മക്ക: വിശുദ്ധ ഹജ്ജിനെത്തിയ ഹാജിമാരെ സേവിക്കാൻ വിഖായ സജീവം. ഹാജി മാർക്ക് താങ്ങും തണലുമായി മക്കയിൽ സമസ്തയുടെ പടയണി സുസ്സജ്ജരായി പ്രവർത്തന ഗോദയിലാണ്. ലോകത്തിന്റെ വിവിധ ഭാഗങ്ങളിൽ നിന്നുമെത്തുന്ന ഹാജിമാർക്ക് ഏറെ കൗതുകവും സൃഷ്ടിക്കുന്നതാണ് ഇന്ത്യൻ ഹാജിമാർക്കായി ഇവർ നടത്തുന്ന സേവനങ്ങൾ. ലക്ഷോപ ലക്ഷം ആളുകൾക്കിടയിൽ ഇന്ത്യൻ ഹാജിമാർക്കു മാത്രം അതും വിശിഷ്യാ മലയാളി ഹാജിമാർക്ക് ലഭിക്കുന്ന ഒരു പ്രത്യേക കാരുണ്യ സേവനം കൂടിയാണ് പുണ്യ ഭൂമിയിലെ ഹജ്ജ് സേവക സംഘങ്ങൾ ചെയ്യുന്നത്. 

ലോകത്തിന്റെ അഷ്ട ദിക്കുകളിൽ നിന്നെത്തി ഭാഷയും പ്രകൃതിയും നാടും ഒന്നും മനസ്സിലാക്കാൻ കഴിയാതെ ഉഴലുന്നവർക്കും ഇബ്‌റാഹീം നബിയുടെ വിളിയാളം കേട്ട് വിശുദ്ധ ഹജ്ജ് കർമ്മം നിർവ്വഹിക്കാൻ എത്തിയ ഇവരിൽ പ്രായമായവർക്കും നടക്കാൻ കഴിയാത്തവർക്കും ക്ഷീണിതർക്കും എന്ന് വേണ്ട ആർക്കു വേണമെങ്കിലും ഏതു സമയത്തും തുണയായി മാറുന്നത് ഇവിടെ ഏർപ്പെട്ടിരിക്കുന്ന ഏതൊരു വളണ്ടിയർക്കും ഉത്സാഹവും ആത്മാഭിമാനവും നൽകുന്നതാണ്. സഊദിയിലെ സമസ്ത പോഷക ഘടകമായ സമസ്ത ഇസ്‌ലാമിക് സെന്റർ (എസ് ഐ സി) സഊദി നാഷണൽ കമ്മിറ്റിയുടെ കീഴിൽ വിഖായ മക്കയിലും മദീനയിലും, ജിദ്ദയിലും ഇന്ത്യൻ ഹാജിമാർ വന്നിറങ്ങിയത് സജീവമാണ്. 

ഹാജിമാരുടെ സാധനങ്ങളും മറ്റും ചുമന്നു വാഹനങ്ങളിൽ കയറ്റി ഇവരെ താമസ സ്ഥലത്തു കൊണ്ടെത്തിക്കുകയും അവിടെ നിന്നും മസ്‌ജിദുൽ ഹറാമിലേക്കും തിരിച്ചുമുള്ള യാത്രകളിൽ സഹായിയായി പ്രവർത്തിക്കുകയും ചെയ്യുന്ന വളണ്ടിയർ സംഘങ്ങൾ ഇവരുടെ ജീവിതം തന്നെ ഇവിടെ ഹാജിമാർക്കായി സമർപ്പിക്കുകയാണ് ചെയ്യുന്നത്. 24 മണിക്കൂറും സജ്ജരായ മോണിംഗ്, ആഫ്റ്റർനൂൺ, ഈവനിംഗ്, നൈറ്റ് ബാച്ചുകളിലായി വിഖായ പ്രവർത്തിക്കുന്നുണ്ട്. കൂടാതെ മെഡിക്കൽ വിങ്ങിൽ മക്കയിലെ മലയാളി ഡോക്ടർമാരും നേഴ്സുമാരും സേവന നിരതരാണ്. 

ഈ വർഷത്തെ വിഖായ സമിതിയുടെ മുഖ്യ രക്ഷധികാരി ഇസ്സുദ്ദീൻ ആലുങ്കൽ അവാലി, ചെയർമൻ സക്കീർ കോഴിചെന, ചീഫ് കോഡിനേറ്റർ ഫരീദ് ഐക്കരപ്പടി, കൺവീനർ നിസാർ ചുള്ളിയോട്, ക്യാപ്റ്റൻ മരക്കാർ പാങ്ങ്, ഫൈനാൻസ് കൺട്രോളർ നൗഫൽ തേഞ്ഞിപ്പലം, മക്ക സെൻട്രൽ കമ്മിറ്റി പ്രസിഡണ്ടും നാഷണൽ വിഖായ ചെയർമാനുമായ ഉസ്മാൻ ദാരിമി കരുളായി, ജനറൽ സെക്രട്ടറി സിറാജ് പേരാമ്പ്ര, ഹറമൈൻ സോൺ പ്രസിഡൻറ് സയ്യിദ് സിദ്ദീഖ് തങ്ങൾ പാണക്കാട്, സമിതി അംഗങ്ങളായ മുനീർ ഫൈസി മാമ്പുഴ, മുബശിർ ബാവ അരീക്കോട് , യൂസുഫ് ഒളവട്ടൂർ, മുഹമ്മദ് ജാസിം, അബ്ദുൽ അസീസ് കൊളപ്പുറം, മെഹബൂബ് വാഴക്കാട്, മുഹമ്മദ് കാടാമ്പുഴ, ഫിറോസ് ഖാൻ ആലത്തൂർ, ഷമീർ കുന്നുമ്മൽ, ബഷീർ മുതുപറമ്പ്, ഷരീഫ് കാപ്പിൽ, മുഹമ്മദ് അലി യമാനി, ഫാറൂഖ് മലയമ്മ, അയ്യൂബ് എടരിക്കോട്, സിദ്ദിഖ് വളമംഗലം, സാദിഖ് അൽ ബറാക്ക, ഡോ: ജുനൈദ് തുടങ്ങിയവരുടെ നേതൃത്വത്തിലാണ് മക്കയിൽ സേവനങ്ങൾ പുരോഗമിക്കുന്നത്. 

അതേസമയം, നിലവിൽ നുസുക് കാർഡ് ഇല്ലാത്തവർക്ക് മക്ക ഒഴികെയുള്ള പുണ്യ സ്ഥലങ്ങളിലേക്ക് പ്രവേശനം ഇല്ലാത്തത് വിഖായ ഉൾപ്പെടെയുള്ള പ്രവർത്തകരെ നിരാശരാക്കുന്നുണ്ട്. നുസുക് കാർഡ് അധികൃതർ നേരിട്ട് നൽകുന്നുമില്ല. അവസാന ഘട്ടത്തിലും നുസുക് കാർഡ് ലഭിക്കാനും ഹജ്ജ് സേവകരെ മിന ഉൾപ്പെടെയുള്ള സ്ഥലങ്ങളിലേക്ക് ഔദ്യഗികമായി അയക്കാനും ഉള്ള ശ്രമത്തിലാണ് പല സംഘടനകളുടെയും നേതൃത്വങ്ങൾ.