വാഷിങ്ടണ്‍: തേനീച്ചക്കൂട് കയറ്റിപ്പോയ ട്രക്ക് മറിഞ്ഞു. അതും 31 ടണ്ണിലേറെ വരു തേനീച്ചക്കൂടുകള്‍. മറിഞ്ഞെന്ന് മാത്രമല്ല ഇതിലെ തേനീച്ചകളെല്ലാം പുറത്ത് ചാടുകയും ചെയ്തു. എന്ത് ചെയ്യും. പുറത്ത് ചാടിയത് തേനീച്ചകളാണ്. ഒടുവില്‍ ആ നാട് തന്നെ ഏതാണ്ട് അടച്ചു പൂട്ടിയ അവസ്ഥയിലാക്കി അധികൃതര്‍. 

പടിഞ്ഞാറന്‍ യുണൈറ്റഡ് സ്റ്റേറ്റ്‌സിലാണ് സംഭവം. ട്രക്ക് മറിഞ്ഞ് ഏകദേശം 25 കോടി തേനീച്ചകള്‍ പുറത്തു ചാടിയൊണ് റിപ്പോര്‍ട്ട്. ലിന്‍ഡന് സമീപമുള്ള കനേഡിയന്‍ അതിര്‍ത്തിയോട് ചേര്‍ന്നാണ് അപകടമുണ്ടായത്. മറിഞ്ഞ വാണിജ്യ ട്രക്കില്‍ 31,751 കിലോ തേനീച്ചക്കൂടുകളാണ് ഉണ്ടായിരുന്നത്.  ഏകദേശം 250 ദശലക്ഷം തേനീച്ചകള്‍ ട്രക്കില്‍ നിന്ന് രക്ഷപ്പെട്ടതായി കണക്കാക്കപ്പെടുന്നു.

കനത്ത ബന്തവസ്സാണ് നാട്ടില്‍ പൊലിസ് ഏര്‍പെടുത്തിയിരിക്കുന്നത്. തേനീച്ചകള്‍ രക്ഷപ്പെടാനും കൂട്ടമായി കൂടാനും സാധ്യതയുള്ളതിനാല്‍ ആ പ്രദേശം ഒഴിവാക്കണമെന്നും പൊലിസ് ജനങ്ങളോട് അഭ്യര്‍ഥിച്ചിട്ടുണ്ട്. കഴിയുന്നത്ര തേനീച്ചകളെ രക്ഷിക്കുക എന്നതാണ് അധികൃതരുടെ ലക്ഷ്യം. മേഖലയിലെ റോഡുകള്‍ അടച്ചിട്ടിരിക്കുകയാണ്. തേനീച്ചകളെ പിടിക്കാന്‍ തേനീച്ച വിദഗ്ധരുടെ സഹായം ആവശ്യപ്പെട്ടിട്ടുണ്ട്. അടുത്ത ഒന്നോ രണ്ടോ ദിവസത്തിനുള്ളില്‍ തേനീച്ചകളെ അവയുടെ കൂട്ടിലേക്ക് തിരികെ കൊണ്ടുപോയി റാണി തേനീച്ചയെ കണ്ടെത്താനുള്ള സൗകര്യമൊരുക്കുക എന്നതാണ് പദ്ധതിയെന്നും പൊലിസ് പറഞ്ഞു.  

പരാഗണത്തിലും ഭക്ഷ്യോത്പാദനത്തിലും പ്രധാന പങ്കുവഹിക്കുന്ന ജീവികളാണ് തേനീച്ചകള്‍. പരിപ്പ്, പച്ചക്കറികള്‍, സരസഫലങ്ങള്‍, സിട്രസ് പഴങ്ങള്‍, തണ്ണിമത്തന്‍ എന്നിവയുള്‍പ്പെടെ 100-ലധികം വിളകളില്‍ അവ പരാഗണം നടത്തുന്നുണ്ട്. അതേസമയം, വര്‍ഷങ്ങളായി നിരവധി ഭീഷണികള്‍ നേരിടുകയും തേനീച്ചകളുടെ എണ്ണം കുറയുകയും ചെയ്യുന്നുവെന്നും വിദഗ്ധര്‍ ചൂണ്ടിക്കാട്ടുന്നു. കീടനാശിനികള്‍, പരാദങ്ങള്‍, രോഗങ്ങള്‍, കാലാവസ്ഥാ വ്യതിയാനം, വൈവിധ്യമാര്‍ന്ന ഭക്ഷ്യ വിതരണത്തിന്റെ അഭാവം എന്നിവയാണ് ഇവയുടെ നാശത്തിന് കാരണമെന്ന് വിദഗ്ദ്ധര്‍ പറഞ്ഞു. തേനീച്ചകളുടെ എണ്ണം കുറയുന്നത് കൃഷിക്കും ഭക്ഷ്യസുരക്ഷയ്ക്കും വലിയ പ്രത്യാഘാതങ്ങള്‍ ഉണ്ടാക്കുമെന്നും വിദഗ്ധര്‍ ചൂണ്ടിക്കാട്ടി.