടി തകർപ്പൻ പ്രകടനമാണ് കാഴ്ചവെച്ചത്. 39 പന്തിൽ പുറത്താവാതെ 105 റൺസ് നേടികൊണ്ടായിരുന്നു ക്ലാസന്റെ വെടിക്കെട്ട് ഇന്നിങ്‌സ്. ഏഴ് ഫോറുകളും ഒമ്പത് കൂറ്റൻ സിക്സുകൾ അടങ്ങുന്നതായിരുന്നു താരത്തിന്റെ സെഞ്ച്വറി. ഈ സെഞ്ച്വറി നേടിയതോടെ മറ്റൊരു തകർപ്പൻ റെക്കോർഡ് കൂടിയാണ് ക്ലാസൻ സ്വന്തമാക്കിയത്.

ഐപിഎല്ലിൽ ഓപ്പണർമാർ അല്ലാതെ സെഞ്ച്വറി നേടിയ താരങ്ങളുടെ പട്ടികയിലാണ് ക്ലാസൻ ഇടം നേടിയത്. ഐപിഎല്ലിൽ ഓപ്പണർമാർ അല്ലാതെ ഏറ്റവും കൂടുതൽ സെഞ്ച്വറി നേടുന്ന താരമെന്ന സൂര്യകുമാർ യാദവിന്റെ റെക്കോർഡിനൊപ്പമെത്താനാണ് ക്ലാസന് സാധിച്ചത്. ഇരു താരങ്ങളും രണ്ടു തവണയാണ് ഐപിഎല്ലിൽ സെഞ്ച്വറി നേടിയത്. ഈ നേട്ടത്തിൽ ഒന്നാം സ്ഥാനത്തുള്ളത് മുൻ സൗത്ത് ആഫ്രിക്കൻ താരം എബി ഡിവില്ലിയേഴ്സും  മലയാളി സൂപ്പർ താരം സഞ്ജു സാംസണുമാണ്. ഇരുവരും മൂന്ന് സെഞ്ച്വറികളാണ് ഐപിഎല്ലിൽ നേടിയത്. 

അതേസമയം മത്സരത്തിൽ ഹൈദരാബാദിന് വേണ്ടി ട്രാവിസ് ഹെഡ് 40 പന്തിൽ 70 റൺസും നേടി മികച്ച പ്രകടനം നടത്തി. ആറ് വീതം ഫോറുകളും സിക്സുകളും അടങ്ങുന്നതാണ് താരത്തിന്റെ ഇന്നിംഗ്സ്. ഹൈദരാബാദ് ബൗളിങ്ങിൽ ഹർഷ് ദുബെ, ഇഷാൻ മലിംഗ, ജയദേവ് ഉനദ്കട്ട് എന്നിവർ മൂന്ന് വീതം വിക്കറ്റുകൾ നേടി തകർപ്പൻ ബൗളിംഗ് പ്രകടനം നടത്തിയപ്പോൾ കൊൽക്കത്തയുടെ ബാറ്റിംഗ് നിര തകരുകയായിരുന്നു.