കാംബ്രിഡ്ജ്: ഫലസ്തീന്‍ അനുകൂല പ്രസംഗം നടത്തിയ ഇന്ത്യന്‍ അമേരിക്കന്‍ വിദ്യാര്‍ഥിനി മേഘാ വെമുരിക്കെതിരെ നടപടിയുമായി അമേരിക്കയിലെ മാസാച്യുസെറ്റ്‌സ് ഇന്‍സ്റ്റിറ്റ്യൂട്ട് ഓഫ് ടെക്‌നോളജി (എംഐടി). ബിരുദദാനച്ചടങ്ങില്‍ പങ്കെടുക്കുന്നതില്‍നിന്ന് മേഘയെ വിലക്കിയിരിക്കുകയാണ് സര്‍വ്വകലാശാല. ഔദ്യോഗിക ബിരുദദാന ചടങ്ങിന് മുന്നോടിയായി വ്യാഴാഴ്ച നടന്ന വണ്‍ എം.ഐ.ടി കമന്‍സ്മെന്റ് സെറിമണിയില്‍ നടത്തിയ പ്രസംഗത്തിലായിരുന്നു മേഘ, ഇസ്‌റാഈലിനെതിരെ അതിരൂക്ഷ വിമര്‍ശനം ഉന്നയിച്ചത്.

 എം.ഐ.ടി ക്ലാസ് ഓഫ് 2025 പ്രസിഡന്റ് കൂടിയാണ് മേഘ. അതേസമയം, മേഘയുടെ പേര് പറയാതെയാണ് അവരെ ബിരുദദാനച്ചടങ്ങില്‍നിന്ന് വിലക്കിയ കാര്യം സര്‍വകലാശാല അറിയിച്ചത്.

നിങ്ങളുടെ കമന്‍സ്‌മെന്റ് സംഘാടകരെ മനഃപൂര്‍വ്വം ആവര്‍ത്തിച്ച് തെറ്റിദ്ധരിപ്പിച്ചു- മേഘക്ക് അധികൃതര്‍ അയച്ച് സന്ദേശത്തില്‍ പറയുന്നു. 

ഫലസ്തീനോടുള്ള ഐക്യദാര്‍ഢ്യം സൂചിപ്പിക്കാന്‍ ചുവന്ന കഫിയ ധരിച്ചുകൊണ്ടാണ് മേഘ വേദിയില്‍ കയറിയത്. എം.ഐ.ടിക്ക് ഇസ്‌റാഈല്‍ സൈന്യവുമായുള്ള ഗവേഷണ മേഖലയിലെ ബന്ധത്തെയും അവര്‍ തന്റെ പ്രസംഗത്തില്‍ വിമര്‍ശിച്ചു. ഗസ്സയിലെ ഇസ്‌റാഈല്‍ സൈനിക നടപടിയെ വംശഹത്യയെന്നാണ് മേഘ തന്റെ പ്രസംഗത്തില്‍ വിശേഷിപ്പിച്ചത്. 

'എം.ഐ.ടിക്ക് ഗവേഷണ ബന്ധമുള്ള ഒരേയൊരു വിദേശ സൈന്യമാണ് ഇസ്‌റാഈല്‍ അധിനിവേശ സേന. ഇതിനര്‍ത്ഥം ഫലസ്തീന്‍ ജനതയ്ക്കെതിരായ ഇസ്‌റാഈലിന്റെ ആക്രമണത്തിന് നമ്മുടെ രാജ്യം മാത്രമല്ല, നമ്മുടെ സ്‌കൂളും സഹായവും പിന്തുണയും നല്‍കുന്നു എന്നാണ്'അവര്‍ പ്രസംഗത്തിനിടെ തുറന്നടിച്ചു. 

MIT’s class president, Megha Vemuri, spent her graduation speech bashing Israel.

Then President Sally Kornbluth spoke immediately after and oh boy was that awkward. pic.twitter.com/PjsBNEQxmy

— Kassy Akiva (@KassyAkiva) May 29, 2025

ഫലസ്തീന്‍ ജനതയെ ഈ ഭൂമുഖത്ത് നിന്ന് ഇല്ലാതാക്കുന്നതിന് ലോകം സാക്ഷ്യം വഹിച്ചു കൊണ്ടിരിക്കുകയാണ്. ഈ സാഹചര്യത്തില്‍ ഇസ്‌റാഈലിന് പിന്തുണ നല്‍കുന്നത് എം.ഐ.ടിക്ക് നാണക്കേടാണ്- അവര്‍ പറഞ്ഞു. ഫലസ്തീന് പിന്തുണ നല്‍കണമെന്നും അവര്‍ സഹപാഠികളോട് ആവശ്യപ്പെട്ടു. 

നിങ്ങള്‍ ലോകത്തിന് കാണിച്ചുകൊടുത്തു, സ്വതന്ത്ര ഫലസ്തീനാണ് എം.ഐ.ടി ആവശ്യപ്പെടുന്നതെന്ന്, ചടങ്ങില്‍ പങ്കെടുത്ത സഹപാഠികളോടും അധ്യാപകരോടുമായി മേഘ പറഞ്ഞു.

ഗസ്സയില്‍ ഇസ്രായേല്‍ നടത്തുന്ന വംശഹത്യക്കെതിരെ യുഎസിലെ ക്യാമ്പസുകളില്‍ വ്യാപക പ്രതിഷേധങ്ങളാണ് ഉയരുന്നത്. ഈ പശ്ചാത്തലത്തിലാണ് ഫലസ്തീന്‍ അനുകൂല പ്രസംഗവുമായി മേഘയും രംഗത്തു വന്നത്.