മസ്‌കത്ത്: ഒമാനില്‍ ബലിപെരുന്നാളിടോനുബന്ധിച്ചുള്ള ദേശീയ പൊതു അവധിദിനങ്ങള്‍ പ്രഖ്യാപിച്ചു. പൊതു, സ്വകാര്യ മേഖലയിലെ ജീവനക്കാര്‍ക്ക് അഞ്ച് ദിവസത്തെ അവധിയാണ് പ്രഖ്യാപിച്ചത്. രാജകീയ ഉത്തരവ് പ്രകാരം ജൂണ്‍ 5 വ്യാഴാഴ്ച തുടങ്ങി ജൂണ്‍ 9 തിങ്കളാഴ്ച വരെയാണ് അവധി നീണ്ടുനില്‍ക്കുക. സര്‍ക്കാര്‍ ഓഫീസുകളിലും സ്വകാര്യ സ്ഥാപനങ്ങളിലും സാധാരണ പ്രവൃത്തി സമയം ജൂണ്‍ 10 ചൊവ്വാഴ്ച പുനരാരംഭിക്കും. 

പൗരന്മാര്‍ക്കും താമസക്കാര്‍ക്കും അവരുടെ കുടുംബങ്ങളോടും പ്രിയപ്പെട്ടവരോടും ഒപ്പം മതപരമായ പരിശുദ്ധ സമയങ്ങള്‍ ചെലവഴിക്കാന്‍ പ്രാപ്തരാക്കുന്നതിനുള്ള രാജ്യത്തിന്റെ പ്രതിബദ്ധതയെ അടിവരയിടുന്നതാണ് അവധി പ്രഖ്യാപനമെന്ന് ഔദ്യോഗിക ഉത്തരവില്‍ പറയുന്നു. എല്ലാ ഗള്‍ഫ് രാഷ്ട്രങ്ങളിലും ഇക്കുറി ജൂണ്‍ 6നാണ് ബലിപെരുന്നാള്‍.

നേരത്തെ പൊതുമേഖലാ ജീവനക്കാര്‍ക്കുള്ള ഈദ് അല്‍ അദ്ഹ അവധികള്‍ യു.എ.ഇ സര്‍ക്കാര്‍ പ്രഖ്യാപിച്ചിരുന്നു. രാജ്യത്തുടനീളമുള്ള മന്ത്രാലയങ്ങളും ഫെഡറല്‍ സ്ഥാപനങ്ങളും ജൂണ്‍ 5 വ്യാഴാഴ്ച (ദുല്‍ഹജ്ജ് 9) മുതല്‍ ജൂണ്‍ 8 ഞായറാഴ്ച (ദുല്‍ഹജ്ജ്- 12) വരെ ആണ് യുഎഇയിലെ അവധി. 

സഊദി അറേബ്യയിലെ സ്വകാര്യ മേഖല തൊഴിലാളികള്‍ക്കും ബലിപെരുന്നാള്‍ പ്രമാണിച്ച് നാല് ദിവസത്തെ അവധിയാണ് ലഭിക്കുക. അറഫ ദിനമായ ജൂണ്‍ 5 വ്യാഴാഴ്ച മുതല്‍ തൊഴിലാളികള്‍ക്കുള്ള അവധി ആരംഭിക്കുമെന്ന് സഊദി മാനവ വിഭവശേഷി മന്ത്രാലയം വ്യക്തമാക്കി.