തിരുവനന്തപുരം: വിഴിഞ്ഞത്ത് നിന്നും കാണാതായ ഒമ്പത് മത്സ്യത്തൊഴിലാളികളില്‍ എട്ടുപേരെ രക്ഷപ്പെടുത്തി. രണ്ടു വള്ളങ്ങളിലായി മത്സ്യബന്ധനത്തിനു പോയ എട്ടുപേരുടെ സംഘത്തെയാണ് രണ്ടു ദിവസത്തെ തിരച്ചിലിനൊടുവില്‍ കരയിലെത്തിച്ചത്. ഇതില്‍ നാലു പേരുടെ സംഘം കുളച്ചല്‍ തീരത്തും മറ്റു നാലു പേരുടെ സംഘം കുളച്ചല്‍ തീരത്തുമെത്തി. ഫാത്തിമമാതാ, സഹായമാതാ എന്നീ വള്ളങ്ങളിലെ തൊഴിലാളികളാണ് ഇവര്‍.

കന്യാകുമാരി ഭാഗത്ത് കുടുങ്ങിയെന്ന് മത്സ്യത്തൊഴിലാളികള്‍ അറിയിച്ചതിനെ തുടര്‍ന്ന് മറൈന്‍ എന്‍ഫോസ്‌മെന്റാണ് ആദ്യ സംഘത്തെ തിരികെ കൊണ്ടുവന്നത്. ഇവരെ ആരോഗ്യ പരിശോധനയുടെ ഭാഗമായി ആശുപത്രിയിലേക്ക് മാറ്റി. 

രണ്ടാമത്തെ സംഘത്തിലെ നാലു പേരെ തമിഴ്‌നാട്ടില്‍ നിന്നുള്ള മത്സ്യത്തൊഴിലാളികളാണ് രക്ഷിച്ചത്. മറിഞ്ഞ വള്ളത്തില്‍ തൂങ്ങിനില്‍ക്കുന്നതിനിടെയാണ് തമിഴ്‌നാട് മത്സ്യത്തൊഴിലാളികള്‍ ഇവരെ രക്ഷിച്ചത്. 

കഴിഞ്ഞ ദിവസം അപകടത്തില്‍പ്പെട്ട അനു എന്ന വള്ളത്തിലെ ജീവനക്കാരനായ സ്റ്റെലസിനെ ഇനിയും കണ്ടെത്താനായിട്ടില്ല. ഇതേ വള്ളത്തിലെ മറ്റൊരു ജീവനക്കാരനായ തഥേയൂസിന്റെ മൃതദേഹം പൂവാറാര്‍ തീരത്തുനിന്നും കണ്ടെത്തിയിരുന്നു. വിഴിഞ്ഞം സ്വദേശിയാണ് കാണാതായ സ്റ്റെലസ്. മത്സ്യബന്ധനത്തിവു പോയ ഇവരുടെ വള്ളം ശക്തമായ തിരയില്‍പ്പെട്ട് മറിയുകയായിരുന്നു. വള്ളത്തിലുണ്ടായിരുന്ന ബാക്കി മൂന്നുപേര്‍ നീന്തി രക്ഷപ്പെടുകയായിരുന്നു.