കൽപറ്റ: കമ്പളക്കാട് പത്തൊൻപതുകാരി ദിൽഷാന ജീപ്പിടിച്ച് മരിച്ച സംഭവത്തിൽ റോഡരികിൽ കൂട്ടിയിട്ട ജൽജീവൻ പദ്ധതിയുടെ പൈപ്പുകൾക്കെതിരെ നാട്ടുകാർ. അപകടത്തിന് കാരണം റോഡിനരികിൽ അലക്ഷ്യമായി കിടക്കുന്ന വാട്ടർ അതോറിറ്റിയുടെ പൈപ്പുകളാണെന്ന് ആരോപിച്ച് പ്രതിഷേധവുമായി പ്രദേശവാസികൾ. മാസങ്ങളായി റോഡരികിൽ കിടക്കുന്ന പൈപ്പുകൾ മൂലം നടക്കാൻ പോലും വഴിയില്ലെന്നും, ഇത് കടുത്ത അനാസ്ഥയാണെന്നും നാട്ടുകാർ ആക്ഷേപിക്കുന്നു. 

അമിത വേഗത്തിൽ എത്തിയ ജീപ്പ്, കുടിവെള്ള വിതരണ പദ്ധതിക്കായി റോഡരികിൽ കൂട്ടിയിട്ട വലിയ പൈപ്പുകളിൽ ഇടിച്ച ശേഷം നിയന്ത്രണം നഷ്ടപ്പെട്ട് യുവതിയെ ഇടിക്കുകയായിരുന്നു.  നിയന്ത്രണം വിട്ട ജീപ്പ് വന്നപ്പോൾ, പൈപ്പുകൾ കാരണം ഓടിമാറാൻ ദിൽഷാനയ്ക്ക് കഴിഞ്ഞില്ലെന്ന് നാട്ടുകാർ പറയുന്നു. അമിത വേഗം മൂലം പൈപ്പ് ഉൾപ്പെടെ യുവതിയുടെ ദേഹത്ത് ഇടിച്ചിരിക്കാമെന്നും അവർ ആരോപിക്കുന്നു. റോഡിന്റെ വീതി കുറവായിരിക്കെ, ഇത്തരത്തിൽ പൈപ്പുകൾ അലക്ഷ്യമായി ഇറക്കിവെച്ച കരാറുകാരും അതിന് കൂട്ടുനിന്ന ഉദ്യോഗസ്ഥരുമാണ് ഈ ദാരുണ സംഭവത്തിന് ഉത്തരവാദികളെന്ന് നാട്ടുകാർ കുറ്റപ്പെടുത്തി.

ഇന്ന് രാവിലെ ഏഴ് മണിയോടെയാണ് കമ്പളക്കാട് സിനിമാ ഹാളിന് സമീപം അപകടം നടന്നത്. വീടിനടുത്ത് പാൽ വാങ്ങാൻ നിന്ന ദിൽഷാന (19)നെ നിയന്ത്രണം വിട്ട ക്രൂയിസർ ജീപ്പ് ഇടിക്കുകയായിരുന്നു. സുൽത്താൻ ബത്തേരി സെന്റ് മേരീസ് കോളേജ് വിദ്യാർഥിനിയായിരുന്നു ദിൽഷാന. അമിത വേഗത്തിൽ എത്തിയ ജീപ്പ്, കുടിവെള്ള വിതരണ പദ്ധതിക്കായി റോഡരികിൽ കൂട്ടിയിട്ട വലിയ പൈപ്പുകളിൽ ഇടിച്ച ശേഷം നിയന്ത്രണം നഷ്ടപ്പെട്ട് യുവതിയെ ഇടിക്കുകയായിരുന്നു. കോഴിക്കോട് നിന്നും മാനന്തവാടിയിലേക്ക് അമിത വേ​ഗത്തിൽ പോവുകയായിരുന്നു ജീപ്പ്.