കോഴിക്കോട്: കക്കയം പവർ ഹൗസിൽ വലിയൊരു അപകടമാണ് കഴിഞ്ഞ ദിവസം നടന്നത്. ശക്തമായ മഴയിലൂടെ താഴോട്ടു ഉരുണ്ടിറങ്ങിയ ഭീമന്‍ പാറക്കല്ല് കെഎസ്ഇബിയുടെ നിയന്ത്രണത്തിലുള്ള പെൻസ്റ്റോക്ക് പൈപ്പിൽ തട്ടി തകരാർ സംഭവിക്കുകയായിരുന്നു. പകൽ 12 മണിയോടെയാണ് സംഭവം.

ഭീമന്‍ പാറക്കല്ലിന്റെ ഇടിയുടെ ആഘാതത്തിൽ, പെൻസ്റ്റോക്ക് പൈപ്പിന്റെ റോക്കർ സപ്പോർട്ടുകൾ തകർന്നതോടെയാണ് വൈദ്യുതി ഉത്പാദനം താത്കാലികമായി നിർത്തേണ്ടിവന്നത്. എബി 12നും 13നും ഇടയിലുള്ള നാല് റോക്കർ സപ്പോർട്ടുകൾ തകർന്നതോടെ പൈപ്പ് സ്ഥാപിച്ച കോൺക്രീറ്റ് അടിത്തട്ടിനും കേടുപാട് ഉണ്ടായിട്ടുണ്ട്.

നിലവിൽ കക്കയം പവർഹൗസിൽ ഏകദേശം 100 മെഗാവാട്ട് വൈദ്യുതി ഉത്പാദിപ്പിക്കുന്നുണ്ട്. എന്നാൽ അപകടത്തെ തുടർന്ന് ഉത്പാദനം പൂര്‍ണ്ണമായി നിലച്ചിരിക്കുകയാണ്.

മെയിന്റെനെൻസ് പ്രവർത്തനങ്ങൾ പുരോഗമിക്കുകയാണെന്നും, പൈപ്പിന്റെ ദൗർബല്യം പരിഹരിച്ച് ബലപ്പെടുത്തേണ്ടതുണ്ടെന്നും അസിസ്റ്റന്റ് എക്സിക്യൂട്ടീവ് എഞ്ചിനിയർ സലീം അറിയിച്ചു. പൂർണ്ണമായ അറ്റകുറ്റപ്പണികൾക്ക് ഒരു ആഴ്ചയെങ്കിലും എടുക്കാമെന്നാണ് അധികൃതരുടെ വിലയിരുത്തൽ. പൈപ്പ് പൂർണ്ണമായി സുരക്ഷിതമായതിന് ശേഷമേ വെള്ളം വീണ്ടും ഒഴുക്കിവിടാൻ കഴിയൂ എന്നും അദ്ദേഹം വ്യക്തമാക്കി.

A massive boulder dislodged by heavy rains struck the penstock pipe at Kakkayam Power House in Kozhikode, causing significant damage. Four rocker supports between AB12 and AB13 were destroyed, and the concrete block supporting the pipe was also damaged. As a result, the 100 MW power generation at the facility has been completely halted. According to Assistant Executive Engineer Saleem, repairs may take at least a week to complete, and water can be rerouted only after the pipe is reinforced.