ന്യൂഡൽഹി: ഇന്ത്യയുടെ ഓപ്പറേഷൻ സിന്ദൂരിനിടെ പാകിസ്ഥാനിൽ ഉണ്ടായ മരണങ്ങളിൽ അനുശോചനം രേഖപ്പെടുത്തിയ പ്രസ്താവന കൊളംബിയ പിൻവലിച്ചു. ഇന്ത്യയുടെ നിലപാടിന് പൂർണ പിന്തുണ കൊളംബിയ നൽകുമെന്ന് കോൺഗ്രസ് എംപി ശശി തരൂർ വ്യക്തമാക്കി. ഇന്ത്യയുടെ സർവകക്ഷി പ്രതിനിധി സംഘം നൽകിയ ഇന്ത്യ- പാക് സംഘർഷത്തെക്കുറിച്ചുള്ള വിശദീകരണമാണ് കൊളംബിയയുടെ നിലപാട് മാറ്റത്തിന് കാരണമായതെന്ന് ബിജെപി നേതാവ് തരൺജിത് സിംഗ് സന്ധു പറഞ്ഞു.

ജമ്മു കശ്മീരിലെ പഹൽഗാമിൽ ഏപ്രിൽ 22-ന് നടന്ന ഭീകരാക്രമണത്തിന് മറുപടിയായി ഇന്ത്യ നടത്തിയ പ്രത്യാക്രമണത്തെ തുടർന്ന് പാകിസ്ഥാനിൽ ഉണ്ടായ ജീവഹാനിയിൽ കൊളംബിയ നേരത്തെ അനുശോചനം രേഖപ്പെടുത്തിയിരുന്നു. എന്നാൽ, ഇന്ത്യൻ പ്രതിനിധി സംഘത്തിന്റെ കൊളംബിയയിലെ ബോഗോട്ട സന്ദർശനത്തിനിടെ നടത്തിയ ചർച്ചകൾക്ക് ശേഷം ഈ പ്രസ്താവന ഔദ്യോഗികമായി പിൻവലിച്ചതായി ശശി തരൂർ അറിയിച്ചു.

"ഇന്ത്യൻ പ്രതിനിധി സംഘം നൽകിയ വിശദമായ വിവരങ്ങളും കശ്മീരിലെ യഥാർത്ഥ സാഹചര്യങ്ങളും മനസ്സിലാക്കിയതിനാൽ ഞങ്ങൾക്ക് ആത്മവിശ്വാസമുണ്ട്. ഞങ്ങളുടെ മുൻ പ്രസ്താവന പിൻവലിക്കുകയും ഇന്ത്യയുടെ നിലപാടിനെ പൂർണമായി പിന്തുണയ്ക്കുകയും ചെയ്യുന്നുവെന്ന് കൊളംബിയയുടെ ഉപ വിദേശകാര്യ മന്ത്രി റോസ യോലാൻഡ വില്ലാവിസെൻസിയോ പറഞ്ഞു

"തീവ്രവാദത്തിനെതിരെ ശക്തമായ നിലപാട്"

പാകിസ്ഥാനിൽ തീവ്രവാദ സംഘടനകൾ ഇല്ലാതാകുന്നതുവരെ ചർച്ചകൾ സാധ്യമല്ലെന്ന് ശശി തരൂർ വ്യക്തമാക്കി. "തർക്കങ്ങൾ ചർച്ചയിലൂടെ പരിഹരിക്കണമെന്ന് ഇന്ത്യ മനസ്സിലാക്കുന്നു. എന്നാൽ, നെറ്റിയിൽ തോക്ക് ചൂണ്ടിയുള്ള സംഭാഷണത്തിൽ ഞങ്ങൾ വിശ്വസിക്കുന്നില്ല. പാകിസ്ഥാൻ തീവ്രവാദത്തെ രാഷ്ട്രീയ ഉപകരണമായി ഉപയോഗിക്കുന്നത് അവസാനിപ്പിക്കണം. അതുവരെ, അവരുമായി ചർച്ച നടത്താൻ ഞങ്ങൾ തയ്യാറല്ല," തരൂർ കൊളംബിയ കൗൺസിൽ ഫോർ ഇന്റർനാഷണൽ റിലേഷൻസിൽ നടത്തിയ ചർച്ചയിൽ പറഞ്ഞു.

