കൊച്ചി: നിലമ്പൂര്‍ ഉപതെരഞ്ഞെടുപ്പില്‍ പിവി അന്‍വര്‍ മത്സരിക്കുമെന്ന് തൃണമൂല്‍ കോണ്‍ഗ്രസ് സംസ്ഥാന ചീഫ് കോര്‍ഡിനേറ്റര്‍ സജി മഞ്ഞക്കടമ്പില്‍. തിങ്കളാഴ്ച നാമനിര്‍ദേശ പത്രിക സമര്‍പ്പിക്കുമെന്നും സജി മഞ്ഞക്കടമ്പില്‍ പറഞ്ഞു. 

തിങ്കളാഴ്ച പാര്‍ട്ടിയുടെ എല്ലാ പ്രധാന നേതാക്കളോടും നിലമ്പൂരില്‍ എത്താന്‍ നിര്‍ദേശിച്ചിട്ടുണ്ടെന്നും പത്രിക നല്‍കുകയെന്നതാണ് ഇപ്പോഴത്തെ തീരുമാനമെന്നും സജി മഞ്ഞക്കടമ്പില്‍ പറഞ്ഞു. 

പിവി അന്‍വറിനോട് ഇടതുപക്ഷവും വലതു പക്ഷവും വഞ്ചനയാണ് ചെയ്തത്. അദ്ദേഹത്തെ ഇല്ലാതാക്കാന്‍ ശ്രമിച്ചിരിക്കുന്നുവെന്ന കാര്യം ജനങ്ങള്‍ മനസ്സിലാക്കി. പിവി അന്‍വറിന് മത-സാമുദായിക രംഗത്തെ നേതാക്കള്‍ പിന്തുണ അറിയിച്ചിട്ടുണ്ട്. അന്‍വര്‍ നിലമ്പൂരില്‍ അത്ഭുതങ്ങള്‍ സൃഷ്ടിക്കും. അന്‍വര്‍ നിലമ്പൂരിന്റെ സുല്‍ത്താനായി വീണ്ടും ജയിക്കുമെന്നും സജി പറഞ്ഞു.

നേരത്തേ നിലമ്പൂരിലെ മത്സര സാധ്യത പിവി അന്‍വര്‍ തള്ളിയിരുന്നില്ല. നിലമ്പൂരില്‍ മത്സരിക്കണമെന്ന് ആവശ്യപ്പെട്ട് പണവുമായി ആളുകള്‍ വരുന്നുണ്ടെന്ന് അന്‍വര്‍ പറഞ്ഞിരുന്നു.