ധാക്ക: രാജ്യത്തെ കറന്‍സി നോട്ടുകളില്‍ നിന്ന് ബംഗ്ലാദേശ് രാഷ്ട്രപിതാവും മുന്‍ പ്രധാനമന്ത്രിയുമായ ഷെയ്ഖ് മുജീബുറഹ്മാന്‍ പുറത്ത്. ബംഗ്ലാദേശ് വിട്ട മുന്‍ പ്രധാനമന്ത്രി ഷെയ്ഖ് ഹസീനയുടെ പിതാവാണ് ഷെയ്ഖ് മുജീബുറഹ്മാന്‍. ഷെയ്ഖ് ഹസീന രാജ്യം വിട്ടതിനു പിന്നാലെ കഴിഞ്ഞ വര്‍ഷം ബംഗ്ലാദേശ് കേന്ദ്ര ബാങ്ക് പുതിയ നോട്ടുകള്‍ പുറത്തിറക്കുമെന്ന് പ്രഖ്യാപിച്ചിരുന്നു.

നടന്നത് 'ആസൂത്രിത' ആക്രമണം; ബംഗ്ലാദേശ് മുൻ പ്രധാനമന്ത്രി ഷെയ്ഖ് ഹസീനയ്‌ക്കെതിരെ കുറ്റം ചുമത്തി വിചാരണ

ബംഗ്ലാദേശ് പുറത്തിറക്കുന്ന പുതിയ നോട്ടുകളില്‍ മനുഷ്യരുടെ ചിത്രങ്ങള്‍ ഉണ്ടാകില്ലെന്ന് ബംഗ്ലാദേശ് കേന്ദ്ര ബാങ്ക് വക്താവ് ആരിഫ് ഹുസൈന്‍ ഖാന്‍ പറഞ്ഞു. 

ബംഗ്ലാദേശിന്റെ പ്രകൃതിദൃശ്യങ്ങളും ലാന്‍ഡ്മാര്‍ക്കുകളും പ്രദര്‍ശിപ്പിക്കുന്നതിലാണ് പുതിയ കറന്‍സി ശ്രദ്ധ കേന്ദ്രീകരിക്കുന്നതെന്നും ബാങ്ക് വക്താവ് ആരിഫ് ഹുസൈന്‍ ഖാന്‍ വാര്‍ത്താ ഏജന്‍സിയായ എഎഫ്പിയോട് പറഞ്ഞു.

'പുതിയ നോട്ടുകളുടെ പരമ്പരയില്‍ മനുഷ്യരുടെ ചിത്രങ്ങളൊന്നും ഉണ്ടാകില്ല, പകരം പ്രകൃതിദൃശ്യങ്ങളും പരമ്പരാഗത ലാന്‍ഡ്മാര്‍ക്കുകളുമായിരിക്കും ഉണ്ടാകുക,' ഖാന്‍ പറഞ്ഞു.

 

 

എഎഫ്പി റിപ്പോര്‍ട്ട് അനുസരിച്ച് ഹിന്ദു, ബുദ്ധ ക്ഷേത്രങ്ങളുടെ ചിത്രങ്ങള്‍, അന്തരിച്ച സൈനുല്‍ ആബിദീന്റെ കലാസൃഷ്ടികള്‍, 1971 ലെ വിമോചന യുദ്ധത്തില്‍ മരിച്ചവരെ ആദരിക്കുന്ന ദേശീയ രക്തസാക്ഷി സ്മാരകം എന്നിവ നോട്ടുകളില്‍ ഉള്‍പ്പെടുത്തും. ബംഗ്ലാദേശ് ബാങ്ക് മൂന്ന് വ്യത്യസ്ത മൂല്യങ്ങളിലുള്ള നോട്ടുകള്‍ പുറത്തിറക്കിയിട്ടുണ്ട്.

ഹസീനയെ പുറത്താക്കിയതോടെ ബംഗ്ലാദേശില്‍ ഷെയ്ഖ് മുജീബുര്‍റഹ്മാന്റെ രാഷ്ട്രപിതാവ് വിശേഷണം നീക്കി

'പുതിയ നോട്ടുകള്‍ സെന്‍ട്രല്‍ ബാങ്കിന്റെ ആസ്ഥാനത്തുനിന്നും പിന്നീട് രാജ്യത്തുടനീളമുള്ള മറ്റ് ഓഫീസുകളില്‍ നിന്നും പുറത്തിറക്കും. പുതിയ ഡിസൈനുകളുള്ള മറ്റ് നോട്ടുകള്‍ ഘട്ടം ഘട്ടമായി പുറത്തിറക്കും,' ഖാന്‍ കൂട്ടിച്ചേര്‍ത്തു.

ബംഗ്ലാദേശ് കറന്‍സി മാറ്റുന്നത് ഇതാദ്യമല്ല. 1972ല്‍ പാകിസ്ഥാനില്‍ നിന്ന് സ്വാതന്ത്ര്യം നേടിയ ശേഷം ബംഗ്ലാദേശ് കറന്‍സി മാറ്റിയിരുന്നു.

Controversy erupts in Bangladesh after the removal of Sheikh Mujibur Rahman’s image from currency notes. New designs feature Hindu and Buddhist temples, sparking political and cultural debate.