പഹൽഗാം ആക്രമണവും ഓപ്പറേഷൻ സിന്ദൂരും

ഏപ്രിൽ 22-ന് പഹൽഗാമിൽ നടന്ന ഭീകരാക്രമണത്തിൽ 26 നിരപരാധികളായ വിനോദസഞ്ചാരികൾ കൊല്ലപ്പെട്ടിരുന്നു. "ഇത് കൊലപാതകമായിരുന്നു. കശ്മീരിൽ സമാധാനപരമായി അവധി ആഘോഷിക്കാൻ എത്തിയവരെ ലക്ഷ്യമിട്ടാണ് ആക്രമണം നടന്നത്. ടൂറിസം വളർന്ന് അഭിവൃദ്ധി പ്രാപിക്കുന്ന സമയത്ത്, കശ്മീരികളുടെ ഉപജീവനമാർഗത്തെ തകർക്കാനും യുദ്ധം സൃഷ്ടിക്കാനും ലക്ഷ്യമിട്ടാണ് ഈ ആക്രമണം," തരൂർ വിശദീകരിച്ചു.

മറുപടിയായി, മെയ് 7-ന് ഇന്ത്യൻ സായുധ സേന ഓപ്പറേഷൻ സിന്ദൂർ ആരംഭിച്ചു. പാകിസ്ഥാനിലും പാക് അധീന ജമ്മു കശ്മീരിലും (പിഒജെകെ) ഒമ്പത് തീവ്രവാദ കേന്ദ്രങ്ങൾ ലക്ഷ്യമിട്ട് 100-ലധികം തീവ്രവാദികളെ വധിച്ചു. "ഇത് ശ്രദ്ധാപൂർവ്വം ആസൂത്രണം ചെയ്ത ഓപ്പറേഷനായിരുന്നു. ഞങ്ങൾ സിവിലിയൻ പ്രദേശങ്ങളെ ആക്രമിച്ചില്ല, മറിച്ച് തീവ്രവാദ അടിസ്ഥാന സൗകര്യങ്ങൾ മാത്രമാണ് ലക്ഷ്യമിട്ടത്," തരൂർ കൂട്ടിച്ചേർത്തു.

സർവകക്ഷി സംഘത്തിന്റെ യാത്ര

ഭീകരതയോട് ഇന്ത്യയുടെ ശക്തമായ നിലപാട് അന്താരാഷ്ട്ര സമൂഹത്തിന് മുന്നിൽ വിശദീകരിക്കാൻ മെയ് 17-ന് ഇന്ത്യ പ്രഖ്യാപിച്ച സർവകക്ഷി പ്രതിനിധി സംഘം പനാമയും ഗയാനയും സന്ദർശിച്ച ശേഷം വ്യാഴാഴ്ച കൊളംബിയയിലെത്തി. ഇന്ന് (മെയ് 31) ബ്രസീലിലേക്കും തുടർന്ന് അമേരിക്കയിലേക്കും സംഘം യാത്ര തിരിക്കും. ശശി തരൂർ നയിക്കുന്ന സംഘത്തിൽ ഭുവനേശ്വർ കലിത (ബിജെപി), മിലിന്ദ് ദേവ്റ (ശിവസേന), ശാംഭവി (എൽജെപി), ജിഎം ഹരീഷ് ബാലയോഗി (ടിഡിപി), മുൻ യുഎസ് ഇന്ത്യൻ അംബാസഡർ തരൺജിത് സിംഗ് സന്ധു എന്നിവർ ഉൾപ്പെടുന്നു.

ബൊഗോട്ടയിൽ, പ്രതിനിധി സംഘം കോൺഗ്രസ് അംഗങ്ങൾ, മന്ത്രിമാർ, തിങ്ക് ടാങ്കുകളിലെ പ്രമുഖരുമായി ചർച്ച നടത്തി. "ഇന്ത്യയുടെ ദേശീയ സമവായവും തീവ്രവാദത്തിനെതിരായ ദൃഢമായ സമീപനവും ഉയർത്തിക്കാട്ടാനാണ് ഈ യാത്രയെന്ന്," തരൂർ വ്യക്തമാക്കി.