മലപ്പുറം: നിലമ്പൂർ നിയമസഭാ മണ്ഡലത്തിൽ പി.വി അൻവർ രാജിവച്ച ഒഴിവിലേക്ക് ഉപതെരഞ്ഞെടുപ്പ് പ്രഖ്യാപിച്ചതോടെ കേരള നിയമസഭയിലേക്ക് ഇനി നടക്കാനിരിക്കുന്നത് 69ാമത് ഉപതെരഞ്ഞെടുപ്പ്. ഏഴ്,14 നിയമസഭകളിലേക്കാണ് ഏറ്റവും കൂടുതൽ ഉപതെരഞ്ഞെടുപ്പുകൾ നടന്നത്. എട്ടു വീതം. ഒന്നും ആറും നിയമസഭകളിലേക്ക് ഓരോന്നും രണ്ട്, മൂന്ന്, അഞ്ച്, 10 സഭകളിലേക്ക് ആറു വീതം ഉപതെരഞ്ഞെടുപ്പുകളും നടന്നു.

ഒമ്പത്,11,12 സഭകളിലേക്ക് നാലുവീതവും നാല്, എട്ട്, 13 സഭകളിലേക്ക് യഥാക്രമം 5,2,3 ഉപതെരഞ്ഞെടുപ്പുകളുമാണ് നടന്നത്. എറണാംകുളം മണ്ഡലത്തിലാണ് സംസ്ഥാന ചരിത്രത്തിൽ ഏറ്റവും കൂടുതൽ ഉപതെരഞ്ഞെടുപ്പുകൾ നടന്നത്. മൂന്നെണ്ണം. ഇത് കൂടാതെ പൊതുതെരഞ്ഞെടുപ്പുകളിലെ (1987-1991) സ്ഥാനാർഥികളുടെ മരണം മൂലം കോട്ടയം,വാമനപുരം,ഏറ്റുമാനൂർ എന്നീ മൂന്നു നിയോജക മണ്ഡലങ്ങളിൽ തെരഞ്ഞെടുപ്പുകൾ മാറ്റിവെച്ചിട്ടുണ്ട്. 

മൂന്നാമത്തെ ഉപതെരഞ്ഞെടുപ്പാണ് നിലമ്പൂർ നിയമസഭാ മണ്ഡലത്തിൽ നടക്കാനിരിക്കുന്നത്. ഇതോടെ ഏറ്റവും കൂടുതൽ ഉപതെരഞ്ഞെടുപ്പ് എന്ന ഖ്യാതിയിലേക്ക് ഇനി നിലമ്പൂർ നിയമസഭാ മണ്ഡലവും കടന്നുവരും. രണ്ടാം പിണറായി സർക്കാരിന്റെ കാലത്ത്  നാലു ഉപതെരഞ്ഞെടുപ്പുകളാണ് സംസ്ഥാനത്ത് നടന്നത്.