മക്ക: ഈ വർഷത്തെ ഹജ്ജ് നടപടികൾക്ക് പുണ്യ നഗരിയിൽ ഏർപ്പെടുത്തിയത് പഴുതടച്ച സുരക്ഷ. തീർത്ഥാടകരുടെ സുരക്ഷക്ക് പ്രാധ്യാന്യം നൽകി പഴുതടച്ച സുരക്ഷാ ക്രമീകരണങ്ങളാണ് സജ്ജീകരിച്ചിരിക്കുന്നത്. ഏതാനും വര്ഷം മുൻപ് ഒരുക്കിയ ഏകീകൃത സുരക്ഷാ ഓപറേഷൻ സെൻറർ മുഖേനയാണ് സുരക്ഷാ വകുപ്പുകൾ പദ്ധതികൾ തയ്യാറാക്കുന്നത് . അത്യാഹിത ഘട്ടങ്ങളിൽ വേണ്ട സുരക്ഷാ നടപടികൾക്കായി മിനുറ്റുകൾക്കകം സ്ഥലം വളഞ്ഞു ഓപ്പറേഷൻ നടത്താനുള്ള പദ്ധതികളും ഒരുക്കിയിട്ടുണ്ട്. 

 ആഭ്യന്തര മന്ത്രാലയത്തിന് കീഴിലായി ആരോഗ്യ മന്ത്രാലയം, റെഡ് ക്രസന്റ്, ജല വിതരണ കമ്പനി, വൈദ്യുത മന്ത്രാലയം, ട്രാൻസ്‌പോർട്ട് മന്ത്രാലയം തുടങ്ങി വിവിധ വകുപ്പുകളുടെ സഹകരണത്തോടെയാണ് ഏകീകൃത സുരക്ഷാ കേന്ദ്രം പ്രവർത്തിക്കുന്നത്. അത്യാഹിത ഘട്ടങ്ങളിൽ മാത്രമേ ഈ വകുപ്പുകളുടെ സഹായം തേടുകയുള്ളൂ. തീപിടിത്തമുണ്ടായാൽ കെടുത്താനായി സിവിൽ ഡിഫൻസ് അത്യാധുനിക ഡ്രോൺ സംവിധാനവും സജ്ജീകരിച്ചിട്ടുണ്ട്. ‘സഖ്ർ’ എന്ന പേരുള്ള ഡ്രോണുകൾ രക്ഷാപ്രവർത്തനത്തിനും ഉപയോഗപ്പെടുമെന്ന് സിവിൽ ഡിഫൻസ് വക്താവ് കേണൽ മുഹമ്മദ് അൽ ഹമാദി വ്യക്തമാക്കി. ആദ്യമായാണ് ഹജ്ജ് വേളയിൽ അഗ്നിശമന ഡ്രോണുകൾ ഉപയോഗിക്കുന്നത്. ആർട്ടിഫിഷ്യൽ ഇൻറലിജൻസ് സാങ്കേതികവിദ്യയുടെ സഹായത്തോടെ പ്രവർത്തിക്കുന്ന ഡ്രോണിന് 200 മീറ്റർ ദൂരപരിധി വരെ പറക്കാനാകും. 

തീപിടുത്തം നേരിടാൻ ആവശ്യമായ രക്ഷാസാമഗ്രികളും ഉപകരണങ്ങളും വഹിക്കാനും ശേഷിയുണ്ട്. ഉയർന്ന ഭാഗങ്ങളിൽ 12 മണിക്കൂർ പ്രവർത്തിക്കുന്ന ഡ്രോണിന് 40 കിലോഗ്രാം വരെ ഭാരം വഹിക്കാൻ കഴിയും. വിവിധോദ്ദേശ്യ അഗ്നിശമന സംവിധാനം, രക്ഷാപ്രവർത്തനം, നിയന്ത്രണം, സുരക്ഷ സംവിധാനങ്ങൾ, തെർമൽ കാമറകൾ എന്നിവ ഇതിൽ സജ്ജീകരിച്ചിരിക്കുന്നു. ഉയർന്ന പ്രതികരണ വേഗത, ഉദ്യോഗസ്ഥർക്കുള്ള അപകടസാധ്യത കുറക്കൽ, തത്സമയ കാമറാ സംവിധാനം എന്നിവ ഇതിന്റെ സവിശേഷതയാണ്.