അലിയൻസ് അരീന: ഇറ്റാലിയൻ വമ്പൻമാരായ ഇന്റർ മിലാനെ എതിരില്ലാത്ത അഞ്ച് ഗോളുകൾക്ക് തകർത്തുകൊണ്ട് പാരീസ് സെയ്ന്റ് ജെർമെയ്ൻ യുവേഫ ചാമ്പ്യൻസ് ലീഗ് കിരീടം സ്വന്തമാക്കിയിരിക്കുകയാണ്. പാരീസിന്റെ ചരിത്രത്തിലെ ആദ്യ യുസിഎൽ കിരീടനേട്ടമാണിത്. കലാശപ്പോരാട്ടത്തിൽ പിഎസ്‌ജിക്കായി അഷറഫ് ഹക്കിമി (12'), ഡിസൈർ ഡൗ (20', 63'), ക്വിച്ച ഖ്വാരസ്കേലിയ (73'), സെന്നി മയൂലു (86') എന്നിവരാണ് ഗോളുകൾ നേടിയത്. 

പിഎസ്ജിയുടെ കിരീടനേട്ടത്തിനൊപ്പം ഫ്രഞ്ച് സൂപ്പർതാരം ഉസ്മാൻ ഡെമ്പലക്ക് ഈ സീസണിലെ ബാലൺ ഡി ഓർ നേടാനുള്ള സാധ്യതകളും സജീവമായിരിക്കുകയാണ്. നിലവിൽ ബാലൺ ഡി ഓർ നേടാൻ സാധ്യത കൽപ്പിക്കപ്പെടുന്ന താരങ്ങളിൽ മുൻപന്തിയിൽ ഉള്ളത് ഡെമ്പലെയാണ്. ലാമിൻ യമാൽ, മുഹമ്മദ് സലാഹ്, റാഫിഞ്യാ തുടങ്ങിയ താരങ്ങളും ബാലൺ ഡി നേടാനുള്ള പോരാട്ടത്തിൽ ഫ്രഞ്ച് താരത്തിന് പുറകിലുണ്ട്. ഈ സീസണിൽ പിഎസ്ജിക്കൊപ്പം മിന്നും പ്രകടനങ്ങൾ ആണ് ഡെമ്പലെ നടത്തിയത്. 

 

ഇന്റർ മിലാനെതിരെ ഫൈനൽ മത്സരത്തിൽ രണ്ട് അസിസ്റ്റുകൾ നേടിയാണ് ഡെമ്പലെ തിളങ്ങിയത്. ഇതോടെ 2018ന് ശേഷം ചാമ്പ്യൻസ് ലീഗിന്റെ ഫൈനലിൽ രണ്ട് അസിസ്റ്റുകൾ സ്വന്തമാക്കുന്ന ആദ്യ താരമായും ഡെമ്പലെ മാറി. 2018 ചാമ്പ്യൻസ് ലീഗ് ഫൈനലിൽ റയൽ മാഡ്രിഡിന്റെ ബ്രസീലിയൻ താരം മാഴ്സലോ ആയിരുന്നു ഇതിനുമുമ്പ് രണ്ട് അസിസ്റ്റുകൾ നേടിയിരുന്നത്. ആ സീസണിൽ ലിവർപൂളിനെ ഒന്നിനെതിരെ മൂന്ന് ഗോളുകൾക്കായിരുന്നു റയൽ മാഡ്രിഡ് പരാജയപ്പെടുത്തിയത്. 

ഈ സീസണിൽ 33 ഗോളുകളും 13 അസിസ്റ്റുകളും ആണ് ഡെമ്പലെ പാരീസിനൊപ്പം സ്വന്തമാക്കിയത്. ഇതിൽ ചാമ്പ്യൻസ് ലീഗിൽ എട്ട് ഗോളുകളും ആറ് അസിസ്റ്റുകളും താരം നേടിയിട്ടുണ്ട്. ഇതോടെ ചാമ്പ്യൻസ് ലീഗിന്റെ ഒരു സീസണിൽ ഏറ്റവും കൂടുതൽ ഗോൾ കോൺട്രിബ്യൂഷൻസ് സ്വന്തമാക്കുന്ന രണ്ടാമത്തെ ഫ്രഞ്ച് താരമായി മാറാനും ഡെമ്പലെക്ക് സാധിച്ചു. 14 ഗോൾ കോൺട്രിബ്യൂഷൻസ്  ആണ് ഈ സീസണിൽ താരം പാരീസിനു വേണ്ടി സ്വന്തമാക്കിയത്. 2021- 22 സീസണിൽ 17 കോൺട്രിബ്യൂഷൻസ് സ്വന്തമാക്കിയ കരിം ബെൻസിമയാണ് ഒന്നാം സ്ഥാനത്തുള്ളത്. ഈ ശ്രദ്ധേയമായ നേട്ടങ്ങൾക്ക് പിന്നാലെ ഡെമ്പലെയെ തേടി ബാലൺ ഡി ഓർ പുരസ്കാരം എത്തുമോയെന്ന് കണ്ടുതന്നെ അറിയണം.

Not only the Champions League but also the Ballon dOr will be on French soil Dembele tops the list