അടുത്ത മാസം മുതൽ ആരംഭിക്കുന്ന ഫിഫ ക്ലബ് ലോകകപ്പിന് മുന്നോടിയായി പോർച്ചുഗീസ് ഇതിഹാസം ക്രിസ്റ്റ്യാനോ റൊണാൾഡോയെ ചെൽസി സൈൻ ചെയ്യണമെന്ന് ആവശ്യപ്പെട്ടിരിക്കുകയാണ് മാഞ്ചസ്റ്റർ യുണൈറ്റഡ് ഇതിഹാസം ഡ്വൈറ്റ് യോർക്ക്. റൊണാൾഡോ ചെൽസിക്ക് അനുയോജ്യനായ ഒരു താരമായിരിക്കുമെന്നാണ് ഡ്വൈറ്റ് യോർക്ക് അഭിപ്രായപ്പെട്ടത്.

''നിങ്ങൾ എന്തുകൊണ്ടാണ് ഈ കാര്യം ചെയ്യുന്നില്ല? റൊണാൾഡോയുടെ കഴിവ് നോക്കുമ്പോൾ അദ്ദേഹത്തിന് ഇപ്പോഴും ടീമിനായി പലതും ചെയ്യാൻ സാധിക്കും.  അദ്ദേഹം ഇപ്പോഴും അവിശ്വസനീയമായ ഒരു ഫോർവേഡാണ്. ചെൽസിയുടെ ഒമ്പതാം നമ്പർ പൊസിഷനിൽ കളിക്കുന്ന താരങ്ങൾ അത്ര മികച്ചതല്ലെന്ന് എനിക്ക് പറയാൻ കഴിയും. അതിനാൽ റൊണാൾഡോയെ ചെൽസി കൊണ്ടുവരണം എന്ന് ഞാൻ പറയുന്നതിന്റെ കാരണം ഇതാണ്'' മുൻ മാഞ്ചസ്റ്റർ യുണൈറ്റഡ് താരം ഗോളിന് നൽകിയ അഭിമുഖത്തിൽ സംസാരിച്ചു. 

അൽ നസറിനൊപ്പമുള്ള റൊണാൾഡോയുടെ ഭാവിയെന്താകുമെന്നാണ് ഫുട്ബോൾ ലോകം ഉറ്റുനോക്കുന്നത്. റൊണാൾഡോ ഈ സീസൺ അവസാനത്തോടെ അൽ നസർ വിടുമെന്ന റിപ്പോർട്ടുകൾ നിലനിൽക്കുന്നുണ്ട്. അൽ അഹ്ലി, പാൽമിറാസ്, ചെൽസി എന്നീ ടീമുകൾ താരത്തെ സ്വന്തമാക്കാൻ ശ്രമിക്കുന്നുവെന്നും റിപ്പോർട്ടുകൾ നിലനിൽക്കുന്നുണ്ട്. വരാനിരിക്കുന്ന ഫിഫ ക്ലബ് ലോകകപ്പിൽ ഈ മൂന്ന് ക്ലബ്ബുകളും കളിക്കുന്നുണ്ട്. അതുകൊണ്ട് തന്നെ റൊണാൾഡോ ഈ ടൂർണമെന്റ് കളിക്കാനായി അൽ നസർ വിടാനുള്ള സാധ്യതകളും നിലനിൽക്കുന്നുണ്ട്. 

അൽ നസർ പരിശീലകൻ സ്റ്റെഫാനോ പിയോലിയുടെ തന്ത്രങ്ങളിൽ റൊണാൾഡോ തൃപ്തനല്ലെന്നും, ക്ലബുമായുള്ള കരാർ പുതുക്കുന്നതിന് മുൻപ് കോച്ച് പിയോലിയെയും സ്‌പോർട്ടിംഗ് ഡയറക്ടർ ഫെർണാണ്ടോ ഹിയേറോയെയും നീക്കം ചെയ്യണമെന്നും റൊണാൾഡോ ആവശ്യപ്പെട്ടതായി വാർത്തകളും നിലനിൽക്കുന്നുണ്ട്. 

2022ലാണ് റൊണാൾഡോ മാഞ്ചസ്റ്റർ യുണൈറ്റഡിൽ നിന്നും അൽ നസറിലെത്തുന്നത്  റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. 

Former Manchester United Player Talks Chelsea will sign Cristaino Ronaldo