കൊച്ചി: ഇന്നലെ കൊച്ചിയില്‍ നിന്ന് കാണാതായ എട്ടാം ക്ലാസ് വിദ്യാര്‍ത്ഥിയെ ഇടുക്കി തൊടുപുഴയില്‍ നിന്ന് കണ്ടെത്തി. ഇടപ്പള്ളിയിലെ സ്വകാര്യ സ്‌കൂളിലെ വിദ്യാര്‍ഥിയായ മുഹമ്മദ് ഷിഫാനെ (14) ഇന്നലെ മുതല്‍ കാണാതായിരുന്നു. തൊടുപുഴ ബസ് സ്റ്റാന്റിനു സമീപത്തു നിന്നാണ് കുട്ടിയെ കണ്ടെത്തിയത്. കുട്ടിയുടെ മാതാപിതാക്കള്‍ തൊടുപുഴ പൊലിസ് സ്റ്റേഷനില്‍ എത്തി. കുട്ടിയെ കണ്ടെത്തുന്ന സമയം കുട്ടിയോടൊപ്പം മറ്റൊരാളുമുണ്ടായിരുന്നു. ഇയാള്‍ ആരാണെന്ന് പൊലിസ് അന്വേഷിക്കുന്നുണ്ട്. കുട്ടിയില്‍ നിന്നും പൊലിസ് കൂടുതല്‍ കാര്യങ്ങള്‍ ചോദിച്ചറിയുകയാണ്. 

ഇടപള്ളിയിലെ സ്വകാര്യ സ്‌കൂളിലെ എട്ടാം ക്ലാസ് വിദ്യാര്‍ത്ഥിയാണ് കുട്ടി. ഇന്നലെ രാവിലെ സേ പരീക്ഷ എഴുതാന്‍ പോയ കുട്ടി രാത്രി വൈകിയും തിരിച്ചെത്തിയിരുന്നില്ല. കുട്ടിയുടെ കുടുംബം എളമക്കര പൊലിസ് സ്റ്റേഷനില്‍ പരാതി നല്‍കിയതിനു പിന്നാലെയാണ് അന്വേഷണം ശക്തമാക്കിയത്. കൊച്ചി നഗരത്തില്‍ ഉടനീളം പൊലിസ് തിരച്ചില്‍ നടത്തിയിരുന്നെങ്കിലും ഇന്നലെ കുട്ടിയെ കണ്ടെത്താനായിരുന്നില്ല. എന്നാല്‍ ഇടപള്ളി ലുലു മാളിനു സമീപമുള്ള വഴിയിലൂടെ കുട്ടി നടന്നുപോകുന്നതിന്റെ സിസിടിവി ദൃശ്യങ്ങള്‍ ലഭിച്ചിരുന്നു. 

കുട്ടി രാവിലെ 8നാണ് സ്‌കൂളിലേക്ക് പരീക്ഷ എഴുതാനായി പോയത്. എന്നാല്‍ ഒമ്പതരയോടെ തന്നെ കുട്ടി പരീക്ഷാ ഹാള്‍ വിട്ടിരുന്നു. തിരുവനന്തപുരത്തെ ബന്ധുവീട്ടിലേക്ക് പോയെന്ന് സംശയിച്ചെങ്കിലും കുട്ടി അവിടെ എത്തിയതായി വിവരമൊന്നും ലഭിച്ചിരുന്നില്ല.