അഹമ്മദാബാദ്: ഗുജറാത്തിലെ മുസ്‌ലിം ഭൂരിപക്ഷ പ്രദേശത്ത് 8,500 ചെറുതും വലുതുമായ വീടുകൾ ബുൾഡോസറുകൾ ഉപയോഗിച്ച് തകർത്തു. അഹമ്മദാബാദിലെ ചന്ദോള തടാകത്തിന് ചുറ്റുമുള്ള പ്രദേശത്താണ് കൂട്ടകുടിയൊഴിപ്പിക്കൽ നടന്നത്. ബംഗ്ലാദേശികളാണെന്നും കുടിയേറ്റക്കാർ ആണെന്നും ആരോപിച്ച് ആണ് പൊളിക്കൽ നടന്നത്. എന്നാൽ പ്രദേശത്തെ താമസക്കാർ ആധാറും വോട്ടർ ഐഡി കാർഡുകളും ഉള്ള ഇന്ത്യൻ പൗരന്മാരാണ് എന്ന് മനുഷ്യാവകാശ പ്രവർത്തകർ പറഞ്ഞു. പതിനായിരക്കണക്കിന് മനുഷ്യരെയാണ് അഹമ്മദാബാദ് മുനിസിപ്പൽ കോർപറേഷൻ (എഎംസി) ബുൾഡോസർ രാജിലൂടെ പെരുവഴിയിലാക്കിയത്.

ചന്ദോളയിലെ ജനസാന്ദ്രത കൂടിയ പ്രദേശത്ത് ആണ് കോർപറേഷന്റെ നടപടികൾ ഉണ്ടായത്. പ്ലാസ്റ്റിക് ഷീറ്റുകൾ കൊണ്ട് നിർമ്മിച്ച രണ്ട് മുറികളുള്ള ചെറിയ കുടിലുകൾ മുതൽ കോൺക്രീറ്റ് വീടുകൾ വരെ പൊളിച്ചുമാറ്റിയവയിൽ ഉണ്ട്. ഈ മാസം ആദ്യം ആരംഭിച്ച രണ്ടാം ഘട്ട പൊളിക്കൽ പ്രക്രിയയാണ് കഴിഞ്ഞ ദിവസം പൂർത്തിയാക്കിയത്. മുൻപും ആരാധനാലയങ്ങളും വീടുകളും തകർത്തിരുന്നു.

വീടുകൾ പൂർണമായും നിലംപൊത്തിയതോടെ സ്ത്രീകളും കുട്ടികളും ഉൾപ്പെടെ നൂറുകണക്കിന് ആളുകൾ വീടില്ലാത്തവരായി തെരുവുകളിൽ നിൽക്കുകയാണ്. പ്രദേശത്ത് റോഹിംഗ്യകളെയും ബംഗ്ലാദേശികളെയും മാറ്റിപ്പാർപ്പിച്ചതായി അധികൃതർ അവകാശപ്പെടുന്നുണ്ടെങ്കിലും, ജനങ്ങളിൽ ഭൂരിഭാഗവും ആധാറും വോട്ടർ ഐഡി കാർഡുകളും ഉള്ള ഇന്ത്യൻ പൗരന്മാരാണെന്ന് മനുഷ്യാവകാശ സംഘടനകൾ വ്യക്തമാക്കുന്നു. സർക്കാർ നടപടിക്കെതിരെ പ്രതിഷേധം ശക്തമാണ്.

ചന്ദോള തടാക പ്രദേശത്തെ ''കൈയേറ്റമെന്ന്'' കണക്കാക്കിയ 8,500 ഘടനകൾ ഒരു ദിവസം കൊണ്ട് പൊളിച്ചുമാറ്റിയതായും പതിറ്റാണ്ടുകളായി "അനധികൃതമായി കൈവശപ്പെടുത്തിയിരുന്ന" 2.5 ലക്ഷം ചതുരശ്ര മീറ്റർ വിസ്തീർണ്ണമുള്ള പ്രദേശം മോചിപ്പിച്ചെന്നുമാണ് അഹമ്മദാബാദ് മുനിസിപ്പൽ കോർപ്പറേഷൻ സംഭവത്തിൽ നൽകുന്ന വിശദീകരണം. ചന്ദോള തടാകത്തിന് ചുറ്റുമുള്ള അനധികൃത നിർമ്മാണങ്ങൾ ഒഴിപ്പിക്കുന്നതിനുള്ള തുടർച്ചയായ പ്രചാരണത്തിന്റെ ഭാഗമാണ് ഈ പൊളിക്കൽ എന്ന് കോർപറേഷൻ അവകാശപ്പെടുന്നു. മെയ് 20 ന് നടന്ന രണ്ടാം ഘട്ടത്തിന്റെ ആദ്യ റൗണ്ടിൽ, ഉദ്യോഗസ്ഥർ ഒമ്പത് പള്ളികൾ പൊളിച്ചുമാറ്റിയിരുന്നു. 

രണ്ടാം ഘട്ട പ്രവർത്തനങ്ങളിൽ ഇതുവരെ ഏകദേശം 2.5 ലക്ഷം ചതുരശ്ര മീറ്റർ വിസ്തീർണ്ണമുള്ള ഭൂമിയിലാണ് പൊളിക്കൽ നടന്നത്. അമ്പതോളം ജെസിബികളും ഹിറ്റാച്ചികളും പൊളിക്കലിനായി ഉപയോഗിച്ചു. 25 എസ്ആർപി ടീമുകൾ ഉൾപ്പെടെ 3,000-ത്തിലധികം പൊലിസ് ഉദ്യോഗസ്ഥരെ  പ്രദേശത്ത് വിന്യസിച്ചാണ് ഈ ബുൾഡോസർ രാജ് നടപ്പിലാക്കിയത്. നീക്കം ചെയ്ത പ്രദേശങ്ങളിലെ കൂടുതൽ കൈയേറ്റങ്ങൾ തടയുന്നതിനായി അവശിഷ്ടങ്ങൾ നീക്കം ചെയ്യലും അതിർത്തി മതിലുകളുടെ നിർമ്മാണവും വേഗത്തിൽ പൂർത്തിയാക്കുമെന്ന് എഎംസി അറിയിച്ചു.