കൊച്ചി: കടവന്ത്രയിൽ നിന്ന് കാണാതായി തൊടുപുഴയിൽ കണ്ടെത്തിയ പതിമൂന്നുകാരനെ ഉപദ്രവിച്ച കൈനോട്ടക്കാരനെതിരെ പോക്‌സോ കേസെടുത്ത് പൊലിസ്. തൊടുപുഴ വാഴക്കാലായിൽ നടക്കുന്ന സീരിയലിന്റെ ഷൂട്ടിങ് കാണാനായാണ് കുട്ടി പോയതെന്നാണ് വിവരം. ഇടപ്പള്ളിയിലെ സ്വകാര്യ സ്കൂളിൽ പരീക്ഷയ്ക്ക് പോയ കുട്ടിയെ പിന്നീട് കാണാതാവുകയായിരുന്നു. പിന്നീട് നടത്തിയ തിരച്ചിലിലാണ് കണ്ടെത്തിയത്. കുട്ടി സഹായം ചോദിച്ച കൈനോട്ടക്കാരൻ ആദ്യം കുട്ടിയെ ആക്രമിക്കുകയും പിന്നീട് ഇയാൾ തന്നെയാണ് രക്ഷിതാക്കളെ വിളിച്ച് കുട്ടി തൊടുപുഴയിൽ ഉള്ള വിവരം പറഞ്ഞതും. പോലിസെത്തി ചോദ്യം ചെയ്തതോടെയാണ് സംഭവം പുറത്തറിഞ്ഞത്.

ഇന്നലെ രാവിലെ എട്ട് മണിക്ക് കുട്ടി സേ പരീക്ഷ എഴുതാൻ സ്‌കൂളിലേക്ക് പോയിരുന്നു. ഒൻപതരയോടെ പരീക്ഷ കഴിഞ്ഞ് പുറത്തിറങ്ങിയ കുട്ടി ശേഷം ഷൂട്ടിങ് കാണാനായി തൊടുപുഴയ്ക്ക് പോവുകയായിരുന്നുവെന്നാണ് കരുതുന്നത്. എന്നാൽ രാത്രിയായിട്ടും വീട്ടിൽ തിരിച്ചെത്താത്തതിനെ തുടർന്ന് വീട്ടുകാർ പൊലിസിൽ പരാതിപ്പെടുകയായിരുന്നു. പരാതിപ്പെടുന്നതിന് മുൻപു തന്നെ വീട്ടുകാർ സ്വന്തം നിലയിൽ അന്വേഷണം നടത്തിയെങ്കിലും കണ്ടത്താനായില്ല.

എന്നാൽ, തൊടുപുഴയിൽ എത്തിയ കുട്ടി വൈകിട്ട് ആറുമണിയോടെ തൊടുപുഴ ബസ് സ്റ്റാൻഡ് പരിസരത്തേക്ക് എത്തി. നേരം ഇരുട്ടാൻ തുടങ്ങിയതോടെ ഭയപ്പെട്ട കുട്ടി, അടുത്തുകണ്ട കൈനോട്ടക്കാരൻ ശശികുമാറിനോട് വീട്ടിലേക്ക് എത്തിക്കാൻ സഹായം ചോദിച്ചു. എന്നാൽ, സഹായിക്കാമെന്ന് വാഗ്ദാനം ചെയ്ത ശശികുമാർ കുട്ടിയെ തൊടുപുഴയിലെ തന്നെ ഇയാളുടെ വീട്ടിലേക്ക് കൊണ്ടുപോവുകയായിരുന്നു. വീട്ടിലെത്തിയതിനു പിന്നാലെ ഇയാൾ കുട്ടിയെ ശാരീരികമായി ഉപദ്രവിക്കാൻ തുടങ്ങി. ഇതോടെ കുട്ടി ബഹളം വയ്ക്കാൻ തുടങ്ങി. 

ഇതിനിടെയാണ് കുട്ടിയെ കാണാതായ വാർത്ത ശശികുമാറിന്റെ ശ്രദ്ധയിൽപ്പെടുന്നത്. ഇതു കണ്ടതോടെ പേടിച്ച് ശശികുമാർ കുട്ടിയോട് നമ്പർ വാങ്ങി പിതാവിനെ വിളിച്ച് തൊടുപുഴയിൽ ഉള്ളതായി വിവരം നൽകുകയായിരുന്നു. പിന്നീട് പിതാവും ബന്ധുക്കളും പൊലിസും തൊടുപുഴയിലെത്തി കുട്ടിയെ കണ്ടു. കൂടെയുണ്ടായിരുന്ന ശശികുമാറിനെ പൊലിസ് സ്റ്റേഷനിലെത്തിച്ച് കുട്ടിയെയും ഇയാളെയും ചോദ്യം ചെയ്തതോടെയാണ് പൊലിസ് ഇക്കാര്യം അറിഞ്ഞത്. 

പ്രതിയെ കൊച്ചിയിലെത്തിച്ച് കൂടുതൽ ചോദ്യം ചെയ്യും. കുട്ടിയുടെ മൊഴിയും പൊലിസ് രേഖപ്പെടുത്തും. പോക്‌സോ 7,8 വകുപ്പുകൾ ചേർത്താണ് കേസെടുത്തിരിക്കുന്നത്.

A 13-year-old boy who went missing from Kadavanthra was found in Thodupuzha, and the man who allegedly abused him has been charged under the POCSO Act, police said. The boy had reportedly gone to watch the shooting of a television serial in Vazhakala, Thodupuzha. He had last been seen when he went to write an exam at a private school in Edappally.